Tobit 14

Tobit 14:11-15

 XIII: NINEVEH

Tobit hla a donghnak.

1 Tobit cu kum zakhat le kum hleihnih a si ah a thi i Nineveh ah upatnak he an vui. 2A mit a muih ah khan kumsawmruk le kumhnih a si; cun damnak a hmuh hnu ah hnangam tein khua a sa, misifak kha a bawmhchanh hna, Pathian kha dong lo in a thangṭhat i a lianngannak cu a hlorh.  3A thih deng tikah a fapa Toibias kha a auh i hiti hin a cawnpiak, 4’Ka fapa, na fale hna cu la hna law Media ah i hnawh, zei tin tiah Nineveh kong ah profet Nahum sin in Pathian nih a chim mi bia cu ka zumh ko. Zeizongte cu a tling dih lai, Israel profet hna, Pathian thlah mi hna, nih Syria le Nineveh kong an chim chung mi vialte cu a tling dih; an bia cu pakhat hmanh a lak a si lai lo. A caan a phanh tikah an cang ko lai. Assyria le Babilon chung nakin Media ah na him deuh lai. Zei tin tiah keimahleikap in ka hngalh i ka zumh mi cu Pathian nih a chim mi vialte cu a tling dih te ko lai; cun a si taktak ko lai, cun Profet bia cu pakhat te hmanh a tlolh lai lo.

‘Israel ram i kan unau hna cu milurelnak an tuah hna lai i an ram ṭha in lamhlapi ah ṭhawl an si dih te lai. Israel ram cu a ningpi in thetse ah a cang te lai, cun Jerusalem le Samaria cu thetse ram ah an cang ve te lai, cun Pathian inn cu, caan tlawmpal ca ah an hrawh lai i an khangh te lai. 5 Cu hnu ah Pathian nih a zaangfah ṭhan hna lai i a rak kirpi ṭhan te hna lai. A inn cu, hmasa tluk in aa dawh lai lo nain, a caan a tlin hlan tiang an sak ṭhan te lai. Cun hi vialte a dih tikah, an saltannak in an rak kir dih hna lai i Jerusalem a sunparnak cu tling tein an remh ṭhan lai, cun Pathian inn cu a sunparnak vialte he amah chung i Israel profet hna nih an rak chim chung cang bang in an sak ṭhan te lai. 6 Cun vawleimi vialte cu an lung i thleng in Pathian sin ah an i mer lai i amah kha lungtling tein an upat te lai. Annih kha palhnak ah a rak hruai mi, an siasal cu an hlawt hna lai i chan hna i Pathian cu dinfelnak he an thangṭhat lai. 7 Kha hna caan lio ah an zuah mi Israelmi hna cu lungthin tak in Pathian kha an i tlaihpeng cang lai. An ra lai i Jerusalem ah an i pum lai i cu hnu ah cun  anmah ta a si ding mi Abraham vawlei ah him tein khua an sa lai. Pathian kha lungthiang tein a daw mi hna cu an i lawm lai. Sualnak le ṭhat lonak a tuah mi vialte cu hi vawlei in an lo dih lai.

8 Ka fa, atu ah hi ṭuanvo hi kan pek:  Pathian kha lungthin thiang tein rian, cun a lungton i zuam.  Dingfel tein ṭhutdir ding, pekṭhenhnak tuah ding, an lung ah Pathian riahter i a min kha zungzal, lungthin thiang tein le an thazaang dihlak in thangṭhat ding ṭuanvo cu na fale hna liang ah na khinh hna lai.  

9 Cucaah ka fapa, Nineveh in chuak, hika ah um hlah,. 10 Na nu kha ka pawngte ah na vui hnu, cu ni hrimhrim ah, zei tik a si hmanh ah kal, cun ṭhat lonak le rawiphiarnak nih zah hngal lo in a tei ka hmuhnak hi ram ah hin i thlai hlah.  Ka fapa, Nadab nih a cawmtu a pa-ei Ahikar cung a tuah mi thil cu ruat hmanh. Ahikar cu a nunbu in vawlei ah an luhter a si lo maw? Sihmanhsehlaw Pathian nih a ral cung ah thinhun in a tuah mi cu a chamter ko, zei tin tiah Ahikar cu niceu dawh ah a rak kir ṭhan, cu lio ah Nadab cu Ahikar nunnak a kawl caah dantat aa huah i zungzal khuamui ah a ṭum. A ṭha mi a tuahsernak ruang ah Ahikar cu a ca ah Nadab nih a chiah mi ṭihnung rap in a luat, cun Nadab tu a tla i a rawk. 11 Cucaah Ka fale hna, bawmhchanhnak i a theipar, chiatnak nih khua zei ah dah a hruai, ka chim duh mi cu, thihnak ah a hruai ti cu nan hmu ko lo maw. Sihmanhsehlaw atu cu ka thaw a dih cang.

A ihkhun ah an ihter ṭhan; cun a thi i upatnak in an vui. 12 A nu a thih tikah Tobias nih a pa pawngte ah a vui ve. Cun a nupi le a fale hna he Media ram ah an i thawh. Ecbatana ah an pu Raguel he khua an sa. 13A nupi i pitar le putar hna cu a ṭhat khawh chung in upatnak tling he a zohkhenh hna, cun a hnu ah, Media ram Ecbatana ah annih kha a vui ve hna. Tobias cu a pa Tobit ro hlei ah a pu Raguael ro zong kha a co chih. 14Upatnak co in kum zakhat le kum hleisarih tiang a nung.. 15A thih hlan ah Nineveh a rawh kha a hmuhta. Media siangpahrang Cyazares nih Nineveh khuami hna cu sal in a tlaih hna i Media ram ah a hruai hna kha a hmuh. Nineveh khuami hna le Asyria rammi hna cung ah a tlunter mi fahnak vialte ca ah Pathian cu a thangṭhat. A thih hlan ah Nineveh khua ah a cang mi cung ah lawmhnak caanṭha a hmu, cun Bawipa Pathian cu zungzal in zungzal tiang a thangṭhat. Amen.