Embedded Files
December 28, 2025
Holy Family of Jesus, Mary, and Joseph
Lectionary: 17
Reading I Sir 3:2-6, 12-14 (or 1 Samuel 1:20-22, 24-28)
2Zei cah tiah Bawipa nih an pa cu a fapale hna nakin a upat deuh i an nu covo cu a fale cung ah a chiah. 3A pa a upat mi cu a sualman a liam a si, 4a nu a upat mi cu chawva aa khon mi he an i lo. 5A pa a upat mi cu a fale hna he aa lawm lai, bawmhnak hal in thla a cam tikah a thlacamnak cu theihpiak a si lai. 6A pa a upat mi cu a nunkhua a sau lai i Bawipa nawl a zul mi poh nih a nu lung a nuamter. 12Ka fapa, na pa cu a tarlei ah zohkhenh law a chan chung a ngaihchiatter hlah. 13A lung a loh cang hmanh ah theithiamnak pe ko, na dam i na tha a um lio ah amah cu nautat hlah, 14zei cah tiah mah pa cung dawtnak cu philh a si bal lo i nangmah ca ah sualman liamnak a si lai.
OR:
20 cun a caan a tlin tikah Hannah cu fa a pawi i fapa a hrin i, "Amah cu Bawipa sinin ka halmi a si," tiin a min ah Samuel a sak. 21 Cun Elkanah le a chungle vialte cu Bawipa sin i kum fate thawinak pekchanh awk le a biahrennak pek awkah an hung kal. 22 Sihmanhsehlaw Hannah cu a hung kal lo, zeitintiah amah nih a va sinah cun, "Ngakchia hi hnuk ka thlei cangka in ka ratpi lai, Bawipa hmaiah a chuah i khika ah a um zungzal nakhnga," tiah a ti. 24 Cun hnuk a thlei dih in, kum thum a timi cawtum pakhat le changvut ephah pakhat le mitsur hang cua khat he tiah, amah sinah a hun i kalpi; Shiloh i Bawipa inn ah khan a ratpi; ngakchia cu a note ko. 25 Cun cawtum kha an thah i ngakchia cu Eli sinah an ratpi. 26 Cun amah nih, "Maw ka bawipa! Na nun bangin, ka bawipa, keimah hi hika na hmai i Bawipa sin i thla a rak cam minu kha ka si. 27 Hi ngakchia caah hin thla kha ka rak cam; cun Bawipa nih ka halnak kha a ka pek. 28 Cucaah Bawipa kha amah cu ka hlanh cang; a nun chung vialte amah cu Bawipa sinah hlanh a si," tiah a ti. Cun khika ah Bawipa kha an biak.
Responsorial Psalm Ps 128:1-2, 3, 4-5.
R/ Bawipa a ṭih i a lam zulh mi hna cu, mi lunglawm an si.
Bawipa a ṭihmi cu mi lunglawm an si, a nawl a ngaimi cu mi lunglawm an si. 2 Rian na ṭuan tikah nangmah pawcawmnak khim na hmuh lai i na lung aa lawm lai i khua awng na pem lai. R
3 Na nupi cu na inn chungah a thei a ṭhami mitsur ruang bantuk a si lai, na fapale nih oliv thing tuaino bantukin na cabuai kha an kulh lai. 4 Bawipa nawl a ngaimi cu hi bantukin thluachuahnak an hmu hrimhrim lai. R
Bawipa nawl a ngaimi cu hi bantukin thluachuahnak an hmu hrimhrim lai. Bawipa nih Zion Tlang in thluachuahnak in pe ko hna seh! Nan nun chung vialte, Jerusalem rumnak cu co ve ko u. R
OR:
R.Nangmah sinin thazang a hmumi hna cu zeitluk in dah an i lawmh,
2 Cuka i um cu ka duh hringhran! Bawipa biakinn chung tual cu ka ngai hna. A nungmi Pathian cu ka nunnak dihlak in hla in ka thangṭhat. 3 Pithlung hmanh nih bu an i sak i pele hmanh nih anmah innte an ngei; an fano cu na biakṭheng pawngah an chiah hna, maw Lianngan Bik Bawipa, kan siangpahrang le kan Pathian. R
5 Nangmah sinin thazang a hmumi hna cu zeitluk in dah an i lawmh, Zion Tlang i va kal a duhmi hna cu zeitluk in dah an i lawmh. 6 A ro a carmi nelrawn kha an tan tikah cerhti put tamnak hmun ah a cang; ruahter nih khan tidil in a khahter. R
9 Maw Pathian, kan siangpahrang cu thluachuahnak pe ko, nangmah nih na thimmi siangpahrang cu thluachuahnak pe ko. 10 Na biakinn chungah ni khat um cu hmun dang i ni thong khat um nakin a ṭha deuh. Miṭhalo mi hna inn chung i um nakcun ka Pathian inn kutka hram dir hmanh ka duh deuh. R
Reading II Colosians 3:12-21 (or Colosians 3:12-17)
12 Nannih cu Pathian mi nan si; amah nih an dawt hna i an thim hna. Cucaah mi zawnruahnak, zaangfahnak, toidornak, nemnak le lungsaunak kha nan i aih awk a si. 13 Pakhat le pakhat lungsi lonak nan i ngeih tikah pakhat le pakhat i ngaithiam u law i bawm u. Bawipa nih an ngaihthiam hna bantukin pakhat le pakhat nan i ngaithiam lai. 14 Cun hi thil vialte cungah hin dawtnak kha chap u law dawtnak cu zeizong vialte, i rem ṭhipṭhep tein a funtomtu cu a si. 15 Khrih nih an pekmi hna daihnak kha nan lung chung i biaceihtu ah ser u; zeicahtiah hi daihnak hmuh awkah hin Pathian nih pum khat chung i um awkah an kawh hna. Cun lunglawmhnak in khat u. 16 Khrih bia cu nan chungah tam piin a fimnak he khan um seh. Fimnak in pakhat le pakhat i chim u law i cawnpiak u. Thangṭhatnak hla, Pathian biaknak hla le hla thiang kha sa hna u; Pathian kha lawmhnak in hla in thangṭhat u. 17 Pathian kan Pa cu Khrih thawngin nan lawmh caah, nan tuahmi thil si hna seh, nan chimmi bia si hna seh, Bawipa Jesuh min in si dih ko hna seh. 18 Nupi hna, nan vale nawl kha ngai hna u, cucu Khrihfa nan si bantukin nan tuah awk a si. 19 Vale hna, nan nupi le kha daw hna u law bia hrang in ti hna hlah u. 20 Ngakchia hna, Khrihfa nan si caah nan nu le nan pa kha upat hna u, cucu Pathian lawmhmi thil a si. 21 Nu le pa hna, nan fale kha an ingpuanter hna hlah u, an lung a dong sual lai.
Alleluia Col 3:15a, 16a
Khrih nih an pekmi hna daihnak kha nan lung chung i biaceihtu ah ser u; 16 Khrih bia cu nan chungah tam piin a fimnak he khan um seh.
Gospel Lk 2:41-52
Phungbia cawnpiaktu hna lak i Jesuh
41Kum fatin a nu le a pa cu lanhtak puai ca ah Jerusalem ah an kai tawn. 42 Kumhleihnih a si ah khan voidang bang Jerusalem ah an kal ṭhan. 43 Puai ni hna a dih i inn i an kir ṭhan tikah ngakchiapa cu a nu le a pa hngalh lo in Jerusalem ah a taang. 44 A hawile he hmun khatkhat ah a um rua ti ruat in nikhat lam an kal hnu lawng ah an chungkhar le a hawikom hna sin ah an va kawl. 45 An hmuh lo tikah Jerusalem ah an kir i a kenkip ah an kawl.
46 Thil a si ning cu, nithum a rauh hnu ah Biakinn chung ah an va hmuh; cawnpiaktu hna lak ah ṭhu in an bia a ngaih i bia zong a rak hal len hna, 47 a bia a thei mi vialte nih a thluak a ṭhat ning le a lehnak hna ah an khuaruah a har dih. 48 An hmuh tikah an ar ko, cun a nu nih, “Ka fa, zei cah dah hiti hin na kan tuah? Na pa le keimah cu nangmah kawl ah zeitluk in dah kan lungre a theih ti hi zoh hmanh,” tiah a ti. 49 Anih nih, “Zei ruang ah dah nan ka kawl? Ka pa inn ah ka um lai ti cu nan hngal lo maw?” ti in a leh hna. 50 Sihmanhsehlaw zei dah a chim duh ti kha an fiang lo.
Nazareth ah a thlithup nunnak aa thawk ṭhan 51Cun an sin ah a va ṭum ve i Nazareth cu an phan i a nu le a pa nawlngeihnak tang ah khua a sa. A nu nih hi thil vialte cu a lung ah a khumh dih hna. 52 Cun Jesuh cu fimnak le pumsa, Pathian le minung dawtnak he a ṭhang.
Page updated
Google Sites
Report abuse