SALM 7:1-17

Hremnak caan miding thlacamnak

7. 1 Bawipa ka Pathian, nangmah toi ah kaa dor, a ka dawitu vialte hna sin in ka khamh law ka chanh tuah. 2 Cutin a si lo ah cun chiandeih bang an ka thlehbauh dih cang lai hih, chanhtu ngei lo in an ka kalpi cang lai hih. 3 Bawipa ka Pathian, hihi keimah nih ka rak tuah mi a si ahcun: ka kut cu dinlonak in a rak thur a si ahcun, 4 ka hawi kha rawiphiarnak in ka rak cham a si ahcun, asilole, a ruang loin a ka tutu kha ka rak zuah a si ahcun, 5 ka ral nih ka dawi sehlaw ka tlai seh, ka nunnak cu vawlei ah lamchih sehlaw ka ruhkhua cu leidip ah lamhchih hna seh.6 Bawipa, na thinhun in tho, ka ral hna puarthaunak daihter awk ah tho tuah. Ka Pathian, i hlau tuah, biaceihnak na tuah caan a phan cang. 7 Miphun hna cu na velchum ah i pum hna seh; cunglei in biaceihnak cu tuah cang hna. (Bawipa nih miphun hna cu bia a ceih hna.) 8 Bawipa, ka dinfelnak le ka thatnak he aa tlak ning in bia ka ceih ko. 9 Dingthlu Pathian, nangmah cu mi lungthin le ruahnak a hngal mi na si bang michia hna i an chiatnak cu donghter hna law miding cu hnangam tein umter ko hna.10 Pathian cu a ka huppheng mi phaw a si i milungthiang cu a khamh hna.11 Pathian cu a ding mi biaceihtu a si, a thin a fual, sihmanhsehlaw sual aa ngaihchih lo mi hna caah zungzal tihnung Pathian a si.12 Ral nih a vainam cu i tat seh, a likuk he timhcia in um seh; 13 sihmanhsehlaw amah thihnak lila ca hriam kha timhcia in a chiah a si i a fei cu mei ah a sawh a si; 14 amah cu, zoh hmanh, chiatnak kha a pawi, huatnak kha a zawi i rawiphiarnak kha a hrin.15 Rap kha a chiah i a bawh ko, sihmanhsehlaw a chiah mi rap lila nih amah kha a foih. 16 A lungthin tha lonak nih amah cu a foih, a ziachiatnak cu amah lu cung lila ah a tla.17 A khamh-dinnak caah Bawipa cu ka lawmh. Cungnungbik Bawipa min cu hla in ka thangthat.