Embedded Files
Second Sunday of Lent
Second Sunday of Lent
Lectionary: 25 (March 1, 2026)
Bawipa nih Abram cu a thawh i, "Na ram le na rualchan le na pa inn kha chuahtak hna law kan hmuhsak laimi ram ah kal tuah.Tefa tampi kan pek lai i miphun nganpi ah an cang lai. Nangmah cu thluachuah kan pek lai i na min kan thanter lai, cucaah na min cu thluachuah peknak ah an hman lai.Nangmah thluachuah an petu kha thluachuah ka pek ve hna lai i chiat an serhtu kha chiat ka serh ve hna lai. Vawlei cung miphun vialte nih hin, Nangmah thluachuah kan pek bantuk hin thluachuah kan pe ve, tiah an ka hal lai," a ti.Abram cu kum sawm sarih le kum nga a si tikah, Bawipa nih a chimh bantuk khan, Haran khua cun aa thawh; Lot kha a sinah a kal ve.
R. Bawipa, kan ruahchannak cu nangmah ah kan chiah bang in a fek mi na dawtnak cu kan cung ah hmun hram ko seh.R
4 Bawipa bia cu a ding, a tuah mi vialte cu zumhtlak a sinak in a chuak mi an si. 5 Felfainak le dinnak cu a duh; vawlei cu a fek mi Bawipa dawtnak in a khat.R
18 Sihmanhsehlaw Bawipa nih amah a tih mi hna, a fek mi a dawtnak aa hngatchan mi hna cu zeitin a zohkhenh hna ti cu hmu tuah u, 19 cucu annih kha thihnak in chanh awk ah le mang`am caan ah himbawm tein chiah hna awk ah a si.R
20 Kannih cu Bawipa kha kan hngak; amah cu a kan bawmtu le kan phaw a si, 22 Bawipa, kan ruahchannak cu nangmah ah kan chiah bang in a fek mi na dawtnak cu kan cung ah hmun hram ko seh.R
Kan Bawipa kong chim cu na ningzak hlah, a ca i thongtlapa keimah zong hi ka zahpi hlah. Pathian nih thazang an pekning in Thawngṭha ca i temhnak in kha ngamh lehlam ko.Pathian nih cun amah mi hrimhrim si awkah a kan khamh i a kan auh; cucu kanmah tuahmi ruangah si loin amah nih aa tinhmi le vel a kan ngeih ca ruang tu ah khan a si. Hi a vel cu caan hramthawk hlan in Jesuh Khrih in a kan pek cang,sihmanhsehlaw atu ceo ah hin kan Khamhtu Khrih Jesuh a ratnak thawngin cucu kan sinah phuan a si. Thihnak ṭhawnnak kha a donghter cang i thih thiam ti lo nunnak cu Thawngṭha in kan sinah a phuan cang.
Bawipa Jesuh Khrih,Sunparnak Siangpahrang nangmah cu a zungzal donghin loin kan in thangthat !
Thawngtha Aupinak Matthew 17:5
5 Cutin bia a chim lio ah khan ruah lopi in minmei ceu nih a thladem in a run khuh hna, cun ruah lopi in minmei chung cun aw pakhat nih, “Hihi ka dawtkhun mi ka Fapa a si, ka mihmai ṭha a hmu. A bia ngai u,” ti in a chim mi kha an theih.
Muisam thlennak
1.Niruk hnu ah khin, Jesuh nih Peter le Jeim le a nau Johan kha hruai in tlang sangpi ah a kaipi hna. 2 Cuka ah an hmaika ah cun a muisam aa thleng: a hmai cu ni bang in a ceu i a hnipuan cu niceu bang in aa lek. 3 Cun ruah lopi in Moses le Elijah cu an rung lang i amah he bia an i ruah. 4 Cun Peter nih Jesuh cu a thawh i, “Bawipa, hika um hi khuaruah har ngai a si, na duh ahcun, nangmah ca pakhat, Moses ca pakhat, Elijah ca pakhat ti in deuthlam pakhat cio kan sakpiak hna lai,” tiah a ti. 5 Cutin bia a chim lio ah khan ruah lopi in minmei ceu nih a thladem in a run khuh hna, cun ruah lopi in minmei chung cun aw pakhat nih, “Hihi ka dawtkhun mi ka Fapa a si, ka mihmai ṭha a hmu. A bia ngai u,” ti in a chim mi kha an theih. 6 An theih tikah a zultu pawl cu an ṭih tuk i vawlei ah an bawk. 7 Sihmanhsehlaw Jesuh cu a ra i annih kha, “Tho u, ṭih hlah u” a ti hna i a tongh hna. 8 Cun cunglei an hun zoh tikah Jesuh dah ti lo aho hmanh an hmu ti hna lo.
9 Tlang cung in an rung ṭum pah ah khan Jesuh nih, “Mi Fapa hi thihnak in a thawh ṭhan hlan cu hi langhnak hi aho hmanh chim hna hlah u,” ti in nawl a pek hna.
Page updated
Google Sites
Report abuse