SALM 22:1-31

Miding i temh-innak le ruahchannak

22. 1 Ka Pathian, ka Pathian, zeicahdah na ka hlawt? Ka hramnak bia nih khamhnak a ka pe kho lo. 2 Ka Pathian, chun ah kan auh i na ka let lo, zan ah ti le hnangamnak zei hmanh ka hmu lo.

3 Asinain, Israel i thang`hatnak ah aa lawm mi a thiang mi Bawi, 4 kan pupa hna nih nang kha an in bochan, nang kha an in bochan i luatnak na pek hna. 5 Nangmah sin ah bawmh hal in an au i luatnak na pek hna; nangmah kha an in bochan i ningzah na huahter hna lo.

6 Sihmanhsehlaw kei cu minung ka si lo, sachia men ka si, minung phun nih nautat mi le mi nih fih mi ka si; a ka hmu mi vialte nih an ka nihsawh, 7 an hnar an tum i an lu an thin, cun, ‘Bawipa aa bochan i Bawipa nih luatnak pe ko seh! 8 A lunglawmhnak cu amah a si bang amah nih luatnak pe ko seh,’ an ti.

9 Ka nupaw chung in a ka chuah i ka nu`ang cung a rak ka ngamhtu cu nangmah na si. 10 Nangmah kut cung ka rak chuak i ka nupaw chung in nangmah ta ka rak si cang. 11 A hmu lo mi bang um hlah, zeicahtiah harnak nih a ka tlunh i bawmtu aho hmanh an um lo.12 Cawtum tampi nih an ka kulh, Bashan cawhrang hna nih an ka naih. 13 Chiandeih bang an kaa aan in an ka hrumhnawh.14 Ka tha a `um i ka ruh cu tlong dih an i zal, ka thin cu khuaiseng bang ka chung ah an ti cang hna. 15 Ka kaa cu tlak-um bang a ro, ka lei cu ka dang ah aa benh. Thihnak leidip ah na ka hrilh cang.

16 Ka kut le ka ke vialte thlehbauh dih ding in ui run nih an ka dum i mi`halo phu nih an ka naih cang. 17 Diriam ngai in an ka zoh lio ah khan, ka ruh cu ka rel khawh dih cang hna; 18 ka angki cu an i `hen i ka hnipuan ca ah camcawhfung an zuk.19 Bawipa, zei thei lo bang um sawh hlah! Maw ka `hawnnak, keimah bawmh awk ah khulrang in ra ko cang, 20 ka thlarau cu vainam in le ka ngeihchun ka nunnak cu ui hna sehnak in chanh hram ko! 21 Chiandeih hna kaa, zaangfah awk ka nunnak cu, cawtum hrang hna ki in khamh ko tuah. 22 Na min cu ka unau hna sin ah, mipi pumhnak pi ah ka thanh lai: 23 ‘Nannih Bawipa a `ih mi hna amah cu thang`hat tuah u! Jacob cithlak hna, amah cu upat tuah u! Israel cithlak vialte hna, amah cu upatnak pe tuah u! 24 Zeicahtiah amah nih cun misifak hna infahnak kha hrelh le zeirello in a um bal lo, a hmai a mertak bal hna lo i mithli he an halnak cu a ngaihpiak zungzal hna. 25 Mipi pumhnak pi ah nangmah cu ka thang`hatnak na si, nangmah an `ih mi vialte hmaika ah ka biakamnak cu ka tlinter lai. 26 Misifak cu an ei i an khim lai, Bawipa a kawl mi hna nih amah kha, ‘Na lung cu i nuam zungzal ko seh!’ tiin anin thang`hat lai.

27 Vawlei pumpi nih an philh lai lo i Bawipa sin ah an kir lai, vawlei chungkhar vialte cu a hmai ah an kun lai. 28 Zeicahtiah siangpahrang nawlngeihnak vialte cu miphun hna uktu Bawipa ta an si. 29 Vawlei ah a `hanchona a hmu mi vialte cu Bawipa hmai ah an kun te lai, leidip ah a kir mi vialte nih kun in upatnak an pek lai. 30 Cun a thi mi vialte cu, an tefa hna tu nih amah cu an rianh lai, 31 a min cu a ra lai mi chan hna sin ah an thanhchin lai; cun hi hna nih hin a khamh-dinnak cu a chuak rih lo mi hna sin ah an chimhchin hna lai: amah nih a tlinter cang hna,’tiah an ti lai.