LUKA 9:1-62

Hleihnih hna mission

9.1 Hleihnih hna cu a auhṭi hna i annih kha khuachia ṭhawl khawhnak le zawtnak damter khawhnak huham le nawlngeihnak a pek hna, 2 cun Pathian pennak thanh awk le zawtnak damter awk ah a thlah hna. 3 Annih kha, “Nan khuatlawnnak ah zei hmanh i ken hlah u; ṭhiangthunh, zaal, changreu, tangka, cun angki leeng zunhnih i phorh hlah u. 4 Nan luhnak inn poh ah caam ko u; cun nan chuah tikah kha nan camnak inn in si ko seh. 5 Tluninn an pe lotu hna ca ah cun, cu khuapi in na chuah tikah, anmah ca ah tehte a si ding in, nan kebeh leidip kha va khawn hnawhtak hna u,” tiah a ti hna. 6 Cucaah an i thawh i khuakhat hnu khuakhat kal in thawngṭha kha an thanh i khuakip ah mizaw kha an damter hna. 

Herod le Jesuh

       7 Cu lio ah mangki bawi Herod nih hi thil si ning vialte cu a theih, cun a khuaruah a har ngai, zei cah tiah micheu nih Johan kha thihnak in a tho ṭhan an ti, 8 cun a cheu nih Elijah a lang ṭhan an ti, cun adang nih hlan i profet pakhatkhat a tho ṭhan an ti rih. 9 Sihmanhsehlaw Herod nih, “Johan maw? Amah cu a lu ka rak tan cang. Cu asi ahcun hi bantuk in a thawngpang ka theih mipa hi aho dah a si hnga?” tiah a ti. Cucaah amah kha hmuh a duh ngaingai.

Lamkaltu an rak kir ṭhannak. Changreu khuaruahharnak

      10 An rak kir ṭhan tikah Lamkaltu hna nih an hmuhton mi vialte cu an chimh. Cun anmah te lawng an um khawh nakhnga Bethsaida ti mi khuapi pawng ah aa zuhpi hna. 11 Asinain mibupi nih an hngalh i an zulh hna. A cohlanter hna i Pathian Pennak kong a chimh hna, cun damnak a herh mi hna kha a damter hna.

        12 Zanlei tlainawn ah khin hleihnih hna cu a sin ah an rak ra i amah kha, “Kan umnak hi hmunking a si caah kan pawngkam khua hna le lo ah riahnak le eidin an i kawl nakhnga mi hi thlah hna,” tiah an ti. 13 Sihmanhsehlaw amah nih, “Ei awk pakhatkhat pe hna u,” tiah a ti hna. Annih nih, “Va kal i hi vialte minung ca ah kan va cawk dah ti lo, changreu panga le nga pahnih leng ah zei hmanh kan ngei lo,” tiah an ti. 14 Zei cah tiah pa thongnga hrawng an si. Sihmanhsehlaw a zultu hna kha; “Sawmnga sawmnga ti in a phuphu in ṭhutter hna u,” tiah a ti hna. 15 A chim ning in a phuphu in an ṭhutter hna. 16 Cun changreu panga le nga pahnih cu a lak, van a cau, cun thluachuah a pek, cu hnu ah a cheu i mibupi kha phawt awk ah a zultu hna cu a pek hna. 17 An zapi tein an duhzat an ei, cun a ṭilṭawt kha an char i seihleihnih khat a si.

Peter nih a zumhnak a phuan

        18 Cun amah te lawng thla a cam lio ah khan a zultu hna cu a sin ah an ra, annih kha, “Mibu nih aho a si an ka ti dah?” tiah a hal hna. 19 Annih nih, “A cheu nih Baptisma petu Johan, adang nih Elijah, adang nih hlan profet pakhatkhat a nung ṭhan an ti,” tiah an leh. 20 Cu a si ahcun, “Nannih nih tah, aho a si nan ka ti dah?” tiah a ti hna. A tho i bia a chimtu cu Peter a si. Anih nih, ‘Pathian i Khrih na si,” tiah a ti. 21 Asinain annih kha hihi aho hmanh chimh lo ding ah fek tein bia a cah hna.

A temh-innak kong a chimchung a voikhatnak

       22 Amah nih, “Mi Fapa cu temh-innak fakpi in awk ah khaukhih mi a si, upa hna, tlangbawi luban hna le phungbia cawnpiaktu hna nih an hlawt lai i an thah lai, cun nithumnak ah a tho ṭhan lai,” tiah a ti hna.

Khrih hnuzul hna ngeih ding mi nunzia

       23 Cun, an dihlak sin ah a chim tikah amah nih, “Mi pakhat nih ka hnuzul si a duh ah cun amah le amah kha i hlaw seh law nifatin a vailamtung put in ka zul seh. 24 A nunnak khamh a duh mi paoh nih a nunnak a sung lai; sihmanhsehlaw keimah ca ah a nunnak a sung mi nih a nunnak a khamh lai. 25 Mi pakhat cu vawlei pumpi kha a co nain a mipum hrimhrim a buar, asilole a hrawh ahcun a ca ah zei dah a ṭhahnem? 26 Cucaah mi pakhat nih keimah le ka bia kha a zahpi a si ahcun mi Fapa hi a sunparnak le a Pa le vanmi thiang hna sunparnak he a rat tikah amah kha a zahpi ve lai.

Vancung pennak cu a ra zau lai

     27 Biatak kan chimh hna, hika a dir mi hna lak ah hin Pathian Pennak a hmuh hlan lo thihnak a tep lo ding cheukhat an um,” tiah a ti hna.

Muisam thlennak

        28 Atu hi bia a chim hnu niriat tluk hrawng ah khin, Peter, Johan le Jeim hna kha a auh hna i thlacam awk ah tlang ah a kaipi hna. 29 Cuti thla a cam lio ah cun, a muisam a thleng i a hnipuan cu a tleu in a tleu. 30 Cun hmakhatte ah mi pahnih nih amah cu bia an ruah len; annih cu Moses le Elijah an si, 31 sunparnak he an rung lang, cun Jerusalem ah a tlinter ding mi a temh-innak kong kha an ruah. 32 Peter le a hawile hna cu thu hluahmah in an i hngilh ko, sihmanhsehlaw an hun i hlauh tikah a sunparnak le a pawng i a dir mi pahnih kha an hmuh hna. 33 Kha hna, a sin in an langh tikah Peter nih Jesuh cu, “Bawipa, hika um hi khuaruahhar ngai a si; cucaah deuthlam pathum in sa usih, nangmah ca pakhat, Moses ca pakhat le Elijah ca pakhat,” tiah a ti. Zei ka chim ti a hngal lo. 34 Cuti bia a chim lio ah cun, minmei a rung zam i a thladem in a  khuh hna; minmei chung an luh tikah a zultu hna cu an thin a phang. 35 Cun minmei chung in, “Hihi, ka thim mi, ka fapa a si. A bia ngai u,”ti in aw pakhat a rung thang. 36 Cu aw a vun daih tikah Jesuh cu amah lawng in a um cang. Cun a zultu hna cu dai tein an um, cun cu lio i an hmuh mi cu aho hmanh an chim hna lo.

Khuachia nih a tuah mi damternak

       37 A thaizing tlang in an rung ṭum tikah mibu nganpi cu amah ton awk ah an ra. 38 Cun ruah lo pi in mibupi lak in mi pakhat cu a au i amah nih, “Bawipa, ka fapa na ka zohpiak naklai kan nawl ko, amah cu ka ngeihchunte a si. 39 Khuachia nih hmakhatte ah a luhhnawh tawn, a tlaih i voikhatpi ah a ai tawn, cun a tengh i a kaa in a buanbara a tawh; fawibai ah a kaltak duh lo, cun a kaltak tikah ngakchiapate cu a thahhnik tawn. 40 Ṭhawlpiak awk ah na zultu hna cu ka nawl hna nain an ṭhawl kho lo,” tiah a ti. 41 Jesuh nih, “Zumhnak tlawm le milungkhawng hna, zei caan tiang dah nan sin ah ka um lai i nan sin ah kaa ṭhumh rih lai? Na fapa cu hika ah ratpi,” tiah a ti. 42 Cun a rat lio hmanh ah khuachia nih a thluk i a hnuhdawh colh. Sihmanhsehlaw Jesuh nih thlarau ṭha lo cu a hro i ngakchiapa cu a dam, cun a pa kha a pek ṭhan, 43 cun mi vialte nih Pathian lianhngannak kha an hmuh tikah an ar dih.

A temh-innak kong a chimchung a voihnihnak

          Mikip cu a tuah mi thil kong i khuaruahhar in an um lio ah khan, a zultu hna kha, 44 “Nannih tu cu hi bia hna hi nan lung ah nan riahter peng lai: Mi Fapa cu minung ṭhawnnak ah chanh a si lai,” tiah a ti hna. 45 Sihmanhsehlaw a chim mi cu an lung a tliang kho lo, a sullam an hngalh nakhnga lo an sin in thuhkanh a si, cun cu kong hal ding cu an ṭih.

Aho dah a ngan bik ?

         46 An lak ah khan aho dah a ngan bik ti mi kong  ah bia-alnak a chuak. 47 Sihmnanhsehlaw Jesuh nih an ruah mi cu a hngalh, cun ngakchia pakhat cu a pawng ah a dirter i 48 annih kha, “Ka min in hi ngakchiate a cohlang mi poh cu keimah a ka cohlan a si; cun keimah a ka cohlang mi poh nih a ka thlahtu kha a cohlan ve. Nan lak i nauta bik kha a ngan bik a si” tiah a ti hna.

Jesuh min hmannak kong

       49 Cu tikah Johan nih a thawh i, “Bawipa, mizeimaw nih na min in khuachia a ṭhawl kan hmuh, cun amah cu kanmah he a um mi a si lo caah kan thlauh,” tiah a ti. 50 Sihmanhsehlaw Jesuh nih, “Nan thlauh lai lo: nanmah an ralchan hna lo mi poh cu nanmah ca an si,” tiah a ti hna. 

IV: JERUSALEM LEI A TLAWNNAK

Samaria khua nih a cohlang lo

        51 Atu cu vancung i an cawi lai caan a naih caah ciammam tein Jerusalemlei ah aa mer, 52 cun lamkaltu cu a hmai ah a thlah hna. Hi hna cu an chuak i amah ca timhtuahnak tuah awk ah Samaria khua pakhat ah an lut, 53 asinain Jerusalem kal ding a si caah amah cu an cohlang lo. 54 Hi thil an hmuh tikah, a zultu a si mi Jeim le Johan nih, “Bawipa, hi hna hi an kangh dih naklai van in mei thlak ding na kan duhpiak maw?” tiah an ti. 55 Sihmanhsehlaw aa mer i annih kha a hro hna, 56 cun khua dang ah an lan.

Lamkaltu si a harnak

        57 Cuti an kal cuahmah lio ah khan mi pakhat an ton i amah nih, “Na kalnak poh ah kan zul lai,” tiah a ti. 58 Jesuh nih, “Cenghngia nih kua an ngei i van vate nih bu an ngei, sihmanhsehlaw Mi Fapa cu a lu chiahnak hmun a ngei lo,” tiah a leh.

       59 Cun “Ka zul” tiah a ti mi adang  pakhat nih khan, “Kal in ka pa va vui ta ning,” tiah a leh. 60 Sihmanhsehlaw Jesuh nih, “Mithi nih an mithi cu vui ko hna seh, nang na rian cu va kal i Pathian Pennak kong thawngṭha va thanh kha a si,” tiah a ti.

     61 Cun adang pakhat nih, “Bawipa, kan zulh ko lai, sihmanhsehlaw va kal in inn i ka chungkhat hna kha va chawnta hna ning,” tiah a ti. 62 Jesuh nih, “Voikhat leithuannak thuantum aa tlaih hnu i hnulei a her ṭhan mi cu Pathian Pennak he aa tlak lo,” tiah a ti.