Holy Saturday Easter Vigil (Year A)

April 4 2026 (Year A)

Avoikhatnak Bible

Genesis 1:1-2:2 or 1:1, 26-21a

Sernak Kong

1A hramthawk ah, Pathian nih van le vawlei a ser hna tikah, * 2vawlei cu mui zong a ngei lo, pungsan zong a ngei lo. Rilipi cu muihnak nih a khuh i ti cungah cun Pathian ṭhawnnak * cu aa chawk. 3Cun Pathian nih, “Ceunak um seh,” tiah a ti i ceunak cu a hung um. * 4Ceunak cu a zoh i aa lawm. Cun ceunak le muihnak cu a ṭhen hna i 5ceunak cu “Chun” tiah min a sak i muihnak cu “Zan” tiah a ti. Zanlei cu a hung dih i zinglei kha a hung um — cucu ni khatnak ni cu a si.

6Cun Pathian nih cun, “Ti le ti a ṭhentu hna ding caah aa kuaimi van pakhat in um seh law, ti cu hmun hnih ah um hna seh,” tiah a ti i cu tining cun a hung si. * 7Cuticun Pathian nih cun van kuai cu a ser i a tang i a ummi ti le a cung i a ummi ti cu a ṭhen hna; 8van kuai cu a min ah “Van” a sak. Zanlei cu a hung dih i zinglei kha a hung um, cucu ni hnihnak ni cu a si.

9Cun Pathian nih cun, “Van tang i a ummi ti cu hmun khat ah i pum hna seh law vawlei kha hung lang seh,” tiah nawl a pek i cu bang cun a hung si. 10Vawlei cu a min ah “Vawlei” a sak i a pumhtermi ti cu “Rili” tiah a ti. A tuahmi kha a zoh i a lung a si. 11Cun aa thawh i, “Vawlei cungah hin thingram a phunphun kho hna seh, a tlaimi kung hna le rawl a phunphun thei a phunphun a vuimi rawlkung hna,” tiah a ti i cu bang cun a hung si. 12Cucaah cun vawlei cungah cun thingram a phunphun an kho, rawl a vuimi rawlkung hna le thei a tlaimi thingkung hna an si. Pathian nih a tuahmi cu a zoh i a lung a si. 13Zanlei cu a hung dih i zinglei kha a hung um, cucu ni thumnak ni cu a si.

14Cun Pathian nih cun, “Chun le zan a ṭhentu ding le ni le kum le caan kha zeitik in dah an i thawk cio ti hngalhtertu dingah van ah khin ceunak um hna seh; 15cun cu ceunak hna nih cun vawlei hi ceuh hna seh,” tiah a ti i cu bang cun a hung si. 16Cucaah Pathian nih cun ceunak ngan pipi pahnih hi a ser hna, ni hi chun uktu dingah a ser i thlapa hi zan uktu dingah a ser; arfi zong khi a ser hna; 17ceunak hna cu van ah khin vawlei a run ceuhtu dingah a chiah hna, 18chun le zan a uktu hna ding le ceunak le muihnak a ṭhentu hna dingah a chiah hna. A tuahmi kha a zoh i a lung a si. 19Zanlei cu a hung dih i zinglei kha a hung um, cucu ni linak ni kha a si.

20Cun Pathian nih cun aa thawh i, “Ti nih hin thilnung phun tampi a hrin hna lai i va hi thli lakah hin an zuang lai,” a ti i cu bang cun a hung si.” 21Cuticun Pathian nih cun rili chung i a ummi sahrang ṭihnung pipi le ti lak i a tlongmi thilnung a phunphun le va a phunphun kha a ser hna. A tuahmi kha a zoh i a lung a si. 22Cun thluachuah a pek hna i, “Ti chung i a ummi thilnung hi karh u law rili hi khat u, va hi tampi in karh u,” tiah a ti hna. 23Zanlei cu a dih i zinglei kha a hung um, cucu ni nganak ni a si.

24Cun Pathian nih cun, “Vawlei nih hin inn zuat saṭil a phunphun le ramlak saram a phunphun, a hme he a ngan he, hring hna seh,” a ti i cu bang cun a hung si. 25Cuticun inn zuat saṭil a phunphun le ramlak saram a phunphun a hme he a ngan he a ser hna. A tuahmi kha a zoh i a lung a si.

26Cun Pathian nih cun, “Atu cu minung kan ser cang hna lai; kanmah mui an keng lai i kanmah he kan i lo lai. Nga si hna seh, va si hna seh, inn zuat saṭil si hna seh, ramlak i a ummi saram a hme he a ngan he si hna seh, an uk dih hna lai,” tiah a ti. * 27Cuticun Pathian nih minung cu amah mui lo in a ser, minung cu Pathian mui in a ser hna. Mipa le minu kha a ser hna. * 28Thluachuahnak a pek hna i, “Tefa tampi in ngei u law nan tefa cu vawlei cung khuazakip ah khat hna seh, cun annih nih vawlei cu uk hna seh. Nannih cu nga cung le va cung le ramlak saram a hme he a ngan he an dihlak cung i nawlngeihnak kan pek hna,” a ti. * 29Nan ei awk caah thlai phun kip le thei phun kip kan pek hna; 30Sihmanhsehlaw ramsa vialte hna le va vialte hna le vawlei ah a lawn in a lawnmi vialte nunnak thaw a ngeimi vialte hna caah ram hring le thlaihnah borbor ka pek hna,” a ti i cu bang cun a hung si. 31Pathian nih a sermi thil vialte cu a zoh i a lung a si ngaingai. Zanlei cu a hung dih i zinglei kha a hung um, cucu ni ruknak ni cu a si.

2: 2Ni sarihnak ni ah Pathian nih a tuahmi thil vialte cu a lim hna i cu ni ah cun rian ṭuan loin a um.

Psalm 104:1-2, 5-6,10, 13-14, 24, 35 (30) or 32:4-7, 12-13, 20, 22 (5)

R/ Sihmanhsehlaw thaw na pek hna tikah an nung; vawlei cu nunnak thar na pek.

1Maw ka nunnak, Bawipa cu thangṭhat tuah! Bawipa ka Pathian, zeitluk in dah na lianhngan! Sunparnak le lianhngannak in naa thuam i 2ceunak in naa tuam. Van khi puan thlam bantukin na samh hna.

5Vawlei cu a umnak hmun ah khan fek tein na bunh i ahohmanh nih an ṭhial kho lo. 6Vawleicung cu rili in puan bangin na khuh i a tlang cu ti nih a khuh hna;

10Nelrawn ah cerh kha na putter hna i ti cu tlang le tlang karah an luang.

12An pawngkam thingkung cungah vate nih bu an i ser i hla an sa. 13Vancung khin tlang cungah ruah na run surter i vawlei cu na thluachuahnak in a khat. 14Saṭil caah ram na khohter, minung hman awk caah thing na khohter cucaah minung nih cun ti-rawl kha an cin khawh hna.

23Cun mi cu an rianṭuan awkah an chuak i zanlei tiang an ṭuan.

24 Bawipa, na sermi thil hi an tam hringhran ko! An dihlak in fimnak in na ser hna.Vawlei cu na sermi thil in a khat.

35Misual mi cu vawleicung hin hloh si hna seh, miṭhalo cu um ti hna hlah seh. Ka nunnak, Bawipa cu thangṭhat ko! Bawipa cu thangṭhat ko!

Avoihnihnak Bible

Genesis 22:1-18 or 22:1-2, 9a, 10-13, 15-18

Isak Thawinak

1Cu hnu tlawmpal ah cun Pathian nih Abraham kha a hneksak i, “Abraham,” tiah a ti i Abraham nih, “ Bawipa, na chimmi bia ka ngai ko,” tiah a leh. * 2Pathian nih cun a thawh i, “Na fapa, fapa pakhat lawngte na ngeihmi Isak na dawtmi kha i lak law Moriah ram ah va kal. Cuka ah cun kan hmuhsak laimi tlang cungah khangh thawinak ah na khangh lai,” a ti. *

3A thaizing cu zingka tein Abraham nih a laa kha a dan a danh i Isak le a sinum pahnih hna he tiah an kal. Thawinak ding caah cun thing tlawmpal a hlam i Bawipa nih a chimhmi hmun leiah khan kal aa thawh. 4A ni thum ni ah Abraham nih cun cu hmun cu lamhlatpi khin a hei hmuh. 5Cun a sinum pawl cu a thawh hna i, “Nannih cu hika ah hin rak um u. Khika ah khin Pathian va biak awkah ngakchiapa le keimah hi kan va kal lai i kan va biak dih in nan sinah kan ra kir ṭhan lai,” a ti.

6Cun Abraham nih khanghthawinak ca ding thing cu Isak kha a phorhter i amah nih mei le nam kha a put hna. Cuticun hmunkhat ah an pahnih cun an kal. 7Isak nih khan a pa cu, “Ka pa,” tiah a ti i a pa nih cun, “Hawi, ka fapa,” tiah a leh. Isak nih cun, “Mei le thing cu an um, sihmanhsehlaw khanghthawinak ca ding tuufa tah khuazei ah dah a si kun?” a ti. 8Abraham nih cun, “Pathian nih a khan te ko lai, ka fapa,” tiah a leh i cuticun an pahnih cun hmunkhat ah an kal lengmang.

9 Bawipa nih a chimhmi hmun kha an phak tikah, Abraham nih biakṭheng pakhat a ser i a cungah thing kha a chiah. A fapa cu a ṭem i biakṭheng cung thing cungah cun a chiah. * 10Cun ka thah lai tiah nam a vun i lak ah khin 11 Bawipa vancungmi nih vancung in a run auh i, “Abraham, Abraham!” tiah a ti. Abraham nih, “Asi, hika ah ka um ko,” tiah a leh. 12Vancungmi nih cun, “Ngakchiapa kha fahnak zeihmanh pe hlah, a cungah zeihmanh zong tuah fawn hlah. Fapa pakhat lawngte na ngeihmi hmanh pek sian loin na ka um lo caah Pathian nawl ngaih cu na duh ngaingai ti kha ka hngalh,” tiah a ti. 13Abraham cu khua a hei hoi i tuukawng pakhat burbuk lak i a ki in a rak taan ko kha a hmuh. A hei fuh i a va lak i a fapa can ah khanghthawinak ah cun a thawi. 14Abraham nih cu hmun cu, “ Bawipa nih a khaan ko,” tiah min a sak i atu chan tiang zongin mi nih, “ Bawipa tlang cungah cun Bawipa nih a khaan ko,” an ti tawn.

15 Bawipa vancungmi nih Abraham cu vancung in a voi hnihnak a run kawh ṭhan i, 16“Keimah nih keimah min hrimhrim in biakamnak ka ser lai — hihi Bawipa chimmi bia a si — fapa pakhat lawngte na ngeihmi kha pek sian loin na ka um lo caah thluachuah tam piin kan pek lai. * 17Van i arfi zat le rili kam i thetse zat khin tefa kan pek lai. Na tefa nih cun an ral kha an tei hna lai. * 18Cun vawlei cung miphun vialte nih, na tefa thluachuah ka pek hna bantuk hin thluachuah kan pe ve, tiah an ka nawl lai — hi vialte cu nangmah nih ka nawl na ngaih caah a si,” a ti. *

Psalm 16:5,8,9-10 (1)

R/ Maw Pathian, nangmah cu kan fuh ko, ka huppheng ko sawh.

5Nangmah dah ti lo cu ka ngeihmi dang zeihmanh a um lo, maw Bawipa, ka herhmi vialte cu nangmah nih na ka pek, ka nunnak cu na kut chungah a um.

8 Bawipa ka sinah a um cu ka hngalh zungzal, amah cu keimah he naihte ah a um i zeihmanh nih an ka hnin kho lo. *9Cucaah lawmhnak le thanuamnak in ka khat i him tein ka um zungzal. 10Cu ti ka si cu Mithi khua ah khan na ka kaltak lai lo le na dawtmi cu Khor Thuk chungah na ka chiahtak lai lo caah a si. *

Avoithumnak Bible

Exodus 14:15-15:1

15Bawipa nih Moses cu, “Zeicahdah na ka auh len ko? Israel mi kha hmaiah kal u, ti hna. 16Na ṭhiangṭhunh kha hler law rili cungah khan na kut samh tuah, cun rili kha aa ṭhen lai i Israel mi cu rili chung khan vawlei ro cungin an kal kho lai. 17Izipt mi kha an lung ka hahter hna lai i rili chungah cun an dawi hna lai; cun Faro le a ralkapbu vialte le a rangleng hna cu ka tei hna lai i cu ka tei hnanak nih cun upatnak a ka pek lai. 18Annih cu ka tei hna tikah Izipt mi nih khan Bawipa ka si cu an hngalh lai,” a ti.

19Israel bu hmaiah a kalmi vancungmi kha aa ṭhial i an hnu in a zulh hna. An hmai i a ummi minmei tom kha aa ṭhial i an hnuah a um. 20Izipt mi ralkapbu le Israel mi ralkapbu hna karlak ah khan minmei tom cu a um. Minmei nih cun khua a muihter i khuamuih zong a tuanhter, cucaah zan khuadei Izipt ralkapbu le Israel ralkapbu cu pakhat le pakhat an i naih kho lo.

21Moses nih rili cungah khan a kut a hler i zan khuadei a ṭhawngmi nichuahlei thli kha a hrang i cu thli nih cun rili cu a nam i vawlei ro ah a canter. Ti cu aa ṭhen i 22Israel mi cu rili chung khan vawlei ro cungin an kal, ti cu orhlei kam le kehlei kamah vampang bantukin aa chong. * 23Izipt mi nih cun an dawi hna i Faro rangtum vialte le rangleng vialte le a mawngtu vialte hna nih khan rili chungah cun an hei nam hna. 24Khuadei laite ah khin Bawipa nih cun minmei tom le mei tom chung khan Izipt mi kha a vun zoh hna i a tuaiter dih hna. 25An rangleng ke cu a taapter hna i har lengmang fangfang in an kal kho, cucaah cun Izipt mi nih cun, “Israel mi hi zamtak hna u sih, Bawipa pei anmah lei ah a ṭang i kanmah a kan do ko hi,” an ti.

26 Bawipa nih Moses cu, “Rili cungah khin na kut hler law Izipt mi hna khi an rangleng le an rangleng mawngtu vialte hna he ti nih phum dih hna seh,” a ti. 27Cucaah Moses nih cun a kut cu rili cungah khan a hler i khua a dei ah khin ti cu amah ningkel bantuk khan a um ṭhan. Ti nih a hun naih cuahmah hna tikah cun Izipt mi cu chuah an i zuam i heh tiah an tli, sihmanhsehlaw Bawipa nih rili chungah cun a thlak dih hna. 28Ti cu a kir i Israel mi a dawitu vialte hna, rangleng vialte hna le a mawngtu vialte hna le Faro ralkapbu vialte hna kha a phum dih hna, pakhat hmanh an tang lo. 29Asinain Israel mi tu cu rili chung khan vawlei ro cungin an kal i ti cu an orhlei le an kehlei ah khan vampang bantukin an i chong.

30Cu ni ah cun Bawipa nih Israel mi cu Izipt mi hna kut chung khan a khamh hna i Israel mi nih Izipt mi cu rilikam i an thih i an rilh liangluang ko kha an hmuh hna. 31Izipt mi hna cungah a liannganmi ṭhawnnak in Bawipa nih rian a ṭuan ti kha an hmuh i Bawipa kha an ṭih; Bawipa cungah khan zumhnak an ngei i a sal Moses cung zongah khan zumhnak an ngei ve.

Moses Hla

(Slm 78.12-14)

15:1Khi tikah Moses le Israel mi nih hi hla hin Bawipa cu an thangṭhat:

“ Bawipa nih lianhngannak in

a tei cang,

rangtum hna le an cung i

aa citmi hna cu rili chungah

a paih hna,

cucaah Bawipa cu hla in ka thangṭhat lai. *

Psalm Exodus 15:1-6, 17-18 (1)

R/ Khi tikah Moses le Israel mi nih hi hla hin Bawipa cu an thangṭhat: “Bawipa nih lianhngannak in a tei cang, rangtum hna le an cung i aa citmi hna cu rili chungah a paih hna, cucaah Bawipa cu hla in ka thangṭhat lai.

1Khi tikah Moses le Israel mi nih hi hla hin Bawipa cu an thangṭhat: “Bawipa nih lianhngannak in a tei cang, rangtum hna le an cung i aa citmi hna cu rili chungah a paih hna, cucaah Bawipa cu hla in ka thangṭhat lai. * 2Bawipa nih a ṭhawngmi le a liannganmi ah a ka ser, amah cu a ka khamhtu kha a si. Amah cu ka Pathian a si i ka thangṭhat lai, ka pupa hna Pathian a si i a lianhngannak cu hla in ka sak lai. *3 Bawipa cu ralkap a si, a min cu Bawipa a si. 4“Faro rangleng hna le ralkapbu cu rili ah a paih hna, a bawi ṭhawng bikbik hna cu Rili Sen chungah an thi. 5Rili thuk nih khan a phum hna, ti ne ah khan lung bantukin an tla. 6Bawipa, na orhlei kut a ṭhawngmi cu khuaruahhar a si; ral pawl kha a den cikcek hna.

17Na mi cu na luhpi hna lai i na tlang cungah khan na phun hna lai, na umnak inn ca i na sermi hmun ah khan na phun hna lai maw Bawipa, nangmah hrimhrim nih na sakmi biakinn ah khan na phun hna lai, maw Bawipa. 18Bawipa cu zungzal in zungzal tiang siangpahrang a si lai,” an ti.

Avoilinak Bible

Isaiah 54:5-14

5Nangmah an sertu cu na va bantuk

a si lai — a min cu

Ralkapbu Bawipa a si!

Israel Pathian thiang nih cun

an khamh lai — amah cu

vawlei cung dihlak uktu a si.

6Israel, nang cu ngaknu note,

a va nih a hlawt i a lungre a thei

ngaingaimi bantuk na si.

Sihmanhsehlaw Bawipa nih cun

an auh ṭhan i,

7“Caan tawite chung cu kan kaltak,

sihmanhsehlaw dawtnak thukpi he

kan lak ṭhan.

8Ka thinhun in tawite chung cu

khattelei kan mertak,

sihmanhsehlaw a zungzal in

kan dawt lai,” a ti.

Cuticun nangmah an khamhtu Bawipa nih a ti.

9“Noah chan ah biakamnak

ka rak tuah i,

vawlei cungah buanchukcho

ka tlunter ti lai lo, ka rak ti.

Atu na sinah biakamnak ka ser ve i

na cungah ka thin a hung ti lai lo i

kan mawhchiat ti lai lo,

dan zong kan tat ti lai lo, ka ti. *

10Fing le tlang hmanh khi an cim hnga i

an rawk ko hnga,

sihmanhsehlaw kei nih kan dawtnak

cu zeitikhmanh ah a dong lai lo.

Daihnak kan pek lai, tiah bia

kaa kammi cu,

a zungzal in ka zulh lai,”

tiah nangmah an dawtu Bawipa nih a ti.

Jerusalem Thar

11 Bawipa nih aa thawh i,

“Maw Jerusalem, nang cu harnak

na ing i bawmtu na ngei lo,

ahohmanh hnemtu na ngei lo.

Asinain na hram cu lungvar man

sung in ka ser ṭhan hna lai. *

12Na innsang cu rubi lungvar in

ka sak hna lai i

na kutka cu mei bantukin a ceumi

lungvar in ka sak hna lai;

na kulhnak vampang cu sui lungvar

in ka sak hna lai!

13“Keimah hrimhrim nih na mi cu

ka cawnpiak hna lai i

ṭhanchonak le daihnak

ka pek hna lai. *

14Dinnak le ṭhatnak nih

an in ṭhawnter lai.

Hremnak le ṭihphannak in

na him cang lai.

Psalm 30:1,4-6,11-13 (2)

R/ Bawipa, ka Pathian, nangmah sinah awmhnak hal in ka au i na ka damter.

1Maw Bawipa, nangmah nih na ka khamh i ka ral kha ka cungah diriam in na umter hna lo caah kan thangṭhat.

4Nannih a mithiang hna, Bawipa cu thangṭhat u; A Thiangmi Pathian nih a tuahmi kha philh hlah u law amah kha lawm u. 5A thinhun cu caan tawite chung lawng a si; a ṭhatnak tu nih cun chantlung a nguh. Zan ah mitthli tlaknak um hmanh seh law zinglei ah cun lawmhnak a ra ṭhan ve. *6Him tein ka um kha ka hngalh i “Ahohmanh nih an ka tei bal lai lo,” ka ti.

11Ka ngaihchiatnak cu lunglawmh lamnak ah na ka thlenpiak cang, ka mithi ngaihnak puan cu na ka lakpiak i lunglawmhnak puan kha na ka pek. 12Cucaah dai tein ka um lai lo; nangmah cu kan thangṭhat ko lai. Bawipa, nangmah cu ka Pathian na si, a zungzal in kan thangṭhat lai.

Avoinganak Bible

Isaiah 55:1-11

Pathian Nih A Zaangfah Hna Lai

1 Bawipa nih aa thawh i,

“Ti a halmi paoh ra tuah u,

hika ah hin ti a um.

Tangka zeihmanh a ngei lomi hna

ra tuah u,

rawl kha i cawk u law ei tuah u.

Ra u law mitsur zu le cawhnuk kha i

cawk hna u — a man

zeihmanh pek a hau lai lo. *

2Zeicahdah rawl a si ṭung lomi ah

nan phaisa kha nan hloh?

Zeicahdah nan nihlawh man vialte cu

nan hman dih ṭung i rawlṭam in

nan um ṭhiamṭhiam ṭung?

Ka bia ngai u law ka chimmi kha

tuah tuah u,

rawl vialte lakah a thaw bik kha

nan ei lai.

3“Ka mi hna, ka bia ngai u law

ka sinah ra tuah u;

ka sinah ra u law nunnak

nan hmuh lai.

A hmunmi biakamnak kha

nanmah he ka ser lai i

David ka kamhmi thluachuahnak

kha kan pek hna lai. *

4Amah cu miphun tampi hruaitu le

uktu ah ka ser i

amah thawngin ka lianhngannak

kha ka langhter.

5Atu cu ramdang miphun kha

nan auh hna lai;

hlanah cun an rak in hngal hna lo,

sihmanhsehlaw atu cu nanmah he

fonh duh ah a tlik in an ra tli lai.

Bawipa nan Pathian, Israel Pathian

thiang nih hi vialte cu ka tlinter lai;

upatnak le sunparnak kha

kan pek lai,” a ti.

6Atu cu Bawipa kha kan naih ah a um

caah amah leiah cun i mer u law

amah sinah cun thla cam u.

7Miṭhalo nih an zulhmi an lam kha

hlaw hna seh law

an ruahning kha thleng hna seh.

Bawipa kan Pathian leiah cun

i mer hna seh,

amah cu mi zaangfah a thiam i

khulrang in mi a ngaithiam

khotu a si.

8 Bawipa nih, ‘Ka ruahning cu

nan ruahning a si lo,

ka thil tining zong nan thil tining he

an i khat lo.

9Van khi vawlei nakin a let tam piin

a san deuh bangin

ka ruahning le ka thil tining zong

nan ruahning le nan thil tining

nakin a let tam piin a sang deuh.

10Ka bia cu van in a rung tlami ruah le

hawhra bantuk a si lai.

Ruah le hawhra nih cun,

van ah kir ṭhan ti loin

vawlei kha an hnawnter i

thlaici kha an khohter i an ṭhanter i

thlaici tuhtu kha thlaici an pek hna i

rawl eitu kha rawl an pek hna. *

11Cu bantuk cu ka kaa in a chuakmi

bia cu a si ve lai — ka sinah

a lawngin a ra kir ṭhan lai lo,

tuah seh tiah ka fialmi kha

a tlolh lai lo i

ka thlahhnawh chanmi thil ah khan

a tlam a tling lai.

Psalm Isaiah 12:2-6 (3)

R/A ti a halmi cu tikik nih lawmhnak a pek hna bangin Pathian mi cu Pathian nih a khamh hna tikah an i lawm.”

2Pathian cu ka khamhtu a si;

Amah cu kaa bochan lai i ka thin

a phang lai lo.

Bawipa nih ṭhawnnak le thazang

a ka pek,

amah cu ka khamhtu a si. *

3A ti a halmi cu tikik nih lawmhnak

a pek hna bangin

Pathian mi cu Pathian nih a khamh

hna tikah an i lawm.”

4Ni khatkhat cu mi nih hitin hla an sak

ni a phan te lai:

“Bawipa cu thangṭhat ko u,

Amah kha bawmhnak hal u.

Miphun vialte kha a tuahmi chim

hna u, zeitluk in dah a lianhngan

ti kha chim hna u.

5Thil lianngan a tuah hna caah Bawipa cu hla in

thangṭhat u.

Vawlei dihlak nih cu thawng cu thei

hna seh.

6Zion i a ummi paohpaoh cu au u law

hla sa u.

Israel Pathian thiang cu a lianngan i

a mi hna sinah khua a sa.”

Avoiruknak Bible

Baruch 3:9-15, 32-4:4

II: FIMNAK, ISRAEL CA AH A HERH TUK MI

9Israel, nunnak a pe mi nawlbia hna cu ngai hna; hngalhnak cu zei a si ti kha hngal law cawng tuah. 10Zei ruang, Israel, zei ruang ah dah na ral hna ram ah na um, miram ah na tar chin lengmang ko, 11mithi hna in naa buar, Mithi khua ah a kal mi bang hmuh na si?  12Cucu fimnak hrampi na rak hlawt caah a si. 13Pathian lam in na rak vah a si ahcun hnangam tein na rak um ko lai.  14Khua zei ah dah hngalhnak, khuazei ah dah ṭhawnnak ti cu cawng tuah, lungfiannak cu khua zei ah dah a um, khua zei ah dah nunsaunak, khua zei ah dah nun khuasaunak, khua zei ah dah nunnak, khua zei ah dah mit a ceunak le daihnak a um ti cu cawng tuah.

15Sihmanhsehlaw aho nih dah a umnak cu a rak hmuh, aho dah a chawhlawn inn ah a rak lut cang?

32 Sihmanhsehlaw zei zongte a hngal mi nih amah cu a hmuh, a thluak in a tlaih khawh cang, vawlei cu a fehter chin lengmang i keli-ngei sahrang hna in a khahter, 33Ceunak kha a thlah- cun a kal ko, a auh ṭhan- cun therbu in a ngaih; 34arfi cu an umnak hmun cio in lawm ngai an ceu; 35a auh hna tikah annih nih, “Hika ah kan um ko hih,” tiah an leh; 36 an sertu lawmhter awkah an tleu. Amah cu kan Pathian a si, amah he tahchunh awk aho hmanh an um lo. 37Amah nih hngalhnak lam cu a ningpi in a hmuh i a sal Jacob le a dawt mi Israel cu a hmuhsak hna; 38cu hnu lawng ah vawlei ah a rung lang i minung hna lak ah khua a sa.

4 Amah cu Pathian nawlbia cauk a si, Phungbia cu zungzal in a hmun; a zul mi hna cu an nung lai i a hlaw mi hna cu an thi lai. 2Jacob, i mer law amah cu tlai, a tleunak in na lam cu ceuter ko tuah: 3Na sunparnak cu midang kut ah chan hlah, na siṭ hatnak cu midang kha pe hna hlah. 4Maw Israel, thluachuak mi kan si; Pathian lung a tluanh mi cu kan sin ah phuan a si cang.

Psalm 19:8-11 (Jn 6:69)

R/ Atu cu nangmah hi Pathian sinin a rami Mi Thiang na si kha kan zumh i kan hngalh cang,” tiah a ti.

8 Bawipa phunglam cu ahmaanmi an si,

cu phunglam a zulmi cu an lung

aa lawm.

A nawlbia cu dinnak leiah a tlingmi an si i

hngalhthiamnak lungthin pe khotu an si,

9 Bawipa biak cu a ṭha, cu biaknak cu

zungzal in a hmun lai.

Bawipa biakhiahnak cu an ding,

zungzal in ahmaanmi an si.

10Sui nakin duh deuh awk an si,

sui thiang bik phun nak hmanh in

duh deuh awk an si,

Khuaihliti nakin an thlum deuh,

khuaihliti thiang bik nakin

an thlum deuh.

11Na sal hi hngalhnak an ka pek i

ka zulh hna caah laksawng ka hmu.

Avoisarihnak Bible

Ezekiel 36:16-17a, 18-28

Israel Nunnak Thar

16-17 Hihi Bawipa nih ka sinah a chimmi bia an si: “Mipa, Israel mi cu anmahle an vawleite i an um ah khan an ziaza le an thil tuahnak in an vawlei cu an thurhhnawmhter; an ziaza cu a thurhnawm i ka mithmuh ah fihnung a si. 18Ram chung i thisen an chuahmi le ram cu an thurhhnawmhnak siasal hna ruangah khan annih cu ka thinhunnak ka bunghhnawh hna. 19Miphun kip sinah ka ṭhek hna i ram dangdang ah an i ṭhen dih; an ziaza le an tuahsernak nih a hlawhmi dantatnak kha an cungah ka tlunter. 20An phaknak kip miphun hna sinah khan ka min thiang kha an thurhhnawmh. Mi nih an i thawh i, Hi hna hi Bawipa mi an si, a ram in a rami an si, an ti hna. 21Sihmanhsehlaw Israel mi nih cun an phaknak miphun kip sinah khan ka min kha thurhhnawmhter hmanh hna seh law ka min thiang ruangah annih cu ka zuah hna.

22“Cucaah Israel mi cu, hihi Bawipa Pathian bia a si, tiah chim hna. Nannih Israel mi hna, hi ka tuahmi hi nanmah ruangah a si lo, nan phaknak miphun kip sin i nan thurhhnawmhtermi ka min thiang ruangah khan a si deuh. 23Cu miphun hna sin i nan thurhhnawmhter cangmi a liannganmi ka min cu ka thianter lai. Annih nih nannih chungin ka thiannak ka langhter kha an hmuh tikah, miphun hna nih cun Bawipa ka si kha an hngalh lai, tiah Bawipa Pathian nih a ti. 24Miphun hna lak khan kan chuah hna lai i ram kip khan kan pumh hna lai i nanmah vawleite ah khan kan kalpi hna lai. 25Nan cungah ti thiang kan theh hna lai i nannih an thurhhnawmhtertu hna thil vialte khan kan thianh hna lai; nan siasal biaknak thurhhnawmhnak vialte khan kan thianh dih hna lai. 26Lungthin thar kan pek hna lai i thlarau thar nan chungah ka khumh lai. Nan pum chungin lung bantukin a hakmi nan lung kha ka lak lai i titsa bantukin a nemmi lung kha kan pek hna lai. * 27Ka thlarau cu nan chungah ka khumh lai i ka nawlbia he aa tlak in kan umter hna lai i ka phunglam zulh in nan nung lai. 28Nan pupa ka pekmi hna ram chungah nan um lai i nannih cu ka mi ah nan i cang lai i kei cu nan Pathian ah ka cang lai.

Psalm Isaiah 12:2-6 (3) or Psalm 51:12-15, 18-19 (12)

R/ A ti a halmi cu tikik nih lawmhnak a pek hna bangin Pathian mi cu Pathian nih a khamh hna tikah an i lawm.

2Pathian cu ka khamhtu a si; Amah cu kaa bochan lai i ka thin a phang lai lo. Bawipa nih ṭhawnnak le thazang a ka pek, amah cu ka khamhtu a si. *

3A ti a halmi cu tikik nih lawmhnak a pek hna bangin Pathian mi cu Pathian nih a khamh hna tikah an i lawm.”

4Ni khatkhat cu mi nih hitin hla an sak ni a phan te lai: “Bawipa cu thangṭhat ko u, Amah kha bawmhnak hal u. Miphun vialte kha a tuahmi chim hna u, zeitluk in dah a lianhngan ti kha chim hna u.

5Thil lianngan a tuah hna caah Bawipa cu hla in thangṭhat u. Vawlei dihlak nih cu thawng cu thei hna seh.

6Zion i a ummi paohpaoh cu au u law hla sa u. Israel Pathian thiang cu a lianngan i a mi hna sinah khua a sa.”

Tipil innak a um ahcun…

Psalm 42:3-5, 43:3-4 (42:2)

R/ Maw a nungmi Pathian, nangmah cu tihal in kan hal; zeitik ah dah na umnak ah ka hun khawh lai i kan biak khawh lai?

3Chun nitlak zan khuadei in ka ṭap i ka mitthli lawng kha ka rawl cu a si ko; ka ral nih, “Na Pathian cu khuazei ah dah a si kun?” tiah atu le atu an ka ti lengmang.

4Hlanlio kong kha ka ruah tikah ka lung a leng; Pathian inn i mi zapi he kan rak kal i kan kal tikah keimah i ka rak hrui hna i Pathian thangṭhat in lunglawm le thanuam in hla kan rak sak i kan rak au kha ka ruah tikah ka lung a leng hringhran.

5Zeicahdah ka ngaih a chiat? Zeicahdah ka lungre a theih? Pathian cu kaa bochan ṭhan lai i ka Khamhtu le ka Pathian cu ka thangṭhat ṭhan lai.

3Na ceunak le na biatak cu run thlah hna law, ka hruai hna seh na tlang thiang Zion ah cun ka kalpi ṭhan hna seh law na umnak na biakinn ah cun ka hruai hna seh.

4Cun Pathian, nangmah nih lunglawmhnak le thanuamnak na ka pek caah, na biakṭheng ah cun ka hung kal lai; ka tingtang cu kaa tum lai i nangmah thangṭhatnak cu hla in ka sa lai, Maw Pathian, ka Pathian.

Rome 6:3-11

3Khrih Jesuh he pehtlaihnak chung i tipil kan in ah khan a thihnak he i pehtlaihnak chungah kan i hnim ti kha nan philh dahra? 4Cucaah tichung i tipilnak kan vung in ah khan amah he vui ṭi kan si i a thihnak ah khan kan thi ve; cu bantuk ṭhiamṭhiam in Khrih cu Pa sunparnak ṭhawnnak nih a thawhter bang khan kannih zong nunnak thar ah kan nung ve lai. *

5A thihnak ah amah he kan thih ṭi ahcun, nunnak i thawhter a sinak ah kannih zong thawh ṭiter kan si ve lai. 6Kan minung hlun cu Khrih he vailam cungah thah a si cang ti kha kan hngalh. A sualmi kan minung hlun cu zeicahdah thah a si ti ahcun, sualnak sal kan si tinak hnga lo caah a si. 7Cucu zeitindah a si ti ahcun minung cu a thih tikah cun sual ṭhawnnak chung khan a luat. 8Kannih cu Khrih he kan thih ṭi cang ahcun, amah he kan nung ṭi lai ti zong kha kan zumh. 9Zeicahtiah Khrih cu thihnak in thawhter a si cang i a thi ti lai lo ti kha kan hngalh — thihnak nih a cungah nawl ngeihnak zeihmanh a ngei ti lo. 10A inmi thihnak cu voi khat ah za lakin sualnak ruang i a thih kha a si; cun atu i a nunmi nunnak cu Pathian ca nunnak a si. 11Cu bantukin nannih zong nih, kannih cu sualnak ah kan thi cang i asinain Khrih Jesuh he i pehtlaihnak thawngin Pathian ah kan nung tiah nan i ruah awk a si.

Mark 16:1-8

Thawhṭhannak

(Mat 28.1-8; Luk 24.1-12; Jhn 20.1-10)

1Sabbath ni kha a dih tikah Mary Magdalin le Jeim nu Mary le Salome nih khan Jesuh ruak thuh awk caah cun zihmui kha an i cawk. 2Zarhpi Ni zingkate, nichuah kate ah khin, thlan ah cun an va kal. 3Lam ah cun pakhat le pakhat kha. “Thlan khar lung kha ahodah a kan thawnpiak te lai,” tiah an i ceih. 4(A khar cu lung nganpi a si). Cun an hun zoh i lung kha a rak i thawn cang. 5Cucaah thlan chungah cun an lut i puan rang aa aih i orhlei kam i a rak ṭhumi tlangval pakhat an hmuh i an lau ngaingai. 6Cu pa nih cun, “Nan thinphang hlah u. Vailam ah an tahmi Jesuh, Nazareth khua mi kha nan kawl ti kha ka hngalh. Sihmanhsehlaw hika ah hin a um ti lo — a tho cang! An vuinak hmun hi zoh hmanh u. 7Cucaah cun va kal u law a zultu hna kha le Peter kha, ‘Amah nih an chimh hna bantuk te khan nan hlanah Galilee ah a kal i cuka ah cun nan va hmuh lai,’ a ti tiah va chim hna u,” tiah a ti. * 8Cucaah an chuak i an thin a phang i an ning a ṭih caah thlan cun an le. An thin a lau tuk caah ahohmanh an chim hna lo. *