SALM 31:1-24

Hneksaknak in caan thlacamnak

31. 1 Bawipa, nangmah toi ah kaa dor, ningzah mualphohnak in ka khamh ko; na khamh-dinnak thawng in ka chanh law ka khamh ko, 2 khulrang in ka thlacamnak cu ngai ko. Keimah khamh awk ah a fek mi lungpi, ralhau-kulh khuapi, si hram ko. 3 Nangmah cu ka lungpi le ka ralhruang na si; na min upatnak caah ka hruai law ka veng ko. 4 Ka ca i an zaam mi sur in ka chuah ko tuah, zeicahtiah nang cu kaa dornak na si; 5 na kut ah ka thlarau cu kan chanh, nangmah thawng in tlanhnak ka rak hmuh. 6 Biatak Pathian, nang nih cun santlailo milem a biatu hna kha na huat hna, sihmanhsehlaw Bawipa, kaa hngatchan mi cu nangmah a si: 7 A fek mi na dawtnak ah kaa lawm lai i kaa nuam lai. Ka rak tuarnak cu na hmu i ka thlarau ngaihchiatnak cu na hngalh, 8 ka ral hna kut ah na ka chan lo i zalen tein tlonlennak nawl na rak ka pek. 9 Bawipa, harnak ka tong i ka zaangfah ko. Ka temhtuar tuk ah ka mit cu an maw i ka ruhkhua hna zong an fak dih cang. 10 Zeicahtiah ka nunnak cu ngaihchiatnak le ka chan cu `ah-aihramnak in an dih cang. Ka nganfah ah ka tha a dih i ka ruh cu an tlong dih cang.11 Ka ral nih nichuak capo in an ka saih, ka innpa hna ca ah fihnung ka si, ka hawi hna ca ah luakchuak le `ihnung ka si, cun mi nih zalamtlang ah an ka hmuh tik ah an ka lektak.12 Kei cu miruak le thiltlau bang an lung ah ka um ti lo.13 Ka theih mi bia cu thangchiatnak lawngte, ― kaa mernak poh ah thlalaunak―zeicahtiah keimah thah ding ah a thli tein rian an `uan i ka nunnak lak ding ah khua an khan.14 Sihmanhsehlaw kaa bochannak cu nangmah na si, maw Bawipa; keimah nih, ‘Nangmah cu ka Pathian na si,’kan ti, 15 ka nunnak cu a caan kip ah nangmah kut ah a um, a ka dawi mi ka ral hna kut in ka chanh tuah; 16 na hmai cu na sal cung ah tlaang sehlaw a fek mi na dawtnak in ka khamh tuah.

17 Bawipa, nangmah sin ah ka au, cucaah hmaichiatnak cu keimah cung ah si lo in mi`halo hna cung ah tlung ko seh. 18 Annih cu lihchim hmang an hmur cipbu in, dai tein, mithi khua ah `um hna seh; annih nih miding kha ninghngal ngai in ruamkainak le zawmhtaihnak he an rak doh hna.19 Bawipa, nangmah an `ih mi hna ca na khon mi thil`ha le nangmah tang aa dor mi hna ca na tuah mi thil`ha hna cu zei tluk in dah an tam. 20 Mi rawiphiarnak in na luatter hna i na umnak ah him tein na chiah hna, thangchiat hmang hmurka in luatter awk ah na thlam chung ah na thuh hna. 21 Ka ca ah a fek mi dawtnak khuaruahhar (hruang-kulh khualipi chung ah) a tuah mi Bawipa cu thang`hat si ko seh! 22 Ka thin phang in, ‘Na umnak in an ka chuah cang!’ ka ti. Asinain nangmah sin ah ka au tik ah kan nawlnak cu na theih. 23 Nannih zumtu vialte hna, Bawipa cu daw tuah u: Bawipa nih amah a zum mi a salle hna cu a huhphenh hna, sihmanhsehlaw mipuarthau cu a let in lehrul a cham hna. 24 Bawipa aa bochan mi vialte nan ral`ha seh law nan lung dong hlah seh.