BARUCH 2

2 Cucaah Bawipa nih kan cung, Israel a uk mi kan biaceihtu hna cung, cun kan siangpahrang le hruaitu hna le Judah le Israelmi hna cung ah a tuah mi biaceihnak cu a tlinter cang. 2Jerusalem i a tuah mi thil tluk a ngan mi hi vanrangtoi khua zei hmanh ah a um bal lo – cucu Moses Phungbia ah aa ṭial ningte a si; 3kannih kan dirhmun cu kan fanu le kan fapale hna sa ei tiang a ṭhumh dih. 4Cu pin ah a kan kulh mi kan innpa hna pennak kut ah a chanh dih cang hna, cucu kannih cu a kan ṭheknak, innpa miphun hna lak ah serhsat mi le chiatserh mi si awkah a si. 5Bawipa kan Pathian bia kha kan ngai lo i a cung ah kan sual cang caah cuka ah cun bawi si lo in sal kan va si cang ai!

6 Khamh-dinnak cu Bawipa ta a si i kannih le kan pupa hna tu cu nihin kan tuar bang in ningzahnak mithmai lawng hi a si ko. 7Bawipa nih a kan chim hnawh mi harsatnak vialte cu kan cung ah a tlung cang. 8Nain kan lungthin ṭha lo nih a kan chimh mi cu hlaw in Bawipa mithmai ṭha hmuh kan i zuam rih lo, 9cucaah Bawipa nih kan tuahsernak ṭha lo cu a rak hmuhziar ko hna i rawhralnak cu kan cung ah a tlunter; zei tin tiah Bawipa cu tuah ding nawl a kan pek mi kip ah a dik i 10kannih cu Bawipa nih a rak kan chiahpiak mi a nawlbia hna zulh awkah a aw cu kan rak ngai ti lo.

Thlacamnak

11Atu cu, nihin i na co bang in minthannak hmuh awkah na mi cu Izip ram in na ban ṭhawnnak he, khuaruahharnak le hmelchunhnak hna he, na lianngannak le na kut samh in a rak chuahtu, maw Israel Pathian Bawipa, 12 kannih cu kan sual cang, a thiang mi thil kha kan buar cang hna; Bawipa kan Pathian, na phunglam vialte kan buar cang hna. 13Kannih cu na kan ṭhekdarhnak miphun hna lak ah chimtlak lote lawng kan taan cang caah na thin cu ṭhum cang ko sawh. 14Bawipa, kan thlacamnak le kan in nawlnak cu ngai ko; na min ṭhatnak ca ah kan chanh law na rak kan ṭhekdarhnak miphun hna i mithmai ṭha hmu hram usih, 15cuti cun vawleipi nih nangmah cu Bawipa kan Pathian na si kha an hngalh lai, zei tin tiah Isreal le a tefa hna cu na min a pu mi an si. 16Maw Bawipa, na umnak na hmunthiang in kan zoh law kan ruat ko, na hna tung law kan ngai ko. 17 Bawipa, na mit au law zoh ko; an pum in an thaw an lak cang mi, Mithi khua mithi hna cu hi na sunparnak le aa tlak mi conglawmhnak an pe ding hna an si lo; 18 fahnak in a khat mi hna, lukun le tha dih, mitmaw le rawlṭam in a vak mi hna hi, Bawipa, nangmah kha sunparnak le aa tlak mi conglawmhnak an pe ding an si.

19Bawipa kan Pathian, nangmah sin ah toidor tein nawlnak tuah awkah kan pupa hna le kan siangpahrang hna i ṭhatnak cu kan i bochan lo. 20Na sal profet hna sin in na rak kan tlerh cang bang in na thinhunnak le na thinlinhnak cu kan cung ah na tlunter cang, 21 cucu annih nih, ‘Bawipa Pathian nih hihi a chim:  Nan hngawng cu kun ulaw Babilon siangpahrang cu rian u, cuti cun nan pupa ka pek mi hna ram ah cun nan hmun lai. 22Sihmanhsehlaw Bawipa aw kha nan ngaih lo i Babilon siangpahrang nan rianh lo ahcun 23Judah khuapi hna le Jerusalem zalamtlang hna i lawmhnak authawng, nuamhnak le monu le nupiṭhi tlangval i aw hna cu ka daihter hna lai i ram pumpi cu aho hmanh an um lonak thetse ram ah ka canter lai an rak ti bang khan a si.  24Sihmanselaw na aw cu kan ngai lo i Babilon siangpahrang cu kan rian lo, cucaah na sal profet hna sin in na rak kan tlerhkhonh a si mi: kan siangpahrang hna le kan pupa hna ruh cu an i dinhnak hmun in hnuk in leng ah an hlonh hna lai ti mi cu na tuah taktak ko. 25Annih cu chun nilin lak le zanṭim hawhra lak ah an hnuh  hna i an chuah hna. Cun mi cu mangṭaam, vainam le rai ṭha lo in le ṭihnung nganfahnak in an thi. 26Cuti cun Israel Chung le Judah Chung ṭhat lonak ruang ah na min a pu mi hi Chung cu nihin ni i a dirhmun bang in na tuah ko.

27Sihmanhsehlaw Bawipa kan Pathian, na dawtnak le chim cawk lo na zaangfahnak he aa tlak in na kan tuah cang; 28cucu na sal Moses kha Isrealmi hna hmaika ah na Phungbia ṭial ding in na rak chimh ni ah na rak kamh bang in a si ko, 29cun na rak ti mi cu, “Ka aw kha nan ngaih lo a si ahcun hi relcawk lo milianngan miphun cu ka ṭhekdarh hna nakding miphun hna lak ah mitlawmte ah ka ṭhumh hna lai –30zei cah tiah, milungkhawng an si bang in ka bia an ngai te lai lo ti cu ka rak hngalhcia cang. Sihmanhsehlaw sal an tannak ram ah khan an lung a fim te lai, 31 cun keimah cu Bawipa an Pathian ka si kha an cohlan te lai. Bia a ngai mi lungthin le bia a ngai mi hnakhaw kha ka pek hna lai, 32cun sal an taannak ram ah keimah thangṭhatnak hla cu an sak lai, ka min cu an philh lai lo, 33lungkhawn an ngol lai, Bawipa hmai ah a sual mi an pupa hna cung ah zei dah a rak cang ti kha a theih lai i thil ṭha lo an tuahnak in an i mer lai. 34 Cun, an pupa hna a si mi Abraham, Isaac le Jacob hna sin ah chiatserh in bia ka rak kamh mi ram ah ka kirpi ṭhan hna lai i cuka ah cun bawi ka ṭuanter hna lai. An milu ka ṭhanter lai, an zor ṭhan ti lai lo.  35 Cun anmah he a hmunmi biakamnak ka ser lai; cuti cun kei cu an Pathian ka si lai i annih cu ka mi an si lai. Cun ka mi Israel cu ka rak pek mi hna ram in ka ṭhawl bal ti hna lai lo.