ATHI DENG MANGMI CAAH THLACAMNAK

T. Bawipa daihnak cu nan sinah um zungzal ko seh.

K. Nangmah sin zongah um ko seh.

( Ti thiang theh lio ah )

T. Hi ti thiang nih a thihnak le a thawh`hannak in a kan tlanhtu Kri chung i kan tipilnak kha kan ruahter `han ko seh.

T. Ka hawi dawt hna, kan lakah a um mi kan Bawipa Jesu Kri min in hika ah kan i pum. Thawng`habia nih a kan chimh, mizaw cu damnak hmuh awkah a sinah an ra; cu lawng si loin anih nih kannih kha a kan dawt tuk hringhran caah kan caah a thi. Lamkaltu James thawngin a kan fial: “Nannih lakah a zaw mi an um maw? Bupi tlangbawi kha au hna sehlaw Bawipa min in chiti thuh hna seh; zumhnak thlacamnak nih mizaw kha a khamh hna lai i, Bawipa nih a thawhter hna lai; annih nih sualnak an tuah ahcun, sualnak in ngaihthiam an si lai.”

Cu asicaah a damlo mi kan hawi N... hi Bawipa nih a khamh i a thawhternak hnga caah Kri velngeihnak le `hawnnak cungah ap u sih.

( Sualphuan thlacamnak tuah awk )

Baibal Relnak

Voikhatnak Baibal (James. 5:13-16)

Nan lakah harnak a tong mi a um ahcun, thlacam seh; lung aa lawm mi a um ahcun, Psalm hla sa ko seh. A zaw mi a um ahcun Krifa upa kha au hna sehlaw thla campiak hna sehlaw, Bawipa min in chiti kha thuh hna seh. Zumhnak in thla an camnak nih khan a zaw mi kha a damter lai. Bawipa nih damnak kha a pek `han lai i, sualnak a tuah mi kha ngaihthiam a si lai. Cucaah nan sualnak kha pakhat le pakhat i phuang u law pakhat le pakhat thla i campiak u. Cuti nan tuah ahcun damnak nan hmuh lai. “Mi `ha mi thlacamnak cu hmual ngei ngai in rian a `uan.”

T. Mahhi Pathian bia a si.

K. Pathian cungah lawmhnak um ko seh.

Psalm Hla Chawnhlehnak

R. Kan mit cu Bawipa kha a zoh, a zangfahnak hal in.

1. Bawipa, kan mit nih vancung i a um mi nangmah kha an zoh ko; sal hna an mit nih an Bawile kut kha a zoh hna bang khan.

2. Sal hna an mit cu an bawinu kut kha a zoh bangin,

kan mit cu Bawipa, kan Pathian kha a zoh ko,

a zangfahnak a kan hmuhsak hlantiang. R/

Alleluia (Mt. 11:28)

Nannih rethei mi le thilrit mi hna, ka sinah ra tuah u, dinhnak kan pek hna lai, tiah Bawipa nih a ti.

Thawng`habia (Mt. 11:25-30)

Khi caan ah khan Jesu nih aa thawh i, “Ka Pa, van le vawlei a uktu, cathiam mi hna le a fim mi hna sinin na thuh mi kha ngakchia men hna sinah na langhter caah nangmah kha kan lawmh. A si, ka Pa, cucu nangmah nih siseh ti na duh ningte a si. Ka Pa nih zeizong vialte kha a ka pek dih. Pa dah ti lo cu ahohmanh nih Fapa kha an hngal lo i, Fapa le Fapa nih an sinah a phuan mi hna dah ti lo nih cun ahohmanh nih Pa kha an hngal lo. Nannih rethei mi le thilrit mi vialte hna, ka sinah ra tuah u. Dinhnak kan pek hna lai. Ka hreng kha i lak u law ka sinin cawng tuah u, zeitintiah kei cu nunnem le lung toidor mi ka si i, nan thlarau caah dinhnak kha nan hmuh lai. A si, ka hreng cu a fawi i ka thil cu a zaang,” tiah a ti.

T. Bawipa thawng`habia a si.

K. Kri, na cungah thang`hatnak um ko seh.

Litani

T. Ka u le ka nau hna, kan hawi N... caah Pathian sinah thalcamnak in nawl u sih.

T. Ra law hi chiti thiang thuhnak thawngin thazang run pe ko tuah: Bawipa, run kan zangfah ko tuah.

K. Bawipa, run kan zangfah ko tuah.

T. ~hatlonak vialte in rak luatter ko: Bawipa, run kan zangfah ko tuah.

K. Bawipa, run kan zangfah ko tuah.

T. A zaw mi (vialte) hi a temhinnak in rak damter ko: Bawipa, run kan zangfah ko tuah.

K. Bawipa, run kan zangfah ko tuah.

T. Mizaw a zohkhenhtu hna kha run bawm ko hna:

Bawipa, run kan zangfah ko tuah.

K. Bawipa, run kan zangfah ko tuah.

T. Na min in a cungah kan kut kan chuan mi kan hawi N... sinah nunnak le damnak run pe ko:

Bawipa, run kan zangfah ko tuah.

K. Bawipa, run kan zangfah ko tuah.

Kut Chuannak ( Daite in a kut a chuan.)

Chiti Cung Thlacamnak

T. A liangngan mi kan Pa Pathian, na cungah thang-`hatnak um ko seh.

Na Fapa kha kan lakah um awk le khamhnak pek awkah na rak thlah.

K. Kri chungah a kan damtertu Pathian cungah thluachuah vanluhnak um ko seh.

T. Pathian Fapa ngeihchunh, na cungah thang`hatnak um ko seh.

Kan minung sinak kha hrawm awkah naa niamter i, kan `iatlonak kha na damter.

K. Kri chungah a kan damtertu Pathian cungah thluachuah vanluhnak um ko seh.

T. Hnemtu, Thiang Thlarau Pathian cungah thang-`hatnak um ko seh. Kan derthawmnak ah na `hawnnak nih thazang a kan pek.

K. Kri chungah a kan damtertu Pathian cungah thluachuah vanluhnak um ko seh.

T. Zangfahnak he a tling mi Bawipa kan Pathian, Bupi nih hi chiti thiang in a thuh mi na sal N. i a temhinnak kha rak zaanter law a derthawmnak ah hnangamnak run pe ko, tiah kan Bawipa Kri min in kanin hal.

K. Amen.

Chiti Thuhnak

(A cal ah a thuh hmasa)

T. Hi chiti thiang thuhnak thawngin Bawipa nih a dawtnak le zangfahnak in Thiang Thlarau vel in in bawm ko seh.

K. Amen.

(Cun a kut ah a thuh.)

T. Sualnak in an luattertu Bawipa nih in khamh sehlaw in tho ko seh.

K. Amen.

Chiti Thuh Hnu Thlacamnak

T. Thlacam u sih.

Vancung i a um mi kan Pa, hi chiti thiang thuhnak thawngin N,. hi a temhinnak ah hin hnangamnak run pe ko. A `ih a phan tikah ral`hatnak run pe ko, fahnak a in tikah in khawhnak run pe ko, a lung a dongh tikah ruahchannak run pe ko law amah lawng a si tikah na miphun thiang hna nih rak bawm ko hna seh, tiah kan Bawipa Kri min in kanin hal.

K. Amen.

Bawipa Thlacamnak

Vancung a um kan Pa, . . . .

(Mizaw kha Bawipa thisa pek a si lo ahcun thluachuah peknak in donghter ding a si.)