SIRACH 17

17     1Bawipa nih minung phun cu vawlei in a ser i vawlei ah kir ṭhan a si. 2Ni tampi le caan tampi a pek hna i vawlei cung i thil vialte cung nawlngeihnak a pek hna. 3Amah bantuk in ṭhawnnak in a thuamh i amah muisam in a ser hna. 4Zei zongte cu minung ṭihnak in a khahter hna i saram le vate hna i bawi ah a chiah.  6Lei, mit le hna a serpiak hna i ruahnak lungthin kha a pek hna. 7Hngalhnak le thiamnak in a khahter hna i a ṭha le a chia kha a hmuhsak hna. 8A tuah mi thil lianngan hmuhsak awkah an lung chung ah amah ceunak kha a khumh hna, 10cuti cun a tuah mi thil lianngan kha hmu in a min kha an thangṭhat lai. 11Hngalhnak kha an hmai ah a chiahpiak hna i nunnak phunglam kha a pek hna.  12Anmah he zungzal thisen biakamnak kha a tuah i an sin ah a biaceih lairelnak cu a phuan. 13An mit nih a sunpar lianngannak kha a hmuh i an hna nih a aw sunglawi cu an theih. 14Annih kha, “Ṭhat lonak vialte in i ralring u,” a ti hna i an innpa he pehtlai in nawlbia kha a pek cio hna.

Khuazing biaceihnak

15An lamthluan cu Bawipa mit tang ah a um zungzal i an i thup kho lo.  17Miphunkip kha uktu a pek cio hna, sihmanhsehlaw Israel cu Bawipa i ta a si.

19An tuah mi vialte cu Bawipa hmai ah chunlaipi bang fiangpup in an lang i a zoh zungzal hna. 20An sual thurhnawmnak cu thuh khawh an si lo, an sualnak vialte cu Bawipa hmai ah a si dih ko. 22Pekṭhenhnak cu a kut i kutdonghrolh bantuk a si i mi pakhat i siannak cu a mit mu tluk in a zohthla. 23Ni nikhat cu a tho lai i lawmhman a pek te hna lai, an i tlak ning cio in an lu ah a burhhnawh te hna lai. 24Sihmanhsehlaw sual aa ngaihchih mi hna cu kirnak nawl a pek hna, cun a lung a dong mi kha ruahchannak a pek hna.  

18 Bawipa nih cun a fater Israel kha ṭha tein a zohkhenh i a dawtnak i khuaceu kha amah cu a pek. Bawipa nih amah kha a hlaw bal lo.

Sual ngaihthiamnak ca forhfialnak

25Bawipa sin ah rak kir ulaw nan sualnak cu chiata u, a hmai ah nawlnak tuah u law fahnak pe ti hlah u. 26Cungnung Bik sin  ah rak kir u law nan sualnak in i mer ulaw hruhnak vialte kha fih hna u. 27Kan nun lio ah sunparnak kan pek lo a si ahcun Mithi khua ah aho nih dah Cungnung Bik cu a thangṭhat lai?  28A thi mi hna cu a um lo mi hna bang thangṭhatnak an pe kho lo, nunnak le damnak a ngei mi lawng nih Bawipa cu an thangṭhat khawh. 29 Bawipa zaangfahnak cu zei tluk in dah a lianhngan, a ngaihthiamnak cu a sin a rak kir mi hna ca ah a si. 30 Zei zongte kan ngei kho lo, minung cu thih hmang kan si. 31Nika nakin zei dah a ceu deuh? sihmanhsehlaw a tla ko. Thisa cu chiatnak dah ti lo zei hmanh a ruat lo. 32Van sangpi ralkapbu kha a rel dih hna, cun kannih vialte cu leidip le vutcam men kan si ko.