SALM 66:1-20

Hmunkhat in lawmhnak thlacamnak

66. 1 Vawlei dihlak, Pathian cu conglawmh tuah u, 2 a min sunparnak cu Salm hla in thang`hat tuah u, nan thang`hatnak in sunparnak pe tuah u, 3 Pathian sin ah cun, ‘Zei tluk khuaruahhar dah na si!’ ti tuah u. ‘Na hlawhtlinnak cu na huham i tahfung an si, na ral nih na mithmai`ha hmuh an duh. 4 Vawlei dihlak in na hmai ah an kun, Salm hla in an in thang`hat; Salm hla in na min cu an thang`hat. 5 Ra ulaw Pathian khuaruahharnak hna, Adam fale hna ca a tuah mi khuaruahharnak hna, cu hmu tuah u, 6 Rili cu leiro ah a thlen i tivapi cu an ke in an tan. 7 Cucaah a `hawnnak in zungzal a uk mi amah ah cun i lawm hna usih, amah a ral mi hna kha den hmasa hna awk ah miphun hna cu mit`hep lo in a zoh hna. 8 Miphun hna, kan Pathian cu conglawmh tuah u, amah thang`hatnak aw cu thangchin ko seh; 9 nunnak cu a kan pek `han i tlukrilhnak in a kan khamh.

10 Pathian, na kan hneksak i sui bang na kan thianh cang, 11 na rap ah tla ko usih; kan keng ah cun thil ritpi na chuan cang, mi cu kan cung ah kai ko hna seh; 12 sihmanhsehlaw atu mei le ti in na kan hneksaknak cu a dih cang, kan thaw kan chuah khawh nakhnga leng ah na kan chuah cang. 13 Na inn ah cun khangh thawinak ka rak put, na sin i ka biakamnak cu ka tlinter, 14 ka retheih caan ka hmurka nih a rak chim mi, ka lei nih a rak tuah mi biakamnak cu ka tlinter lai. 15 Tuukawng khangh mi khu he khangh thawinak tampi cu kan pekchanh lai. na sin ah cun cawtum le meheh hna in thawinak kan pekchanh lai. 16 Pathian a `ih mi vialte hna ra ulaw Pathian nih ka ca ah a tuah mi thil kong ka chim mi cu rak ngai tuah u. 17 A sin ah cun thangpi in ka au, amah cu thangpi in ka thang`hat, 18 lungchung sualthurnak rak ngei ning law Bawipa nih a rak ka ngaih hnga lo, 19 sihmanhsehlaw Pathian nih a ngaih, ka thlacamnak aw cu `ha tein a ngaih. 20 Ka thlacamnak a ngai i a fek mi a dawtnak a ka lakpiak lo mi Pathian cung ah thluachuah vanluhnak um ko seh!