ZARHTHUMNAK EASTER NITHUM NI
April 17, 2024
Lectionary: 275
Lamkaltu pawl kha dah ti lo cu, a zummi vialte kha Judea ram le Samaria ram ah an i ṭhek dih. 2 Steven kha biaknak lei i aa biatakmi a cheu nih an vui i fak piin an ṭah. 3 Sihmanhsehlaw Saul nih khan khrihfabu cu hrawh aa zuam; inn khat hnu inn khat in a kal i a zummi hna kha nu thlulo pa thlulo in a hnuh hna i thong ah a thlak hna. 4 Zumtu aa ṭhekmi kha a kenkiplo ah an kal i an kalnak paoh ah thawngṭha kha an chim. 5 Filip cu Samaria ram khua ah khan a va kal i Messiah kong kha a va chimh hna. 6 Filip nih a chimmi kha mizapi nih ṭha tein an ngaih. A chimmi kha an ngaih i khuaruahharnak a tuahmi kha an hmuh. 7 Mi tampi chungin khuachia kha aupah in an chuak i a zengmi le a beimi mi tampi kha damnak an hmu. 8 Cucaah Samaria ah cun lawmhnak nganpi a um.
R. Mi vialte hna, Pathian cu lunglawmhnak in thangṭhat tuah u!
Mi vialte hna, Pathian cu lunglawmhnak in thangṭhat tuah u! 2 A sunglawimi a min kha hla in thangṭhat u, sunparnak in thangṭhat u. 3 Pathian sinah cun, "Na tuahmi thil hi zeitluk in dah khuaruahhar an si.
4 Vawlei cungmi vialte nih an in biak i hla in an in thangṭhat, na min kha hla in an thangṭhat," tiah chim u. 5 Ra u law Pathian nih a tuahmi thil hi zoh hna hmanh u, minung sinah a tuahmi thil khuaruahhar hi zoh hna hmanh u.
6 Rili cu vawlei ro ah a canter i kan pupa hna nih tiva cu an ke in an tan. Cuka ah cun, a tuahmi thil ruangah khan kan i lawm. 7 A ṭhawnnak in a uk zungzal i miphun hna cu a ngiat zungzal hna.
R. Alleluia, alleluia.Jn 6:40
Zeicahtiah Fapa kha a ka hmu i a ka zummi paohpaoh cu ni hmanung bik ni ah nunnak i thawhter kha ka Pa nih a duhmi cu a si," a ti.
Thawngthabia Johan 6:35-40
. 35 Jesuh nih cun, "Nunnak changreu cu keimah hi ka si. Ka sin i a rami cu ahohmanh an rawl a ṭam lai lo i keimah a ka zummi cu ahohmanh an ti a hal lai lo. 36 Sihmanhsehlaw ka chim bang khan, a hmuh cu nan ka hmu cang ko nain nan ka zum duh lo. 37 Ka Pa i a ka pekmi paohpaoh cu ka sinah an ra lai i ka sin i a rami paohpaoh cu ahohmanh ka dawn hna lai lo. 38 Zeicahtiah vancung in ka rung ṭum cu keimah duhnak tuah awkah khan si loin a ka thlahtu duhnak tuah awkah khan a si deuh. 39 A ka thlahtu nih tuah seh ti a ka duhmi cu hihi a si: a ka pekmi vialte kha pakhat hmanh thlau loin, ni hmanung bik ni ah nunnak i an dihlak in thawhter dih kha a si. 40 Zeicahtiah Fapa kha a ka hmu i a ka zummi paohpaoh cu ni hmanung bik ni ah nunnak i thawhter kha ka Pa nih a duhmi cu a si," a ti.