SALM 42:1-11

Saltaang Levimi hram thawng

42. 1 Sakhi nih rialti dai a hlam bang nangmah cu kan hlam, ka Pathian 2 Pathian, a nung mi Pathian cu tihal in kan hal, zeitik ah dah Pathian hmai hmuh ding ah ka kal khawh lai? 3 Chunzan hlan in rawl ei lo in mitthli he kaa ciah, chun nitlak in, ‘Khuazei ah dah na Pathian a um?’ tiin an ka serhsat. 4 Lung kekkuai in ka um tik ah, puai caan hna lawmhnak le thang`hatnak au thawng he Cungnung Bik inn ka rak luh tawnnak, Pathian inn ah ka rak kal tawnnak cu ka lung ah an hung chuak. 5 Maw ka nunnak, zeicahdah na lung a dongh, zeiruangah dah `ah aihram in na um? 6 Pathian i bochan! amah cu, ka Pathian le ka Khamhtu a si caah, ka thang`hat rih lai.

Ka lung a dongh tik ah nangmah cu kan ruat: Jordan le Hermon ram, Mizar tlang hna in, nangmah cu kan ruat. 7 Tithukpi nih tithukpi cu tisorpi hrum thawng in a auh, na tilet a tho mi nih an ka khuh dih cang. 8 Pathian nih a fek mi a dawtnak cu chun ah a run thlah; zaan caan ah a ka chimh mi hla sak cu ka Pathian nung sin i ka thlacamnak a si. 9 Ka lungpi, ka Pathian, sin ah cun, ‘Zeiruangah dah na ka philh? Ka ral hna nih hnahnawhnak pek in zeiruangah dah ngaihchia in ka vah lai?’ ka ti lai.10 Ka ruhkhua hna kiak dih hnik tiang in ka ral nih an ka serhsat, ‘Khuazei ah dah na Pathian cu a um?’ tiah chunnitlak in,‘an ka ti. 11 Hi lungdonghnak vialte le `ah-aihramnak vialte hi zei an si? Pathian i bochan! Ka Pathian le ka Khamhtu, amah cu ka thang`hat rih lai.