SIRACH 2

 Hneksak harnak caan ah Pathian ṭihnak

2 Ka fa, Bawipa rianh naa timh ahcun hneksaknak ca ah timhcia in um ko. 2Na lung thiang seh law fek tein dir, cun vanchiatnak a tlun tikah lau hlah. 3Amah cu i awk law kaltak hlah, cuti cun na thih lai ah upat na tong lai. 4Na cung i tlung mi poh cu cohlang ko hna, cun zei hmanh tlam a tlin lo tikah na lungsau ko seh, 5zei tin tiah sui cu mei in hneksak a si i thim mi hna cu toidornak meiphu in hneksak an si.  6Amah cu i bochan law an domhtlaih lai, lam ding zul law amah cu i ruahchan. 7Nannih Bawipa a ṭih mi hna a zaangfahnak cu hngak u, nan tluk sualnak hnga lo amah kha mertak hlah u. 8Nannih Bawipa a ṭih mi hn a, amah cu i bochan u, cun nan laksawng chuh nan tong lai lo. 9Nannih Bawipa a ṭih mi hna, a laksawng ṭha hna, zungzal nuamhnak le zaangfahnak kha i ruahchan u. 10Hlanchan minung hna kha zoh hna ulaw hmu tuah hna u, Bawipa a ṭih mi poh cu ningzahnak an tong maw? Asilole, Bawipa ṭihnak kha fek tein aa tlaih mi hna cu an i hnin bal maw? Asilole, amah kha a au mi poh cu theihpiak lo mi an um bal maw?  11Zei cah tiah Bawipa cu zawnruahnak le zaangfahnak a ngei; sual kha a ngaihthiam i har caan ah mi kha a khamh. 12A lung a dong i a tha a dih mi le tei a ma lo i lam pahnih a kar mi misual hna cu ngaihchia an si. 13A zumhnak a tlau i a lung a dong mi hna cu ngaihchia an si, zei cah tiah cu bantuk cu zohkhenh an tong lai lo.  14Inkhawhnak thazaang a ngei ti lo mi nannih ca ah ngaihchia a si: Bawipa len caan ah zei dah nan tuah te lai? 15Bawipa a ṭ ihmi hna nih a bia kha zei rel lo in an um lo i amah a daw mi hna nih a lam kha an zulh. 16Bawipa a ṭih mi nih a si khawh chung in a lungton an i zuam i amah a daw mi hna cu a Phungbia ah lunghmuihnak an hmu. 17Bawipa a ṭih mi hna cu an lung kha timhcia in an chiah i Bawipa hmai ah khan toi an i dor. 18Bawipa cu a lianhngan tluk in a zaangfahnak zong a ngan ve caah aho minung kut hmanh ah tlak lo in Bawipa kut ah tla hna usih.