SIRACH 21

Sualnak kha hrial

21    Ka fa, na sual bal maw? Sual ti hlah, cun tuan i na sualnak ca ah ngaihthiamnak hal. 2Sualnak cu rul bantuk in zamtak; na naih ahcun an cuk ko lai. A haa cu chiandeih haa bantuk an si, minung nunnak an lak.  3Phung-buar vialte cu kapnih-har vainam bantuk an si, an hliam mi hna cu an dam kho ti lo.

4Ṭihphannak le zaang-einak nih rumnak cu a thlak, cu bantuk in ngaihchiatnak nih miporhlaw inn cu a hrawh. 5Misifak thlacamnak cu Bawipa sin ah a phan colh, a biaceihnak cu rau lo in a rak phan.  6Cawnpiaknak a hua mi poh cu misual keneh a zulh, Bawipa a ṭih mi poh cu a lung aa thleng.  7Mi kathaw cu mikip nih an hngalh, sihmanhsehlaw mi ralring nih an palhnakkip kha a hngalh. 8Mi tangka in inn i sak cu mah thlaan ca ah lung i khon he aa lo. 9Phungphai ngei lo hna tonnak cu burbuk pon he aa lo, meiphu ah an dih te lai. 10Misual lamthluan cu a mil, nain Mithi khua ah a dong te lai.

Mifim le mihrut

11Phungbia a zul mi nih a lung aa sum kho lai; Bawipa ṭihnak cu fimnak ah a tling. 12Pahrang a ngei lo mi cu cawnpiak khawh an si lo, nain cheukhat pahrang cu lungfahnak a chuahter.  13Mifim hngalhnak cu ding hgnal lo khor bantuk a si i ruahnak a pek mi cu cerhti bantuk a si. 14Mihrut lungthin cu ralca kuai bantuk a si, zei hngalhnak hmanh a khumh kho lai lo. 15Cawnnak a ngei mi nih mifim bia a theih ahcun a a thangṭhat i a chapchih. A lung a tlawm mi nih a theih ahcun a duh lo i hnu a chit. 16Mihrut biachim cu khuallam thilrit bantuk a si, sihmanhsehlaw mifim bia cu ngaih a nuam. 17Mibupi nih minal i bia cu lungtho ngai in an hngah lai, a chim mi kha biatak tein an ruat. 18Mihrut fimnak cu innrop bantuk a si, michupchap hngalhnak cu pehtlaihnak a ngei lo 19Thluak ngei lo ca ah chimhhrinnak cu a ke i cikcin bantuk le a orhlei kut i thirhrenh bantuk a si.

20Mihrut nih a aw dih-um in a nih lio ah mifim nih cun din tein a ni. 21Mizer ca ah cawnpiaknak cu suihlawn bantuk le a orhlei kut cung i banhrolh bantuk a si.

22Mihrut cu inn chung i a luh colh lio ah hmuhtonnak tampi a ngei mi nih cun upatnak he a naih; 23 mihrut cu innka in a bih i cawnpiaknak a ngei mi nih cun leng in a hngah. 24Innka in bia ngaih cu nu le pa chimhhrin lo mi a si lo kha a langhter i khua a hngal mi nih cun cuti tuah cu a ning a zak lai.  25Mikong ceih hmang nih midang bia kha an nolh ṭhan, mifim hna bia cu ṭha tein cuai thlaicia a si. 26Mihrut lung cu an hmurka i a um lio ah mifim hna hmurka cu an lung ah a um. 27Pathian hngal lo nih Satan kha chiat a serh tikah amah lila kha chiat aa serh a si. 28Mi thangchiat hmang nih amah lila kha aa thurhnawmh i innpa hna huatnak a tong.