UPA BAPTISMAL PEKNAK

T. Pa, le Fapa, le Thiang Thlarau min in.

Z. Amen.

T.  Pathian Bupi sinin zeidah na hal?

Baptisma ingtu. Zumhnak.

T. Zumhnak nih zeidah a pek?

Baptisma ingtu. Zungzal nunnak.

T. Mah hi zungzal nunnak cu a si: a hmaanmi Pathian le a thlahmi Jesuh Khrih hngalhnak hi. Pathian nih Jesuh Khrih kha nunnak le zeizong vialte, hmuh khawhmi le hmuh khawhlo mi vialte Bawi si awk caah mithi sinin a thawhter tthan. Nihin Baptisma na hal tikah mah nunnak hi na halmi a si. Nangmah nih Khrih kha na rak hngal lo i a zultu si na duh lo ahcun mah ti hin na tuah lai lo.

T. Khrihfa si awk caah a herh mi timhtuahnak kha na tuah dih cang maw?

B. Ka tuah dih cang.

T. Khrih bia kha ngai in a nawlbia zulh awkah na lung naa thlek cang maw?

B. Kaa thlek cang.

T. Kan nun ning le kan thlacamnak kha na hrawm cang maw?

B. Kaa hrawm cang.

( Tlangbawi nih lutlaitu kha a hal hna. )

T. Nangmah cu amah caah thlarau lei nu/pa na si. Pathian hmaika ah amah hi Bupi chungah lehkhan awk a tlakmi a si tiah na ruat maw?

L. Ka ruah.

T. Nangmah nih amah leikap in hnatlak in na chim cang. Khrih rian kha tha tein a tuan khawhnak hnga cawnpiaknak le ziaza tha in na bawm lai maw?

L. Ka bawmh lai.

T. Thlacam u sih.

Dawtnak le zangfahnak a si mi kan Pa, a nunnak ah nangmah lam hruainak kha a hngal mi kan unau/far N.,... min in kanin lawmh. Nihin, na Bupi hmaika ah zumhnak lei i na auhnak kha an leh; a nunnak thar ah lawmhnak le lungtlinnak kha rak hmuhter ko, tiah kan Bawipa Kri min in kanin hal.

Z. Amen.

Biakinn Chung Luhnak

T. N.., Kanmah he Pathian bia cabuai hrawm awkah biakinn chungah rak lut ko tuah.

Baibal Relnak

Voikhatnak Baibal (Ezk.36:24-28)

Bawipa Pathian nih hiti hin a ti: Miphun hna lak khan kan chuah hna lai i, ram kip khan kan pumh hna lai i, nanmah vawlei te ah khan kan kalpi hna lai. Nan cungah ti thiang kan theh hna lai i, nan siasal vialte khan kan thenh hna lai. Lungthin thar kan pek hna lai i, thlarau thar nan chungah ka khumh lai; nan pum chungin lung bantuk in a hak mi nan lung kha ka lak lai i lung kelte kha kan pek hna lai. Ka thlarau kha nan chungah ka khumh lai i ka nawlbia in kan nunter hna lai i, ka biakhiahnak kha `ha tein kan zulhter hna lai. Nan pupa hna ka pek mi ram ah nan um lai; nannih cu ka mi nan si lai i, Kei cu nan Pathian ka si lai.

T. Pathian bia a si.

Z. Pathian cungah lawmhnak um ko seh.

Psalm Hla Chawnhlehnak

Ps. 51:3-4,8-9,12-13,14,17

R. Maw Pathian, ka chungah lungthin thiang kha run ser ko.

1. Maw Pathian, na thatnak in run ka zangfah ko; a nganmi na zangfahnak in ka sualnak ka hnawh piak ko. Ka palhnak in ka tawl law ka sualnak in ka thenh ko. R/

2. Ka chungah lungthin thiang kha run ser ko, maw Pathian. Zoh hmanh, lungthin ding kha na duh i, ka chungbik ah fimnak kha ka cawnpiak. Hyssop hnah in ka theh law, ka thiang lai; ka tawl law, hawhra nakin ka raang deuh lai. R/

3. Lungthin thiang ka serpiak law, maw Pathian, ka chungah a fek mi lungthin kha rak tharchuah ko. Na hmaika in ka thawl hlah law, na thiang thlarau kha ka lakpiak hlah. R/

4. Na khamhnak i lawmhnak kha ka pe than law, ka lungthin cu nangmah nawl zulh a duh mi ah ser ko. Maw Bawipa, ka hmur hi hung hna law, ka kaa nih na thang`hatnak kha a thanh lai. R/

Voihnihnak Baibal (Titus 3:4-7)

Pathian kan Khamhtu a zangfahnak le dawtnak a langh tikah, anih nih a kan khamh, thil ding kan tuah ruangah si loin, a kan zangfah ruangah a si. Anih nih hrin thar tipilnak le Thiang Thlarau in tharchuahnak thawngin a kan khamh. Jesu Kri kan Khamhtu thawngin mah Thlarau cu tampi in a kan tawih i, cucaah a vel in miding ah a kan ser i, ruahchannak chungah, zungzal nunnak ro cotu kan si lai.

T. Pathian bia a si.

Z. Pathiang cungah lawmhnak um ko seh.

Alleluia (Jn. 3:16)

Pathian nih vawlei hi a dawt hringhran caah a Fapa ngeihchun kha a pek, cucaah amah a zum mi paoh cu zungzal nunnak kha an ngei lai.

Thawngthabia (Jn. 3:3,5-8, 14 -16)

Jesuh nih Nikodemus sinah a chim:

“Biatak kan chimh, mi pakhat cu a thar in hrin a si lo ahcun Pathian pennak kha a hmu kho lai lo. Biatak kan chimh, mi pakhat cu ti thlarau in hrin a si lo ahcun Pathian pennak chungah a lut kho lai lo. Thisa in hrin mi cu thisa a si ko i, thlarau in hrin mi cu thlarau a si. A thar in hrin na si lai tiah kan ti caah na khuaruahhar hlah. Thli cu a duhnak paoh ah a hrang i a aw cu na theih, sihmanhsehlaw khoika in a rat i khoika ah a kal ti na hngal lo, cu bantuk cun thlarau in hrin mi cu an si dih. Moses nih ramcar ah rul kha a tar bantuk in mi Fapa zong cu tar a si lai, amah a zum mi paoh cu zungzal nunnak an ngeihnak hnga caah a si. Zeitintiah Pathian nih vawlei kha a dawt tuk hringhran caah a Fapa ngeihchun kha a pek, cucu amah a zum mi paoh cu an rawhnak hnga lo zungzal nunnak an ngeihnak hnga caah a si.”

T. Bawipa thawngthabia a si.

Z. Khrih, na cungah thang`hatnak um ko seh.

Phungchimnak

A Phunphun Halnak

U le nau hna, sacrament hna hmuh awkah a hal mi kan unau/far N., le misual kanmah hna caah thlacam u sih. Kannih nih zumhnak le sualngaihchihnak in Kri kha kan naih chinchin khawhnak hnga le a kan pek mi nunnak thar chungah kan nun zungzal khawhnak hnga bawmhnak hal u sih. T. Bawipa nih kan chungah sualngaihchihnak lungthin a alhternak hnga caah.

R. Bawipa, kan thlacamnak kan ngaihpiak ko.

T. Kri nih a khamh i tipilnak thawngin sualnak caah a thi mi kannih nih a vel kha kan nuncan in tehte kan khaan khawhnak hnga caah. R/

T. Vawlei sualnak a kalpitu Kri hnu zulhnak in kan unau hi sualnak hma in a dam i a `hawnnak in a luatnak hnga caah. R/

T. Thiang Thlarau nih sualnak in a thenh i thiannak lam ah a hruainak hnga caah. R/

T. Tipilnak ah Kri he vui a sinak thawngin sualnak caah a thi i, Pathian ca lawngah a nun khawhnak hnga caah. R/

T. Biaceih ni ah thiannak le dawtnak theitlai kha i ken in Pa Pathian hmaika a phanh khawhnak hnga caah. R/

T. Pathian nih a Fapa pek tiang in a dawt mi vawlei nih a dawtnak kha zumh in a sinah a rak kirnak hnga caah. R/

Khuachia ~hawlnak Thlacamnak

A lianngan Pathian, sualnak sal cannak in khamh awk ca le na fale hna i luatnak kha pek awkah na Fapa ngeihchun kha na rak thlah.

Atu kannih nih a sualnak kha i theih in na hmai ah a ra mi kan unau/far caah thla kan cam. Anih nih tukforhnak kha a ton bal i Satan hneksak-nak kha a huah bal. Na Fapa temhinnak le thawh`han-nak in khuamui `hawnnak chung khan rak chuah ko tuah. Kri vel in rak `hawnter law a nun chung vialte lam rak hruai ko tuah, tiah kan Bawipa Kri min in kanin hal. Amen.

Khamhnak Chiti Thuhnak

Khamhtu Kri min in khamhnak chiti kan thuh. A zungzal a nung i a uktu Kri nih a `hawnnak in thazang in pe ko seh.

Ti Thluachuah peknak

Kan Pa, sacrament hmelchunhnak in vel kha na kan pek. Sacrament hmelchunhnak hna nih hmuh khawh a si lo mi na `hawnnak nih a tuah mi khuaruah-har thil hna kong kha an kan chimh. Baptisma peknak ah na laksawng ti kha kan hman. Ti cu hi sacrament chungin na pek mi vel laksawng a rum ning kha a phuangtu hmelchunhnak ah na ser cang.

Kan Pa Pathian, vawlei hramthawk caan ah na thlarau cu ti cungah aa chawk i, thiannak vialte chuahnak tiput ah na rak ser. Buanchukcho kha sualnak kha a donghnak ah a phanhter i `hatnak kha a thar in thawk`hannak a pe kho mi baptisma ti i hmelchunhnak ah na rak ser.

Kan Pa Pathian, Rili sen ti thawngin Israel kha sal cannak in na hruai i, baptisma thawngin sualnak in luatter a si mi a thiang mi Pathian miphun i muisam ah na rak ser. Jordan ti chungah na Fapa cu Johan nih baptisma a pek i, Thiang Thlarau in tawihnak a hmu.

Na Fapa nih vailam cung aa thlai lio ah ti le thi kha a hnak in luang seh ti a duh. A thawh`han hnu ah a zultu hna kha, “Kal u law, miphun vialte kha va cawnpiak hna u; Pa le Fapa le Thiang Thlarau min in baptisma va pe hna u,” tiah a chimh hna.

Kan Pa Pathian, na Bupi hi dawtnak in run zoh law a cungah baptisma cerhti kha rak luanter ko. Thiang Thlarau `hawnak in hi ti cungah na Fapa vel kha run `hum ko. Minung kha nangmah mui he aa lo in na ser bangin ti le thlarau in hrin`hannak a hmu mi na fa hi a sualnak vialte khan rak thenh ko tuah.

( Ti kha orhlei kut in a tongh i )

Kan Pa Pathian, na Fapa thawngin hi ti cungah Thiang Thlarau kha run thlah ko tiah kanin nawl. Baptisma thawngin Kri he hmunkhat ah a thi i vuinak a ing mi vialte hna kha nunnak thar ah rak thawhter `han ko hna, tiah kan Bawipa Kri min in kanin hal.

(Asiloah)

Maw Bawipa, ra law na salle hna nih tipil an innak caah kan hman hnga mi hi ti hi thluachuah run pe ko tuah. Annih kha na Bupi zumhnak chungah nunnak thar in kholh awk caah na auh cang hna bangin zungzal nunnak kha rak ngeihter ko hna, tiah kan Bawipa Jesu Kri min in kanin hal. Amen.

Satan Hlawtnak

T. Satan na hlaw maw?

K. Ka hlawt.

T. A rian`uannak vialte na hlaw maw?

K. Ka hlawt.

T. Pokpalawng a biakam mi vialte na hlaw maw?

K. Ka hlawt.

Zumhnak Bia Phuannak

T. N,... Zeizong tuah kho van le vawlei sertu Pa Pathian kha na zum maw?

K. Ka zumh.

T. Ngaknu Thiang Mary nih a hrin i vailam an tah, a thi i an vui, mithi sinin a tho`han i atu ah Pa Pathian orhleikam ah a `hu mi Pathian Fapa ngeihchun kan Bawipa Jesu Kri na zum maw?

K. Ka zumh.

T. Thiang Thlarau, a thiang mi Katholik Bupi, mi-thiang mi pumkhat sinak, sual ngaihthiamnak, pum thawh`hannak le zungzal nunnak na zum maw?

K. Ka zumh.

( Baptisma pek colh ding )

T. N., Pa le Fapa le Thiang Thlarau min in baptisma kan pek.

Chiti Thiang Thuhnak

Pathian, kan Bawipa Jesu Kri a Pa nih sualnak vialte in an luatter cang, ti le Thiang Thlarau in hrinnak thar kha an pek cang i, a miphun thiang chungah an luhter cang. Anih nih atu nangmah kha khamhnak a pe mi chiti an thuh. Kri cu Tlangbawi, Profet le Siangpahrang in chiti thuh a si bangin, nang zong zungzal nunnak kha aa hrawm mi a pum cheubang pakhat in nung zungzal ko tuah. Amen.

Puanrang Khuhnak

T. N., nang cu ser thar mi na si cang i Kri kha naa hruk cang. Hi puanraang kha i lak law zungzal nunnak na ngeihnak hnga kan Bawipa Jesu Kri biaceihnak `hutdan na phanh tiang thurter loin i put ko tuah.

K. Amen.

Phazawngdan Mei Peknak

T. Nangmah cu Khrih nih ceunak an pek cang. Ceunak fa bangin nung zungzal ko law na lungthin chungah zumhnak mei-alh cu nunter zungzal ko tuah. A rat tikah, vancung pennak chungah mithiang vialte he Bawipa kha dong te ko.

K. Amen.

Bawipa Thlacamnak

Thluachuah peknak