Advent Zarhthumnak Zarhpi(YearA)

Third Sunday of Advent (December 14, 2025)

Lectionary: 7

Reading 1   Isaiah 35:1-6a, 10

1.Ramlak le ramcar hna cu an i lawm lai i Thetse ram cu a par lai. 2Thetse ram cu hla a sa lai i lawmhnak in a au lai; Lebanon Tlang bantukin aa dawh lai i Karmel Tlang le Sharon nelrawn lo bantukin a ṭha lai. Mi kip nih Bawipa sunparnak le kan Pathian a lianhngannak le a ṭhawnnak kha an mit in an hmuh lai.3 A tha a bami cu an kut ṭhawnter hna u law a khuk a thermi cu thazang pe hna u 4A lung a dongmi cu, "Na thinphang hlah, lungṭhawng in um ko! Pathian cu nangmah chanh awkah a ra lai, na ral kha na phu a hlam hna lai," ti hna u.5 Mitcaw nih khua an hmuh lai i hnachet nih khua an theih lai. 6a, Kebei cu an pet an lam lai i a holh kho lomi kha lunglawmhnak in a au in an au lai.10 Jerusalem cu lunglawm tein an phan lai i hla an i sak pah lai i lawmhnak in an au lai. Zungzal in an i lawm lai i ngaihchiatnak le lung retheihnak an ing ti lai lo.

Responsorial Psalm

Psalm 146:6-7, 8-9, 9-10.  R. (cf. Is 35:4)

R/ Bawipa, ra law kan khamh ko sawh.

6 Amah nih van le vawlei, rili le a chungum vialte kha a ser hna. 7 A biakam kha zungzal in a zulh, hrem mi hna kha a tanh hna i dinnak a pek hna, rawltam kha rawl a pek; Bawipa nih thongtla cu a chuah hna.R

8 Bawipa nih mitcaw cu khua a hmuhter, a lung a dong mi cu thazaang a pek hna. 9 Bawipa nih khual kha a huhphenh hna, ngaktah le nuhmei cu a cawm hna.Bawipa nih miding cu a dawt i mi`halo cu a hrawh.R

. 9 Bawipa nih khual kha a huhphenh hna, ngaktah le nuhmei cu a cawm hna.Bawipa nih miding cu a dawt i mi`halo cu a hrawh. 10 Bawipa nih zungzal in a uk lai, Zion na Pathian nih chankhat hnu chankhat in a uk.R

Reading 2 James 5:7-10

Cucaah cun ka u le ka nau hna, Bawipa a rat hlantiang lungsau in um ko u. Lothlopa nih a lo in a sunglawimi rawl a chuah lai kha lungsau in a hngah tawn. Fur tlak lai le faruahthawh rat lai kha lungsau in a ngan.Nannih zong nan lung a sau awk a si. Ruahchannak sangpi ngei ko u. Bawipa cu a ra dengmang cang.Harnak nan ton tikah pakhat le pakhat i mawhchiat hlah u. Cu ti nan um ahcun Pathian nih bia an ceih sual hna lai. Biaceihtu cu lamnai te ah a um ko i a rung lut zau ko lai.Bawipa min in bia a rak chimmi profet hna kha, ka u le ka nau hna, philh hna hlah u. Harnak chung i lungsau in sifahnak a ingmi an si caah i zohchun hna u.

Alleluia  Isaiah 61:1 (cited in Lk 4:18)

Bawipa Pathian nih thlarau in a ka khahter. Sifakmi hna sinah thawng ṭha phorh awk le lung a kuaimi hna damter awk le sal i a tangmi hna sinah chuahnak thanh awk le thong chung i a ummi hna sinah luatnak thanh awkah a ka thim i a ka thlah.

Gospel    Matthew 11:2-11

Baptisma petu biahalnak. Jesuh nih amah kong a phuan

2 Baptisma petu Johan nih thong chung in Khrih nih zei dah a tuah ti kha a theih i amah kha, 3 “A ra ding mi cu nangmah maw na si, asiloah, mi dang maw kan hngah rih lai?” ti in hal awk ah a hnuzul hna cu a thlah hna. 4 Jesuh nih, “Va kir ulaw nan hmuh mi le nan theih mi hi va chimh u; 5 mitcaw nih khua an hmu, kebei nih lam an kal, thinghmui in a zaw mi hna cu an thiang, cun hnachet nih an theih, mithi cu nunnak ah an tho ṭhan i misifak hna sin ah thawngṭha phuan a si cang; 6 cun keimah kha tluknak hrampi i a ka hmu lo mi poh cu thluachuak mi an si,” tiah a leh hna.

        7 Kha mi hna cu an kal tik ah Jesuh nih Johan kong cu mizapi kha a chimh hna. Amah nih, “Zei hmuh duh ah dah thetse ram ah nan va kal? Thlizil nih a hranh i a laam mi ramhnah hmuh awk ah maw? Asilo? 8 a si ah zei hmuh duh ah dah nan va kal? Hnipuan dawhdawh in aa thuam mi hna hmuh awk ah maw? Zoh hmanh u, hnipuan dawhdawh in aa thuam mi hna cu bawi inn ah hmuh an si! 9 Asi ah, zei hmuh duh ah dah nan chuah? Profet hmuh duh ah maw? Asi, kan chimh hna, profet pakhat nakin a lianngan deuh tuk: 10 Amah hi pei Cathiang nih,

       ‘Zoh hmanh, na lam sial awk ah na hmai ah ka lamkaltu ka thlah lai,’ ti in a rak chim mi kha a si cu!

      11 Biatak kan chimh hna: nu chung in a chuak mi fale hna lak ah Johan nakin a ngan deuh mi aho hmanh an um rih lo; nain Vancung Pennak chung i a hme bik cu amah nakin a lianngan deuh. 12 Zei tin tiah Johan a rat ni in nihin ni tiang, Vancung Pennak cu dohdalnak in a khat i dohdal hmang pawl nih hramhram in luh an i tim.  13 Zei ruang ah dah profet hna le Phungbia cawnpiaknak vialte cu Johan sin ah an panh, 14 cun amah hi nan zumh ding a si ahcun a ra ding ti mi Elijah cu a si. 15 Hna a ngei mi nih an theih awk a si!