Fimnak 10

III: TUANBIA AH RIAN A ṬUAN MI FIMNAK

Adam in Moses tiang

10 1Rak ser hmasa mi mipa, leicung pa, amahte lawng rak ser mi a rak hupphengtu cu Fimnak a si; a tluk tikah a rak chanh i, 2zeizongte a kut tang chiah awkah thazaang a rak pek.  3Sihmanhsehlaw, thinhung in michiapa nih a kaltak tikah amah cu unau thahnawnnak ah a rawk ko.

4 Amah ruang ah vawlei cu ti nih a phum tikah a rak khamhtu cu Fimnak a si ṭhan, santlai lo thingluang cung in miding nih a chuahpi hna. 5 Cun ṭhat lonak ah an tluk ṭhan i miphun hna cu rem lonak a um tikah sualnak in a luatter mi, miding pakhat kha a thim ṭhan, cun amah kha a fapa tiang zaangfah lo ding in ralṭhatnak a pek. 6Khualipi panga cung a sur mi mei in a zaam tikah pathian hngal lo hna cu an rawk dih, kha midingpa a rak khamhtu cu amah hi a si. 7 Cucu an nun ning ṭhat lonak i tehte a si, zaangfah awk tlak an ram cu a khu rih ko, cuka ah cun thingkung hna nih a hmin bal lo mi thingthei an tlai, zum lotu thlarau i philh lonak lungbunh ca ah cite tlang cu a dir rih ko. 8Zei cah tiah Fimnak lam kha zei ah an rel lo ruang ah, thilṭha hngalhnak an sungh lawng si lo in, leicung cu an hruhnak lungbunh an roh, cucu an sualnak cu a loh bal nakhnga lo ca ah a si.

9 Sihmanhsehlaw Fimnak nih a salle hna cu ṭihnung an harsatnak in a khamh hna. 10A upa thinhunnak in a zaam mi midingpa cu lam ding in a hruai. Amah kha Pathian pennak a hmuhsak i a thiang mi thil hna hngalhnak kha a cawnpiak. A rianṭuannak ah hlawhtlinnak a pek i aa zuamnak ca ah ṭuanman tling tein a pek; 11Midang chuh hmang le hrem hmang kut in a dirkamh i rumnak a pek. 12A ral hna kut in a humhim i amah ca ah an chiah mi rap in a khamh.  Har ngai in aa zuam caah laksawng a pek, cucu thiannak cu zeizongte nakin a ṭhawng deuh ti kha a cawnpiak duh caah a si.

13Miding pa kha a tar tikah kaltak lo in sualnak chung in a chuahpi; 14khor tiang a va ṭum ve i an hrennak tikah a kaltak lo; cucu pennak nawlngeihnak a pek hlan lo le nawlngeihnak a duh tuk mi a bawi hna cung nawlngeihnak a pek hlan lo tiang a si; cuti cun a amah sual a rak puhtu hna kha an hrokhrolnak a phozar hna i a hmun mi upatnak kha a pek.  

Exodus

15 Miphun thiang, dotla mi miphun kha a hremtu hna miphun kut  in a rak chuahtu cu Fimnak a si. 16 Bawipa sal thlarau chung ah lut in ṭihnung siangpahrang hna kha hmelchunhnak le khuaruahharnak he a derh hna. 17Miphun thiang kha an ṭuanman cu a pek hna; khuaruahhar lam in a hruai hna; amah hrimhrim kha chun ah an i dornak a si i zan cu an arfi ceu a si. 18 Rili sen kha a tanpi hna i ti thukpi lak ah a hruai hna, 19cu lio ah an ral cu ti chung ah a phum hna, cu hnu ah tithukpi chung in a chak ṭhan hna. 20 Cucaah miding nih Pathian hngal lo cu a ramh; Bawipa, na min thiang cu an hlorh i aw khat tein na huhphenhnak kut cu an thangṭhat; 21zei cah tiah Fimnak nih cun a aa mi kaa kha a hunpiak i ngakchia hna kha biachim thiamnak a pek hna.