SALM 56:1-13

Pathian i bochan

56 1 Pathian, hnahnawhnak an ka pek, chunnitlak an ka tukchih tik ah ka zaangfah ko. 2 Hnahnawhnak a ka pe mi hna nih chunnitlak in an ka bawh, tlangsang hna in a ka tutu hna cu relcawklo an si. 3 Ka `ih tik ah nangmah cu kan bochan, 4 a bia ka thang`hat mi Pathian cu kaa bochan; Pathian kaa bochan i `ihnak ka ngei lo, mihring minung nih hin ka cung ah zei dah a tuah khawh? 5 Chunnitlak in ka bia cu an ngiat, keimah harnak pek ding lawng hi an ruah mi a si, 6 hmunkhat ah an i pum, ka nunnak lak ding aa tim mi bang, an ka bawh i ka cawlcanghnak vialte cu an ngiat dih.

7 Hi sualnak ruangah hin annih cu hlaw ko hna, na thinhun in, Pathian, miphun hna cu deng ko hna. 8 Nangmah hrimhrim nih ka ngaihchiatnak cu na rel dih cang hna, ka mitthli cu na tithawl chung na khon hna. 9 Nangmah kan auh ni ah cun ka ral cu hnu ah an tawn te lai. 10 Pathian cu keimah lei ah a `ang ko ti cu ka hngalh, amah cu a bia ka thang`hat mi Pathian, a bia ka thang`hat mi Bawipa a si. 11 Pathian kaa bochan i zei hmanh ka `ih lo, mihring minung nih hin ka cung ah zei dah a tuah khawh lai? 12 Pathian, ka rak tuah mi biakamnak cu ka tlinter hrimhrim lai, na cung ka ngeih mi lawmhnak leiba cu kan cham lai, 13 zeicahtiah nang nih ka nunnak cu thihnak in na rak ka khamh cang, cucu a nung mi hna ceunak, Pathian hmai i tlonlen awk ah a si.