Advent Zarhhnihnak Zarhpi(Year A)

Second Sunday of Advent (December 7, 2025 )

Lectionary: 4

Reading 1 Isaiah 11:1-10

1 Siangpahrang David ciruang hi haumi thingkung bantuk a si; chumhmui in nge thar an corh bantukin David tefa chungin siangpahrang thar pakhat a chuak lai. 2A mi kha a uk khawh hna nakhnga Bawipa ṭhawnnak nih amah cu fimnak le hngalhnak le thiamnak a pek lai. Bawipa duhnak kha zeidah a si ti a hngalh lai i Bawipa cu a ṭih lai.3 Cun Bawipa rian ṭuan kha aa lawmhnak a si lai. Leng lang men le mi chim chin bia men in bia a khiak lai lo; 4 Sifakmi kha an bia ṭha tein a ceihpiak hna lai i nauta pawl kha a ṭanh hna lai. Amah nawl pekning in ram cu dantat a si lai i mi ṭhalo cu an thi lai. 5A mi cu dinnak in a uk hna lai i an caah zumh awk tlakmi a si lai.6. Cenghngia le tuu kha hmunkhat ah dai tein an tlong ṭi lai i pawlai le mehehfa cu an bawk ṭi lai. Cawfa le chiandeih no kha rawl an ei ṭi lai i ngakchia tete nih khan an zohkhenh hna lai. 7.Caw le vom cu rawl an ei ṭi lai i an fale cu dai tein an bawk ṭi hna lai. Caw nih facang zi an ei bantukin chiandeih nih facang zi cu a ei ve lai. 8 Sivai ngeimi rul pawngah ngakchia nih lente an i celh hmanh ah harnak zeihmanh an tong lai lo. 9.Zion Tlang, Pathian tlang thiang chungah cun thil ṭihnung le thil ṭhalo zeihmanh a um lai lo. Rili cu ti in a khah bantukin hi ram cu Bawipa hngalhnak in a khat lai. 10.Siangpahrang David ciruang chungin a chuakmi siangpahrang thar cu miphun hna caah hmelchunhnak a si lai i cu a si lainak ni cu a phan lai. A siangpahrang khua chungah khan an i pum lai i upatnak an pek lai.

Responsorial Psalm   Psalm 72:1-2, 7-8, 12-13, 17(cf. 7)  

R.  A chan ah dinfelnak a leng lai, thlapa a tlaan chung poh daihnak a um lai.

1 Pathian, siangpahrang cu nangmah i a dik mi biaceihnak le siangpahrang fapa cu na khamh-dinnak he thuamh ko hna, 2 cuticun na mi cu dinnak le misifak hna cu a dik mi biaceihnak he a uk hna lai.R

7 A chan ah dinfelnak a leng lai, thlapa a tlaan chung poh daihnak a um lai. 8 A pennak cu rili khatlei ral in a dang khatlei ral tiang, tiva in vawlei deng tiang, a phan lai.R

      12 Zeicahtiah amah sin ah a au mi miharsa poh le bawmtu ngei lo misifak poh kha a chanh hna. 13 Santlailo le miharsa cu a zaangfah hna, cun miharsa cu thihnak in a khamh hna.R

17 A min cu zungzal in conglawmh siseh law nika hmai ah hmun hram seh. A min in vawleicung miphun kip cu thluachuah pek siseh, cun miphun vialte nih amah cu mithluachuak ti hna seh.R

Reading 2   Romans 15:4-9

Cathiang nih lungsaunak le lungthin ṭhawnnak a kan pekmi thawngin ruahchannak kha kan ngeih khawh nakhnga Cathiang chung i aa ṭialmi vialte cu kanmah cawnpiaknak caah a si.Khrih Jesuh lam hmuhsakmi nan zulhnak thawngin nannih lakah lungthin khahnak a um khawh nakhnga, lungsaunak le lungthin ṭhawnnak hram Pathian nih in bawm ko hna seh.Cuticun lungkhat tein kan Bawipa Jesuh Khrih i a Pa Pathian cu nan thangṭhat khawh lai.Khrih nih an cohlan hna bangin, Pathian nih sunparnak a hmuh nakhnga pakhat le pakhat i cohlang cio u.Ka chim duhmi cu hihi a si: Khrih kha Judah mi hna ṭuankan i a can cu, Pathian nih an pupa hna sinah a tuahmi biakamnak kha fehter a si nakhnga caah a si i cu nih cun Pathian nih a bia a let lo ti kha a langhter.Cu lawng si loin, Pathian cu mi cungah zaangfahnak a ngeih caah Jentail mi hna nih an thangṭhat lai ti duhnak a si fawn. Cucu Cathiang nih, "Jentail mi hna lak hmanh ah nangmah cu kan lawmh lai i Na min cu hla in ka thangṭhat lai," 

R. Alleluia, alleluia. Luke 3:4, 6

A kuarhnak hmun vialte kha rak chilh hna u law Tlang sang le fing bo kip kha rak rawnhter hna u; Lam aa ngerhmi kha rak dinter hna u, Lam bingbo vialte kha rak tlorhnalh hna u;Cun minung phun paohpaoh nih Pathian khamhnak kha an hmuh lai,' a ti," tiah aa ṭialmi kha a hung tling.

Gospel     Matthew 3:1-12

 Chimhchinnak zawn Baptisma petu Johan Phungchimnak

1, A caan a tlin tikah, Baptisma petu Johan cu a hung lang: Hi bia hi Judea ram thetse rawn ah khan a thanh. 2 A thanh mi cu, “Vancung pennak a naih cang caah nan sualnak i ngaihchih u,” ti a si. 3 Hihi profet Isaiah nih, “Thetse ram i a au mi aw pakhat nih, ‘Bawipa ca ah lam sialpiak u, a lam hna cu dinter u” ti in a rak chim mi pa kha a si. 4 Hi pa, Johan cu kalauk hmul in tah mi hnipuan kha aa hruk i a tai ah saphaw taisawm aa sawmh, a rawl cu khaubok le khuaihliti a si. 5 Cun Jerusalem le Judea ram vialte le Jordan peng dihlak nih amah cu an fuh. 6 An sual an i phuang i Jordan tiva ah khan Baptisma a pek hna.

7 Sihmanhsehlaw Farasimi le Sadusimi tam nawn cu Baptisma hmuh awk i a sin an rat kha a hmuh hna tikah annih kha, “Nannih rulchia hna, a ra lai mi dantatnak in zaam awk ah aho nih dah ralrinnak an pek hna? 8 Sual ngaihchihnak in nan theipar langher u, 9 cun nanmah le nanmah kha, ‘Kan pa can ah Abraham kan ngei,’ ti sual lai u ci, zei ruang ah tiah Pathian nih cun hi lung hna hmanh hi Abraham fale ah a canter khawh ko hna. 10 Atu hmanh ah hreitlung cu thingkung hram ah chiah a si cang, cucu, theiṭha a tlai lo mi thingkung poh cu hau an si lai i mei ah paih an si lai. 11 Sual ngaihchihnak caah keimah nih ti in Baptisma kan pek hna, sihmanhsehlaw ka hnu in a ra mi pa cu keimah nakin a lianngan deuh, kei cu a kedan putpiak ding hmanh ah kaa tlak lo, amah nih cun Thiang Thlarau le mei in Baptismanak an pek hna lai. 12 Zahnak ding ṭalawn cu a kut ah a um ko; a phuhri cu a thianh lai i a fang cu buk ah a rawn hna lai; sihmanhsehlaw a hi cu a mit bal lo mi mei ah a khangh hna lai,” tiah a ti hna.