SIRACH 9

Minu hna  

9 Na duh mi na nupi cu va nahchuah hlah, nangmah kha zei  tin harnak pek ding ti cu va cawnpiak hlah. 2Nu pakhat kut ah va chia hlah, tho kho lo in a kut tang ah na tla sual lai. 3 Hlawhhlangnu va kom hlah, a rap ah naa awk sual lai.  4 Hlasa nu he caan va hmang hlah, a velhle ah naa foih sual lai. 5 Ngaknu muidawh cu va zoh len hlah, nangmah le amah cu aa khat mi daantatnak nan in sual lai.  6 Hawhlangnu cu na lungthin va pe hlah, na roram na sung sual lai.  7Khuapi lamthluan ah khuacuan len hlah, hmunking ah vaa chawk len hlah.  8Muidawh nu kha va zoh hlah, midang ta a si mi dawhnak cu va bih len hlah. Zei ca ah tiah muidawhnu ruang ah mi tampi an tlu cang; hi nih hin nupa duhnak mei a alhter.   9 Pasal ngeicia nu he va ṭhu hlah, zu ding nu he cabuai ah va ṭhu hlah, na lung an lak sual lai i naa tei khawh lo sual ahcun  rawhralnak ah na nal sual lai.

Mi he i pehtlaihnak

10Hawikom hlun cu kaltak hlah, a thar nih a tluk lai lo. Hawikom thar le mitsur zu thar, a hlun tikah lungsi ngai in na din te lai.

11Misual i hlawhtlinnak a hmuh tikah va hngar hlah, zei tin dah a dongh lai kha na hngal lo.  12Pathian a hngal lo hna nuamhnak ah vaa nuam ve hlah, hika hmanh ah hin dantatnak an huah tengteng lai ti kha philh hlah.

13Mi a that kho mi mipa sin in va zaam, cun thih ṭihnak nih an dawi lai lo. Anmah kha na fuh ah cun na cawlcangh ning vaa palh hlah, cu lo ahcun na nunnak an lak sual lai. Rap hna lak ah ka vak ti kha va hngal, cun ralram ah kaa chawk ti kha va philh hlah. 

 14Na innpa cu a si khawh chung in va cawnpiak law mifim kha ruahnak va hal. 15Bia i ruah ti mi cu thluak hman a herh caah nan ceihkhaan mi vialte cu Cungnung Bik nawlbia ning si seh. 16Miding kha na ei hawi ah i ser law, Bawipa ṭih cu naa porhlawtnak si ko seh.  17Zungthiam hna tuah mi thil cu thangṭhat a co, sihmanhsehlaw mipi hruaitu cu biachim a thiam lai.  18Holh tam tuk mi cu khua mi ca ah ṭih a nung, a duhduh in bia a chim mi cu fihnung a si.