Mass
HRAMTHAWHNAK
1. LUHNAK HLA (Dir)
2. BIACHAWNHNAK
T. Pa, le Fapa, le Thiang Thlarau min in, Z .Amen.
T. Kan Bawipa Jesuh Khrih vel, Pa Pathian dawtnak le Thiang Thlarau hawikomhnak cu nanmah he um ko seh. (2 Cor. 13:14)
(asiloah)
Kan Pa Pathian le Bawi Jesuh sinin vel le daihnak cu nanmah he um ko seh.
(asiloah)
Bawipa cu nanmah he um ko seh.
(Bishop a si ah cun)
Daihnak cu nanmah he um ko seh.
Z. Na Thlarau he zong um ko seh.
(asiloah)
T. Dominus vobiscum.
Z. Et cum spiritu tuo.
(Tithiang theihnak a um ah cun sualphuannak hlanah tuah a si)
3. SUALPHUANNAK
T. U le nau hna, athiangmi biathuk tuah awkah timhcia kan si nak hnga kan sualnak kha ruat in phuang hna u sih.
Z. Zeizong tuahkho Pathian sinah le nanmah ka u le nau hna sinah keimah cu ka ruahnak, ka hmurka, ka tuahsernak le tuah awk ka tlolhnak in ka sual tuk hringhran tiah ka sualnak ka phuan, (taang cumh pah in) keimah palhnak in, keimah palhnak in, keimah nganbik palhnak in ka sual cang. Cucaah thluachuak mi a zungzal Ngaknu Thiang Mary, vanmi hna le mithiang vialte hna le nanmah ka u le ka nau hna, Bawipa kan Pathian sinah thla ka campiak u tiah kan nawl ko hna.
T. Zeizong tuah kho Pathian nih kan zangfah sehlaw, kan sualnak ngaihthiam in zungzal nunnak ah kan hruai ko seh. Z. Amen
4. KYRIE
T. Bawipa, run kan zaangfah ko tuah.
Z. Bawipa, run kan zangfah ko tuah.
T. Khrih, run kan zaangfah ko tuah.
Z. Khrih, run kan zaangfah ko tuah.
T. Bawipa, run kan zaangfah ko tuah.
Z. Bawipa, run kan zaangfah ko tuah.
(asiloah)
(1) [Lungthleng mi hna khamh awkah a ra mi,
Maw kan Bawipa, run kan zangfah ko.]2
(2) [Misual mi hna khamh awkah a ra mi,
Khrih kan Bawipa, run kan zangfah ko.] 2
(3) [Pa orhlei in kanmah caah kan nawl piak,
Maw kan Bawipa, run kan zangfah ko.] 2
5. GLORIA
Z. Cungchin Pathian sinah sunparnak um ko sehlaw, vawlei cung lungthin tha mi hna sinah daihnak um ko seh. Kanin thangthat, kanin conglawmh, kanin biak, kanin sunsak, na sunpar lianngannak caah lawmhnak kanin pek, Bawipa Pathian, vancung Siangpahrang, Maw Bawipa Pathian, Zeizongtuahkho kan Pa. Bawi Jesuh Khri,Fapa ngeihchun, Bawipa Pathian, Pathian Tuufa, Pa Pathian Fapa, vawlei sualnak a kalpi tu, run kan zaangfah ko tuah; vawlei sualnak a kalpi tu, kan thlacamnak rak cohlang ko; Pa awrhlei kam ah a thu mi, run kan zaangfah ko tuah. Zeicatiah nangmah lawng a Thiangmi na si; nangmah lawng Bawipa na si,nangmah lawnga sangbik na si, Jesuh Khrih, Thiang Thlarau he
Pa Pathian sunparnak chungah. Amen.
(asiloah)
T. Cungchin Pathian sinah sunpartnak um seh.
1. Lungthin tha lei mi cungah, Na daihnak tlung cang ko seh; Lianngan mi kan Pa Pathian, Zeizong tuah kho Siangpahrang, Nangmah lawng kanin cawnglawmh, Kannin chimthiam, kanin biak, Na min thangthatnak ca’h,Lawmhnak kanin pek.
2. Pa Pathian ngeihchun Fapa, Kan Bawipa Jesuh Khrih cu,Leicung sualnak kalpitu, Pathian Tuufa, kan Bawipa,Kannih kha kan zangfah tuah,Pa Pathian orhlei thu mi,Kan thlacamnak kha,Bawipa rak cohlang ko.
3. Zeitintiah nangmah lawng kha,A thiangbik cem mi na si;Nangmah lawng Bawipa na si;Nangmah lawng sangbik na si; Maw kan Bawipa Jesuh Khrih, Thiang Thlarau he hmun khat in,Kan Pa Pathian sunparnak chungah. Amen.
T. Thlacam u sih.
(Thlacam kawmh mi kha a cam)
Z. Amen.
6. BAIBAL THIANG RELNAK
7. VOIKHATNAK BAIBAL RELNAK
(Arel dih tikah)
Reltu: Bawipa bia a si.
Zapi: Pathian cungah lawmhnak um ko seh.
8. PSALM HLA LEHNAK
9. VOIHNIHNAK BAIBAL RELNAK
(Arel dih tikah)
Reltu: Bawipa bia a si.
Zapi: Pathian cungah lawmhnak um ko seh.
10.ALLELUIA (asiloah) THAWNGTHA AUPINAK
(Mah lio ah rimhmui kha hman a si ah cun tlangbawi nih angthling kha a bawm ah a sanh. Cu hnu cun thawngtha a rel hngatu cu Deacon a si ahcun tlangbawi hmai ah a kun i aw dintein thluachuah a hal.)
Deacon: Na thluachuah, ka Pa.
(Tlangbawi nih aw din tein a chim)
T. A Thawngtha kha a tlakte le tha tein na phuan khawhnak hnga Bawipa cu na lungthin chung le na hmurka ah um ko seh: Pa le Fapa + le Thiang thlarau min in. Deacon: Amen.
(Thawngtha reltu cu tlangbawi a si ahcun, biaktheng hmaiah kun in dai tein a chim)
Zeizong tuahkho Pathian, na Thawngtha thiang kha a tlak tein ka phuan khawhnak hnga ka lungthin le ka hmurka hi run thianter ko.
T. Bawipa cu nanmah he um ko seh.
Z. Na Thlarau he zong um ko seh.
T. Mt ... Thawngtha thiang bangin relnak a si.
Z. Maw Bawipa, Nangmah cungah sunparnak um ko seh.
(A dih tikah)
T. Bawipa Thawngtha bia a si.
Z. Maw Bawi Khrih, Nangmah cungah Thangthatnak um ko seh,
(Cun Bible kha a hnamh i din tein a chim)
Thawngtha bia thawngin kan sualnak cu hnawh si dih ko seh.
11. PHUNGCHIMNAK
12. GREDO -
ZUMNAK BIA PHUANNAK
(1) Nicene Zumhnak bia
Pathian pakhat ka zumh. Van le vawlei, Hmuh khawhmi le hmuh khawhlo mi vialte sertu, Zeizong tuah kho kan Pa kha ka zumh. Zeizong vialte um hlanah Pa nih hrinmi, Pathian Fapa ngeihchun, Bawi pakhat Jesuh Khrih ka zumh. Pathian in Pathian, Ceunak in Ceunak, Pathian taktak in Pathian taktak; sermi si lo in hrinmi a si, Pa he sinak anni khat; amah thawngin zeizong vialte cu ser an si. Kanmah minung caah le kan khamhnak caah vancung in a rung tum."Thiang Thlarau in Ngaknu Thiang Mary chungin Thisa semnak a lak i, minung ah a cang”. Kanmah caah Pontias Pailat kuttang ah vailam antah, a thi i an vui, Cathiang ningin nithumnakah a thothan.Vancung ah a kai i Pa orhleikam ah a thu.Mithi le minung biaceih awkah sunparnak he a ra than lai i a pennak cu a dong lai lo.Bawipa le nunnak petu Thiang Thlarau ka zumh, amah cu Pa le Fapa sinin a chuak, Pa le Fapa he biak le thangthat a si, profet hna in bia a chim. Pakhat a si mi, a thiangmi, le Lamkaltu hna he aa pehtlaimi Catholic Bupi ka zumh.Sualngaih thiamnak caah tipilnak pakhat ka zumh. Mithi thawhthannak le a ra lai mi zungzal nunnak ka hngak. Amen.
(2) Lamkaltu hna i zumhnak
(Lent caan hman khawh a si)
Z. Zeizong tuahkho, van le vawlei sertu Pa Pathian ka zumh. Thiang Thlarau in a pawi i Ngaknu Thiang Mary nih a hrinmi, Pathian, Fapa ngeihchun kan Bawipa Jesuh Khrih ka zumh. Pontias Pailat kut ah temhnak a in, vailam an tah, a thi i an vui, mithi khua ah a tum i nithumnak ah mithi sinin a thothan. Vancung ah a kai i zeizong tuahkho Pa Pathian orhleikam ah a thu. Khi hmun in mithi le minung biaceih awkah a rung tum than lai. Thiang Thlarau, a thiangmi Katholik Bupi, mithiang mi pumkhat sinak,sualngaihthiamnak, pum thawhthannak le zungzal nunnak ka zumh. Amen.
(asiloah)
T. Pathian pakhat lawngte ka zumh.
1. Zeizong tuah kho kan Pa Pathian ka zumh.Van le vawlei a Sertu, Bawipa Jesuh Khrih Pathian Fapa ngeihchunh, Zungzal in hrin mi ka zumh.
2. Pathian in Pathian, Ceunak in Ceunak; Pathian ngaite in Pathian; Serchawm in si lo, hrinmi fapa a si.Pa Pathian he an i khat.
3. Amah thawngin zeizong vialte ser a si.Kanmah le kan Khamhnak ca’h. Vancung ram in hi vawlei ah a rung tum,Thiang Thlarau thawnnak thawngin.
4. Ngaknu thiang Mary chungin nau a sem; Minung taktak ah a cang;Pontias Pailat kutah vailam ah an tah,Kan ca’h a thi i an vui.
5. Nithumnak ah Lianngan in a thothan,Baibal thiang tialtak bangin; Sunpar lianngannak he vancung ah akai;Pathian orhlei ah a thu.
6. Mithi minung vialte biaceuh awkah; Sunparnak he a tum lai; A pennak cu zungzal dong lo a hmun lai; Hi bia vialte cu ka zumh.
7. Bawipa le nunnak pe tu Thiang Thlarau;Pa Fapa in a chuak mi;Pa le Fapa he biak le thangthat a si,Profet hna in bia a chim.
8. Pakhat le a thiang Katholik Bupi; Lamkaltu he a peh mi; Sual ngaihthiamnak le pum thawhthannak ka zumh.a zungzal nunnak ka hngak. Amen.
13. DUH HERHMI HALNAK (Mt 7:7)
T. Ka dawtmi u le nau hna, “Hal u law, pek nan si lai; kawl u law, nan hmuh lai; king u law, Innka hunh nan si lai,” tiah kan Bawipa Jesuh Khrih nih a kan chimh bantuk in Katholik Bupi ca le a herhmi vialte kha Jesuh Khrih min in kan Pa Pathian sinah lungkhattein hal u sih.
01. Kan Nu Bupi kha thluachuah na peknak hnga caah.
Z. Maw Bawipa kan Pa Pathian, nang kha kan in hal.
asiloah
Z. Maw Bawipa kan thla-camnak run kan ngai piak.
02. Kan Pope N ... kha na kilven na zohkhenh nak hnga caah. Z/
03. Siangbawi hna, brother, sister hna le saya hna nih na duhnak bang an zulh khawhnak hnga caah. Z/
04. Mino tampi cungah Pathian riantuan duh nak lungthin na peknak hnga caah. Z/
05. Vawlei cung kakip ah remnak le daihnak a umnak hnga caah. Z/
(A tang i thlacamnak hna chung khan le a dang a tlak mi zong cam chih awk a si.)
01. Krifa vialte hna kha lungthin khatte na siternak hnga caah.
02. Khrih a zum rih lo mi hna kha ceunak na peknak hnga caah.
03.Bawi Jesuh Kri caah sifah harnak le hremnak a ingmi hna kha thazangna peknak hnga caah.
04. A daithlang mi Khrifa unau hna kha biaknak lei ah na zuamter thannak hnga caah.
05. Biatak a kaltak mi kan unau hna kha na tuu kawm chungah na luhter thannak hnga caah.
06. Atu biaknak ah aa tel mi kannih vialte kha zumhnak,ruahchannak le dawtnak chungah na kan hmunhternak hnga caah.
07.Kawlram chungah Bawipa pennak a kauhnak hnga caah.
08. Khrifa unau hna nih a hmaan mi dawtnak taktak ngeih in lungkhat thinkhat in an um khawh nak hnga caah.
09. Kannih le Khrihfa vialte hna kha kan thih tiang zumhnak chungah na kan hmuhternak hnga caah.
10. A zaw mi kan u le nau hna kha damnak na peknak hnga caah.
11. Na daihnak chungah kan thih khawhnak hnga caah.
12.A thi cia mi hna an thlarau cu na zangfahnak hmu in daihnak ah an i dinh khawhnak hngacaah.
13. Nifate kan herhmi tirawl le ngandamnak na kan peknak hnga caah.
14. Thlaikho kha na `thanter i rawhralnak in na himternak hnga caah.
15. Ti le mei le thlichia ral in na kan khamhnak hnga caah.
16. Zawtfahnak, mangtaam le raltuknak in na kan khamhnak hnga caah.
17. Kan tuukhal a si mi kan Bishop N...... kha na zohkhenh i na miphun kha lam dingin a kan hruai khawhnak hnga caah.
T. Kan thazaang le kan dornak a si mi maw Bawipa Pathian, Jesuh Khrih min in na dawtmi na fale hna kan halnak hi run kan copiak ko.
Z. Amen
.
BAWIPA THISA BIAKNAK
14. PEKCHANHNAK
Pekchanhnak hla:
(Pekchanhnak hla sak lio ah raithawinak thilri pawl cu biaktheng cungah chiah a si. Krihfa hna nih an laksawng kha an rak put khawh ahcun a tha, missa raithawinak ca lawng silo in Bupi herhbaunak ca le mi sifak hna bawmhnak ca zong a tel ah a tha.)
15. CHANGREU PEKCHANHNAK (Hla)
T. Zeizong vialte sertu Bawipa Pathian, nangmah cu thluachuak mi na si, zeicatiah na thatnak thawngin kannih nih kanin pekchanh mi changreu kha kan hmuh; vawlei theitlai le minung kut riantuannak in a si mi hi changreu cu kanmah caah nunnak changreu ah a cang lai.
Z. Pathian cu zungzal in thangthat si ko seh.
16. MISURHANG PEKCHANHNAK
(Deacon asiloah tlangbawi nih misurhang le ti tlawmpal kha hrai ah a thlet i dai tein a chim)
T. Hi ti le misurhang biathuk in kan minung sinak hrawm awkah amah le amah aa tawidor mi Khrih Ka Pathian sinak kha kan hrawm ter ve ko tuah.
T. Zeizong vialte Sertu Bawipa Pathian, nangmah cu thluachuak mi na si, zeicatiah na thatnak thawngin kannih nih kanin pekchanh mi misurhang cu kan hmuh; misur theitlai le minung kut riantuannak in a si mi hi misur hang cu kan thlarau din awk ti ah a cang lai.
Z. Pathian cu zungzal in thangthat si ko seh.
(Mah hnu ah tlangbawi nih kun in dai tein a thli te-in a chim)
T. Maw Bawipa, a tawidawr mi thlarau le lungthin a kuai mi kannih kha kan cohlang ko law, nihin na hmaika i kanin pekchanh mi kan raithawinak hi na lung rak tling ko, Bawipa Pathian.
(Cun tlangbawi cu a kut aa tawl)
T. Maw Bawipa, ka thatlonak in ka tawl law ka sualnak in ka thenh ko.
(Tlangbawi nih a kut kha a zamh i a komhthan bu in a chim)
T. U le nau hna, keimah le nanmah i raithawinak hi zeizong tuahkho Pa Pathian sinah cotlak mi a sinak hnga thlacam ko u.
Z. A min thangthatnak le sunparnak ca le, kanmah le a thiangmi a Bupi dihlak thatnak caah Bawipa nih na kut in pekchanh mi raithawinak hi rak cohlang ko seh.
T. Thlacam u si.
(Laksawng cung thlacamnak)
Z. Amen.
17. BAWIPA THISA THLACAMNAK - II
T. Bawipa cu nanmah he um ko seh.
Z. Na Thlarau he zong um ko seh.
T. Nan thinlung i hliphlau u.
Z. Bawipa sinah kan thinlung kan i hliphlau ko.
T. Bawipa kan Pathian kha lawmh cio u sih.
Z. A tlak i a ding ko.
BIAHMAITHI
T. A thiangbik kan Pa Pathian, na dawtbik mi na Fapa Jesuh Khrih thawngin a zungzal catlo in khuazakip ah lawmhnak pek hi a tlak le a ding taktak mi, kan rian le kan khamhnak a si; Amah cu zeizong vialte na sernak na bia a si i, kan Khamhtu le Tlanhtu in na rak thlah; Amah cu Thiang Thlarau thawng in minung ah a cang i, Ngaknu Thiang nih a hrin. Na duhnak tlinter awk caah le a thiangmi miphun kha An hmuhpiaknak hnga caah sifah temhnak a in lio ah A za a zau, A thihnak nih Temtawntu thihnak hri kha a chah i thawh`hannak kha a langhter. Cuasicaah vanmi le mithiang vialte hna he na sunparnak kha kan thanh i aw khat tein kan sa / (aupi)…
18. SANCTUS
A Thiang, A Thiang, A Thiang Vanmi run Bawipa Pathian. Van le vawlei cu na sunparnak in a khat. A sangbik hmun ah hosana, hosana. Bawipa min in a ra mi cu thluachuakmi a si. A sangbik hmun ah hosana, hosana.
(asiloah)
Z. A thiang, A thiang Lianngan Bawipa Pathian,A thiang i lei le van thangthatnak he a khat, A sangbik ah Hosana, Hosana,Bawipa min in a ra mi nih, thluachuahnak um seh. A sangbik ah Hosana, Hosana,A sangbik ah Hosana, Hosana.
T. Maw Bawipa, nangmah cu a thiang taktak mi, thiannak vialte chuahnak tiput na si. Cucaah hi laksawng hna cungah na Thlarau kha
dap ti bang run thlah in run thianter ko hna law kanmah caah kan Bawipa Jesu Kri i Pum + le Thi ah rak canter hram ko tiah thla kan cam. Amah kha an rawi i lungtho tein temhin nak chung a luh caan ah, changreu kha a lak i lawmhnak bia a chim, changreu kha a cheu i a zultu kha a pek hna i a chim mi cu;
Mahhi i lak u law, nan dihlak in ei u. Zeicatiah mahhi cu nanmah caah pek hnga mi ka pum a si.
Cu bantuk in zanriah an ei dih tikah, hrai kha a lak i lawmhnak bia a chim `han hrai kha a zultu kha a pek hna i a chimmi cu –
Mahhi i lak u law nan dihlak in mah hin ding u, Zeicatiah mahhi cu ka thi hrai a si, Sualnak hna ngaihthiamnak Caah, Nanmah le mi tampi caah thlet hnga mi A thar le a hmun zungzal mi biakamnak thi a si. Mahhi Keimah Ruahnolhnak in tuah u.
T. Zumhnak biathuk a si.
(1) Khrih a thi,
Khrih a thothan,
Khrih a ra Than lai.
(2) Nangmah thihnak cu kan thanh i Bawipa,Nangmah na rat hlan lo tiangin,Na thawh thannak zong cu mihmai ah kan theihter.
T. Cucaah, kannih nih a Thihnak le Thawhthannak philhlonak kan tuah bangin Bawipa, nangmah sinah hi nunnak changreu le khamhnak hrai kha kanin pekchanh, kanmah kha na hmaika i um awkah le na riantuan awkah a tlak mi in na kan rel caah na cungah kan lawm ngaite. Khrih Pum le Thi kan hrawmnak in kanmah kha Thiang Thlarau in pumkhat ah kan pumh ko tiah toidawr tein na sinah thla kan cam. Bawipa, vawlei cung kakip ah aa thekzamh mi na Bupi kha rak philh hin hlahlaw kan Pope N … le kan bishop N… le tlangbawi vialte he dawtnak tlinnak ah rak hruai ko tuah.
__________________________________________________________________________________________________________ (Mithi caah)
Hi vawlei in(nihin) nangmah sinah na auh cangmi na sal N … kha(hi) rak philh hin hlah. Amah thihnak bang athihnak thawng in na Fapa he aa kawmhmi amah kha a thawhthannak ah amah he pumkhat rak siter ve ko tuah.
Thawhthannak ruahchan in aa hngilh cang mi kan u le nau hna le na zaangfahnak chungah a thi cang mi vialte hna kha rak philh hin hna hlahlaw na hmai ceunak chungah rak luhter ko hna.
Kanmah vialte zong kan zaangfah ko tiah thla kan cam. Thluachuak mi Ngaknu Thiang Mary Pathian Nu, thluachuak mi Joseph, thluachuak mi Lamkaltu hna le, a chanchan ah nangmah lung a tongmi mithiang vialte hna he hmunkhat in, zungzal nunnak ro co tu kan sinak hnga le nangmah kha kanin thangthat i sunparnak kanin pek khawhnak lai run kan bawm ko, na Fapa Jesu Kri thawng in.
Amah thawngin, amah he, amah chungah,Maw, zeizong tuahkho kan Pa Pathian,Thiang Thlarau komhnak chungah Sunparnak le upatnak vialte cu nangmah Ta a si, A zungzal dong hin lo in. Z. Amen.
19. BAWIPA THISA EINAK
T. Khamhtupa nih akan cawnpiakmi thlacamnak kha zumhnak in cam usih.
Bia. Vancung a um kan Pa,Na min thiang ko seh;Na pennak tlung ko seh,Vancung bantuk in lei cungah na duhnak tuah si ko seh.Nifa kan herhmi rawl kha nihin kanpe ko sawh,Kan cungi a sualmi kan ngaihthiam hna bangin, kan sualnak kan ngaithiam ve tuah; Sualforhnak ah phakter lo in thatlonak in kan khamh tuah.
Z. Zeitintiah pennak le, nawlngeihnak le sunparnak cu nangmah ta a si, atu le a zungzal donghin lo in.
(asiloah) Hla in,
Hla. Vancung ah um kan pa Pathian,Na min thiangthang ko seh.Na pennak tlung cang ko sehlaw,Na min thiangthang ko seh;Vancung bantuk in leicungah,Na duhnak tling ko seh.Sunparnak le lianngannak cu zungzal na ta a si.
(2) Pawcawmnak khim in nifa rawl run kan pe ko Bawipa.Minih kan cung an sual tikah,Kan ngaihthiam hna bangin;Kan sualnak kha tam hmanh sehlaw,Kan ngaithiam ve ko tuah.Sualforhnak ah phak ter lo in,Thatlonak in kan kham.
Hla. Z . Zeitintiah pennak aa na le sunparnak lianngannak,Zungzal thangthatnak vialte cu Nangmah i ta a si.
T. Maw Bawipa, thatlonak vialte in kan khamh ko tiah kan nin nawl, Atu kan chan chungah daihnak run kan pe ko law, na zaangfahnak in sualnak khan kan luatter law, lungretheihnak a phunphun khan kan huppheng ko tuah. kannih cu kan khamhtu Jesuh Khrih rat nak kha asunglawi mi ruahchannak in kan hngah ko.
T. Maw Bawipa Jesu Kri, na Lamkaltu hna sinah, “nanmah sinah daihnak kan chiahtak hna, keimah daihnak kan pek hna,” tiah na chim bangin , kan sualnak kha zoh hlahlaw, na Bupi zumhnak kha zoh in, na pennak i daihnak le lung khahnak kha run ka pe ko, a zungzazal a nung i akan uk tu Bawipa.
Z. Amen.
T. Bawipa daihnak cu nanmah he um zungzal ko seh.
Z. Na Thlarau he zong um ko seh.
(Deacon a siloah siangbawi nih a chim)
T. Pakhat le pakhat daihnak hmelchunnak i pe u sih.
(Cun changreu kha a cheu i a pel te kha hrai chungah a chiah i aw dinte in a chim)
T. Hi kan Bawipa Jesu Kri Pum le Thi an i Cawhnak nih hin a cohlangtu kannih kha Zungzal nunnak ah kan hruai ko seh.
20. AGNUS DEI
Pathian Tuufa, vawlei sualnak a kalpitu,Kannih run kan zaangfah tuah. Pathian Tuu-fa, vawlei sualnak a kalpitu,Kannih run kan zaangfah tuah.Pathian Tuufa, vawlei sualnak a kalpitu,Kannih Daihnak kan pe ko.
(asiloah)
AGNUS DEI
Agnus Dei, qui tollis
peccata mundi:
Miserere nobis.
Agnus Dei, qui tollis peccata
mundi: Miserere nobis.
Agnus Dei, qui tollis
peccata mundi:
Dona nobis pacem.
(Cun tlangbawi nih daite in a chim)
T. Bawi Jesuh Khrih, a nungmi Pathian Fapa, Pa Pathian duhnak le Thiang Thlarau riantuannak in, Na thihnak thawngin vawlei kha nunnak a petu, hi a thiangbik na pum le thi in ka sualnak vialte le thatlonak vialte in ka luatter ko; Na nawlbia cungah zumhtlak ka siter zungzal ko law, Nangmah sinin ka thenter hin hlah.
(asiloah)
Na pum le thi ka cohlannak nih hin Bawi Jesuh Khrih, biaceihnak le sualphawtnak ah ka phakter hin hlah. Sihmansehlaw na zaangfah dawtnak thawngin ka caah lungthin le pumsa hupphenhnak le damnak sii run siter ko.
T. Pathian Tuufa hi zohhmah u, Vawlei Sualnak a kalpitu hi zohhmanh u. Tuufa zanriah ah kawh mi hna cu thluachuak mi an si.
Z. Bawipa, ka inn chungah na luhnak hnga kaa tlak lo, Sihmanhsehlaw bia kaa khat lawng chim law ka thlarau cu a dam cang lai.
(tlangbawi nih biaktheng lei hawih in din tein a chim)
T. Khrih Pum nih zungzal nunnak caah him tein ka kilveng ko seh.
T. Khrih Thi nih zungzal nunnak caah him te in ka kilveng ko seh.
(Bawipa thisa pek tikah)
T. Khrih Pum a si.
Z. Amen.
(Kheng le hrai tawl lio ah)
T. Kan kaa chungah rawl in a lut mi hi, maw Bawipa, Lungthin thiang in kan ngeihter ko law, Atu caan ah pek kan si mi hi zungzal nunnak Caah kan damnak run siter ko.
(Adih tikah Tlangbawi nih a chim)
T. Thlacam u sih.
Z. Amen.
21. DONGHNAK
T. Bawipa cu nanmah he umko seh.
Z.Na Thlarau he zong um ko seh.
T. Zeizong tuahkho Pathian, Pa le Fapa le Thiang Thlarau nih thlua in chuah Ko hna seh. Z. Amen.
(asiloah)
T. Zeizong tuahkho Pathian, Pa le Fapa le Thiang Thlarau thluachuahnak Cu nanmah cungah tum sehlaw hmun Zungzal ko seh.
Z. Amen.
(Pontifical Missa a si tikah)
T. Bawipa cu nanmah he um ko seh.
Z.Na Thlarau he zong um ko seh
T. Zeizong tuahkho Pathian, Pa le Fapa le Thiang Thlarau nih thlua in chuah ko hna seh.
Z. Amen.
(Cun Deacon asiloah tlangbawi nih)
T. Missa raithawinak a dih cang. Daihnak ( Lawmhnak) he va kal cang u.
(asiloah)
Kal u law Bawipa Thawngtha kha va thanh u.
(asiloah)
Daihnak in kal cang u, nan nunnak in Bawipa kha sunparnak va pe u.
(asiloah)
Daihnak in kal cang u.
Z. Pathian cungah lawmhnak um ko seh.
**********LAWMHNAK BIA HNA
Advent I
Kan Pa, zeizong vialte a tuah kho i a zungzal a nung mi Pathian, kannih nih a zungzal cat loin khuazakip ah kan Bawipa Jesu Kri thawngin lawmhnak kanin pek. Minung in kan sin rat awkah amah le mah aa niamter tikah hlanliopi in na rak tinh mi na khuakhannak kha a tlinter i, kan caah khamhnak lam kha a hun. Atu ah kannih nih Kri kan Bawipa sunparnak he a rat than tik i kanmah sinah kamh mi khamhnak kan ta si lai ni kha ruahchan in kan hngak. Cu asicaah vancung i vanmi hlaremhbu vialte he na sunparnak kha kan thanh i, dong loin an sak mi thangthatnak hla kha kan sak ve.
Krismas I
Kan Pa, zeizong vialte a tuah kho i zungzal a nung mi Pathian, kannih nih a zungzal cat loin khuazakip ah kan Bawipa Jesu Kri thawngin lawmhnak kanin pek. Khuaruahar minung gcannak ah zungzal a hmun mi na Bia nih zumhnak mit ah na sunparnak kha a thar le a tleu in a langhter. Amah chungah kan Pathian cu kan hmuh khawh. Cuticun kan muh khawhlo mi Pathian a dawtnak nih a kan dawp. Cu asicaah vancung i vanmi hlaremh bu vialte he na sunparnak kha kan thanh i, dong loin an sak mi thangthatnak hla kha kan sak ve.
Lent I
Kan Pa, zeizong vialte a tuah kho i a zungzal a nung mi Pathian, kannih nih a zungzal cat loin khuazakip ah kan Bawipa Jesu Kri thawngin lawmhnak kanin pek. Hi velngeihnak khuacaan hi thlarau ah kan tharchuahnak hnga na chungkhar sinah na kan pek mi laksawng a si. Kan lungthin thenh awk, kan pumsa duhnak i sum awk le luatnak in na rian tuan awkah thazang na kan pek. A liam lengmang mi hi vawlei kan nunlio ah kan lungthin kha vancung ah chiah in zeitin nun awk a si ti kha na kan cawnpiak. Atu ah, mithiang hna le vanmi vialte he, kanin thangthat zungzal.
Thawhthan I
( Thawhthan Zarh chung hman awk)
Kan Pa, zeizong vialte a tuah kho i a zungzal a nung mi Pathian, kannih nih a zungzal cat loin khuazakip ah kan Bawipa Jesu Kri thawngin lawmhnak kanin pek.Kri kan lanhtak thawinak a can caan, hi thawhthan zan (ni) (caan) chungah hin a ngan deuh chinchin mi lawmhnak in kanin thangthat. Amah cu hi vawlei sualnak a kalpitu Tuufa taktak a si. A thihnak in kan thihnak kha a hrawh; A thawhthannak in kan nunnak kha a hmuh than. Cu asicaah vancung i vanmi hlaremh bu vialte he na sunparnak kha kan thanh i, dong loin an sak mi thangthatnak hla kha kan sak ve.
Thawhthan II
Kan Pa, zeizong vialte a tuah kho i a zungzal a nung mi pathian, kannih nih a zungzal cat loin khuazakip ah kan Bawipa Jesu Kri thawngin lawmhnak kanin pek. Kri kan lanhtak thawinak a can caan, hi thawhthan caan ah hin a ngan deuh chinchin mi lawmhank in kanin thangthat. Anih nih ceunak fale ah a kan ser. Zungzal nunnak thar ah a kan cawisan. Amah a zum mi hna kha luhpi awkah vancung innka kha a hun cang. A thihnak cu thihnak in a kan tlanhnak a si, a thawhthannak cu nunnak ah kan thawhthannak a si. Van hlaremhbu nih na sunparnak kha an sak lio ah, thawhthan lawmhnak nih vawlei pumpaluk kha a tharchuah.
Vancung Kai Puai
Kan Pa zeizong vialte a tuah kho i a zungzal a nung mi Pathian, kannih nih a zungzal cat loin khuazakip ah lawmhnak kanin pek. (Nihin) Bawi Jesu, a lianngan Siangpahrang, sualnak le thihnak Teitu cu, vanmi hna nih a thangthatnak hla an sak lio ah vancung ah a kai. Kri, Pathian le minung karlak tangtu, vawlei biaceihtu le mi vialte Bawipa cu, kan mithmuhnak pinlei ah a liam, a kan hlawt caah a si lo, kan ruahchannak si awk caah a si. Kri cu hramthawhnak, Bupi lu a si; A kalnak ah zulh awk kan i ruahchan. Van hlaremh bu nih na sunparnak an sak lio ah, thawhthan lawmhnak nih vawlei pumpaluk kha a tharchuah.
Pentecost Puai
Kan Pa, zeizong vialte a tuah kho i a zungzal a nung mi Pathian, kannih nih a zungzal cat loin khuazakip ah lawmhnak kanin pek. Nihin na Fapa neihchunh i nunnak kha hrawmnak in, na fale si awkah na tinh mi hna cungah Thiang Thalarau kha na rak thlah. Cuticun lanhtak biathuk kha na tlinter. Nihin ah Thiang Thlarau nih mi vialte kha a hmaan mi Pathian pakhat kha a hngalhter hna i holh phunkip nih zumhnak pakhat kha aw khat tein an phuan ni, na Bupi hramthawhnak puai kha kan tuah. Van hlaremh bu nih na sunparnak an sak lio ah, thawhthan lawmhnak nih vawlei pumpaluk kha a tharchuah.
Thumkomh Pathian Puai
Kan Pa, zeizong vialte a tuah kho i a zungzal a nung mi Pathian, kannih nih a zungzal cat loin khuazakip ah lawmhnak kanin pek. Kannih nih Pathian na sinak kong biathuk cung i kan zumhnak kha lunglawm ngai in kan phuan. Na sunparnak kha na Fapa i sunparnak le Thiang Thlarau i sunparnak zongin na phuan cang: sunpar lianngannak ah aa tluk mi Mi (Persons) Pathum, ceunak le dawhnak ah aa thenlo mi, Bawipa pakhat, Pathian pakhat na si thiamthiam i, zungzal a hmun mi na sunparnak ah biak zungzal awk na si. Cu asicaah, vancung i vanmi hlaremh bu he na sunparnak kha kan thanh i dong loin an sak i thangthatnak hla kha kan sak ve.
Bawipa Thisa Thiang
Kan Pa, zeizong vialte a tuah kho i a zungzal a nung mi Pathian, kannih nih a zungzal cat loin khuazakip ah kan Bawipa Jesu Kri thawngin lawmhnak kan in pek. Hmanungbik zanriah ei lio ah, a lamkaltu hna he cabuai ah a thu i, nangmah kha thangthatnak tling an pe i cotlak mi laksawng, dotla tuufa in nangmah sinah a pum kha a pek. Kri nih hi a temhinnak philhlonak kha caan a dongh hlantiang khamhnak a pe mi thawnnak kan hmuh awk caah a kan pek. Hi sacrament sunglawi ah hin na miphun kha na dangh hna i, an thiannak hnga thazang na pek hna i, minung chungkhar kha zumhnak pakhat i ceunak le dawtnak pakhat chungah na nunter hna. Cu asicaah hi khuaruahhar sacrament kha ei awkah na cabuai ah kan ra i, a thothan mi Kri he i lawhnak ah kan thang. Vawlei cu van he sernak hla thar kha sak awkah aa komh i, kannih nih nangmah kha kanin biak i kanin thangthat zungzal.
Kri Siangpahrang Puai
Kan Pa, zeizong vialte a tuah kho i a zungzal a nung mi Pathian, kannih nih a zungzal cat loin khuazakip ah lawmhnak kanin pek. Jesu Kri, na Fapa ngeihchun kha, a zungzal tlangbawi le van le vawlei siangpahrang caah lawmhnak chiti na thuh. Tlangbawi a sinak in vailam biaktheng cungah a nunnak kha a pek i, hi a tling mi daihnak thawinak pakhat in minung phun kha a tlanh. Siangpahrang sinak in sermi vialte cungah uknak nawl kha ka ngei a ti, cucu a lianngan mi a Pa, nangmah sinah a zungzal a hmun i van le vawlei a hup dih mi pennak kha pek awkah a si; Cucu biatak le nunnak pennak, thiannak le vel pennak, dinnak, dawtnak le daihnak pennak a si. Cu asicaah vancung i vanmi hlaremh bu vialte he, na sunparnsk kha kan thanh i, dong loin an sak mi thangthatnak hla kha kan sak ve.
Thluachuah Ngaknu Thiang Mary Puai
Kan Pa, zeizong vialte a tuah kho i a zungzal a nung mi Pathian, kannih nih a zungzal cat loin khuazakip ah sunparnak i a um mi na mithiang hna kha kan ruah hna bangin na laksawng hna caah lawmhnak le thangthatnak kha kanin pek. Thluachuah a hmu mi Ngaknu Thiang Mary philhlonak kan tuahnak ah hin a lawmhnak hla sak ve hi ka lunglawmhnak bik a si. Zeibantuk khuaruahharnak dah vawleicung kakip ah khan na tuah cang. Nangmah nih a nauta mi na salnu Mary kha na vun zoh tikah amah kha na Fapa, kan Bawipa, mi vialte Khamhtu, Jesu Kri a Nu si awk caah na cawi. Amah thawngin vancung i vanmi hna nih na hmaika ah an i lawmh bangin an biaknak thlacamnak kha anin pekchanh. Kanmah hna zong anmah hna he aw khat tein teinak thangthatnak hla an sak mi kha kan sak ve.
Mithiang Vialte Puai
Kan Pa, zeizong vialte a tuah kho i a zungzal a nung mi Pathian, kannih nih a zungzal cat loin khuazakip ah lawhnak kanin pek. Nihin kannih nih van Jerusalem, kan nu, khualipi thiang puai kha kan tuah. Na bawi thutdan velchum ah, mithiang mi, kan u le nau hna nih, na thangthatnak an sa zungzal. An sunparnak nih lawmhnak he a kan khahter i, Bupichungah kanmah he an i komhnak in vel ceunak le thazang a kan pek. Zumhnak khualtlawn kan i namchan lio ah, anmah he ton lai kan i ngaih ngaite. Anmah le vanmi vialte hna he i komh in, na thangthatnak kha kan thanh i, aw khat tein kan au:
Thlarau Thiang Hna Caah
Kan Pa, zeizong vialte a tuah kho i a zungzal a nung mi Pathain, kan Bawipa Jesu Kri thawngin a zungzal cat loin khuazakip ah nangmah kha a tlak tein lawmhnak le thangthatnak kanin pek. Mithi lakin a thothan mi Kri ah thawhthannak kong kan i ruahchan mi fingrei cu a cat. Thihnak nih a chuahpi mi ngaihchiatnak nih cun thih khawhlonak kong biakamnak kha lam a kianh cang. Bawipa, nangmah kha an zum mi hna caah cun nunnak cu a dong lo, aa thlen lawng a si. Hi vawlei kan pumsa cu thihnak in aa hngilh tikah, vancung ah a zungzal a hmun mi umnak hmun kha kan hmuh lai. Cu caah vancung i vanmi hna he hmunkhat in na sunparnak cu kan thanh i, dong loin na thangthatnak hla kan sa.