SALM 35:1-28

Hrem caan ah miding thlacamnak

35. 1 Bawipa, sual a ka puhtu cu sual puh ve hna law a ka dohtu cu do ve hna. 2 Na ralthuam le na phaw cu i lak, tho law ka bawm tuah. 3 A ka dawitu hna kham awk ah na fei le na hreitlung cu tleu lak in taa hna, ‘Keimah cu na khamhtu ka si,’ tiin lungdaihnak ka pe ko.

4 Keimah thah awk ah a rak chuak mi hna cung ah ningzahnak le hmaichiatnak tlung ko seh! Ka tlaknak ca khua a khang mi hna cung ah sunghnak le `ihphannak tlung ko seh.

5 Annih cu thli lak i favai bang si hna seh law Bawipa vancungmi nih `hawl dih hna seh. 6 An lam cu mui seh law nal seh; Bawipa vancungmi nih `hih hna seh. 7 Zei hmanh ka ti hna lo nain rap an ka tunh; zei hmanh ka ti hna lo nain ka tlaknak ca khor an cawh; 8 Rinlopi in rawhralnak nih a tlunh hna; an tunh mi rap lila nih a foih te hna lai, cun an cawh mi khor lila ah an tla te lai.

9 Cun Bawipa ah kaa lawm lai i a ka khamh cang caah kaa nuam lai. 10 Ka ruhkhua hrimhrim hna nih nang cu an conglawmh lai, misifak cu a hremtu hna kut in le santlailo cu a chuhramhtu hna kut in na chanh hna, Bawipa, nangmah he tahchunh awk a ho a um ti?

11 Lih in tehte a khaan mi hna cu an tho i ka leh khawh lo mi bia cu an ka hal, 12 Kulhkalh in bia an ka hal, dawtnak cu tuahsernak `halo in an ka cham.

13 Sihmanhsehlaw, an zawt tik ah, buri i hruk in an ca ah ulhnak le sumnak ka tuah, lungthin thar he thla ka campiak hna, 14 unau le hawikom ca bang, lungsivang in ka um, a nu a `ah mi bang, ngaihchia lungkuai in thla ka cam.

15 Ka tluk tik ah diriam ngai in an rak i pum; ka rak hngalh bal lo mi khual hmanh nih ngol lo in an ka thlehbauh. 16 Ka tluk ahcun an hacang rial in an ka dum. 17 Bawipa, zeitik tiang dah hitihin na ka zoh sawh ko lai? An thahnawnnak in ka chanh tuah; chiandeih tumno hna sin in ka ngeihchunte ka nunnak cu chanh hram ko.

18 Mipi pumhnak pipi ah lawmhnak kan pek lai, mi an i tonnak kip ah kan thang`hat lai. 19 Lihchim hmang ka ral hna cu ka cung ah an diriam hna hlah seh; a ruanglo in a ka huatu hna cu lungawi in ka zoh hna hlah seh.

20 Annih cu daihnak a duh mi ram mi hna ca ah daihnak ca biachawnhnak an ngei lo; lihbia kha an `awnchom hna. 21 Sual puh duh ah an kaa an pau i keimah cu, ‘Atu rak chuak, kan in hmuh ko khah,’ an ka ti.

22 Bawipa, nangmah nih na hmuh mi a si ko, dai tein um sawh hlah; Bawipa, hlatpi ah um sawh hlah. 23 Keimah dirkamh awk le, ka Pathian le ka Bawipa, keimah lei `ang awk ah tho

tuah. 24 Bawipa ka Pathian, na khamh-dinnak thawng in keimah ca ah biaceihnak tuah ko, cun ka cung ah an di riamter hna hlah.

25 Annih kha, ‘Kan ruah bang an si ko,’ asiloah, ‘Atu cu kan dolh dih ko cang hna,’ ti mi khuaruahnak kha ngeihter hna hlah. 26 Ka vanchiatnak cung a di a riam mi vialte hna cung ah ningzahnak le mualphonak tlung ko seh. Keimah zuar in a karh a hmu mi vialte hna cung ah ningzahnak le hmaichiatnak tlung ko seh.

27 Sihmanhsehlaw ka dinnak ah a lung a rak hmui mi hna cu lunglawm thanuam in au hna seh; annih nih ngol lo in, ‘A sal hlawhtlinhnak a hmuh mi ah a lung a hmui mi Bawipa cu a lianhngan ko,’ ti hna seh.

28 Cun ka lei nih na khamh-dinnak cu a chim lai, na thang`hatnak cu ka chan chung hla in ka sak lai.