Advent Zarhthumnak

 December 15, 2024

Solemnity of the Immaculate Conception of the Blessed Virgin Mary

Lectionary: 689

Reading 1 Genesis 3:9-15, 20

    Bawipa Pathian nih cun mipa cu a vun auh i, "Khuazei ah dah na um?" tiah a ti. 10 Mipa nih cun, "Dum chung i naa chawh thawng kha ka theih i taklawng ka si caah ka thin a phang, kaa thup," tiah a leh. 11 Pathian nih cun, "Aho nih dah taklawng na si cu an chimh?" tiah a hal. "Ei hlah tiah kan timi thei kha na ei dahra?" tiah a ti. 12 Mipa nih cun, "Na ka serpiakmi nu nih khan thei cu ei awkah a ka pek i ka ei," tiah a leh. 13 Bawipa Pathian nih minu cu a thawh i, "Zeicahdah hihi na tuah?" tiah a hal. Minu nih cun, "Rul nih a ka hlen i a ka eiter," tiah a leh. 14 Cun Bawipa Pathian nih rul cu a thawh i, "Hi ruangah hin nangmah cu dantat na si; hi chiatsernak hi nangmah lawng nih na in lai. Atu thawk hin na paw in na lawn cang lai i na eimi rawl cu leidip a si lai. 15 Nangmah le nu cu nan i hua lai, a tefa le na tefa cu ral an si lai. Mi nih na lu kha rial an in zuam lai i nang nih an kedil kha cuk naa zuam ve lai," a ti. 20 Mipa nih a nupi cu a min ah Evi a sak, zeicahtiah amah cu minung vialte nu a si.

Responsorial Psalm PS 98:1, 2-3ab, 3cd-4

R. Bawipa cu hla thar in thangṭhat tuah u, khuaruahharmi thil kha a tuah hna!

Bawipa cu hla thar in thangṭhat tuah u, khuaruahharmi thil kha a tuah hna! A ṭhawnnak le a thiangmi a thazang in ral kha a tei hna. 2 Bawipa nih cun ral a tei hnanak thawng kha a thanh i a khamhnak ṭhawnnak kha miphun vialte a hngalhter hna. R

3 Israel mi bia a kamhmi hna kha a zulh i an cungah a fekmi dawtnak a ngei i zumhawktlak in a um. Kan Pathian nih ral a teinak kha mi vialte nih khuazakip ah an hmuh. 4 Vawlei mi vialte hna, lunglawm in Bawipa cu hla in thangṭhat tuah u; lawmhnak hla in thangṭhat u law a au in au u! R

Reading 2Ephesians 1:3-6, 11-12

 3 Kan Bawipa Jesuh Khrih i a Pa le a Pathian cu lawm ko u sih. Zeicahtiah Khrih he kan i pehtlaihnak thawngin kannih cu vancung ram ah hin thlarau laksawng phun kip kha a kan pek. 4 Vawlei a ser hlan in Pathian nih kannih cu Khrih chung i amah ta si dingin a kan thim cang, cucaah a hmaiah a thiangmi le soi awk um lomi kan si awk a si. 5 Pathian nih cun kannih cu Jesuh Khrih thawngin a fa i cohlan awk kha a rak timh cangmi le a duhmi a si. 6 Pathian cu a sunglawimi a laksawng ruangah hin thangṭhat ko u sih, a dawtmi a Fapa in a kan pekmi a laksawng caah hin thangṭhat ko u sih.  11 Zeizong vialte hi Pathian khuakhanning le tinhning in an kal ko; Khrih he kan i pehtlaihnak thawngin Pathian nih amah mi si ding i a kan thim cu amah nih a rak i tinhmi a si ko i a hramthawk tein tuah awkah a rak i khiah ciami a si. 12 Cucaah Khrih chung i ruahchannak a bunh hmasa bik pawl kannih nih hin Pathian sunparnak cu thangṭhat ko u sih. 

Alleluia, alleluia. Luke 1:28

Inn chung ah a lut i amah kha, “Pathian mithmai ṭha a hmu mi nu, i lawm tuah! Bawipa cu nangmah he a um,” tiah a ti.

Gospel Luke 1:26-38

Thawngthanhnak

        26 Thlaruknak ah khan, Pathian nih vancungmi Gabriel cu, Galilee peng Nazareth an ti mi khua i 27 David chung, Josef an ti mipa he aa ham mi, ngaknu thiang sin ah a rak thlah; ngaknu thiang i a min cu Mary a si. 28 Inn chung ah a lut i amah kha, “Pathian mithmai ṭha a hmu mi nu, i lawm tuah! Bawipa cu nangmah he a um,” tiah a ti. 29 Hi bia hna nih a lung a tuaitam ngai i amah le amah kha hi biakchawnhnak hi zei sullam dah a ngeih hnga?’ tiah aa ti,  30 sihmanhsehlaw vancungmi nih, “Mary, ṭih hlah; Pathian hmai ah mithmai ṭha na hmuh cang. 31 Zoh hmanh, fa na pawi lai i fapa na hrin lai, cun a min cu Jesuh na sak lai. 32 Amah cu a lianngan lai i Cungnung bik Fapa tiah auh a si lai. Bawipa Pathian nih a pu David ṭhutdan kha a pek lai; 33 Jakob Chung kha zungzal in a uk hna lai i a pennak cu dongh ni a ngei lai lo,” tiah a ti. 34 Mary nih vancungmi cu, “Sihmanhsehlaw hi thil cu zei tin dah a can khawh lai, zei tin tiah pa ka hngalh rih ṭung lo,” tiah a ti. 35 Vancungmi nih, “Thiang Thlarau cu na cung ah a rung ṭum lai, cun Cungnung bik Bawipa i ṭhawnnak nih a thladem in an khuh lai. Cucaah ngakchiapa cu a thianghlim lai i Pathian Fapa tiah auh a si lai. 36 Cun hi zong hi kan chimh rih:  na rualchan Elizabeth zong a tarlei ah fapate a pawi, cun mi nih a cing an ti mi nu cu atu ah thlaruknak a si, 37 zei cah tiah Pathian ca ah a si kho lo mi thil zei hmanh a um lo,” tiah a leh. 38 Mary nih, “Kei cu Bawipa salnu ka si, na chim bang in ka cung ah tlung ko seh,” tiah a ti. Cun vancungmi nih a kaltak.