Tobit 10:1-14

10. 1 Cu lio ah Tobit cu a fapa a tlun lainak nithla lawng kha nifatin a rak rel cang. A nithla cu a tling nain a fapa cu a rak tlung rih lo. 2 Cu tikah amah nih, ‘Khika ah an tlaiter a si lai ti cu ka zum lo! Gabael a thih cang caah ngun tangka a petu an um lai lo ti cu ka zum lo,’ tiah a ruat. 3 A lungre a thei cang. 4 A nupi Anna nih amah cu, ‘Ka fapa cu a thi cang. Amah cu a nung mi hna lak ah a um ti lo!’ tiah a tichih cang. 5 Cun a mitthli a tla i a fapa cu a ṭah cang. Amah nih, ‘Ai zelaw, ka fa, khua ka hmuhnak ka mitmute, nangmah cu ka rak in kalter bal ding a si lo nain,’ ti lawng a chim cang. 6 Cun Tobit nih amah cu, ‘Ngam ko, ka farnu, na thin phang hlah. A him ko. Khika ah anmah a tlaiter ding thil pakhatkhat a cang cang. A khualtlawn hawi cu kan i bochan khawh mi, kan sahlawh rualchan a si ko. Ka farnu na lung dong hlah; A tlung zau ko lai,’ ti in a hnemh. 7 Sihmanhsehlaw a nupi nih a chim lengmang mi bia cu, ‘Dai ko, hlen i zuam hlah, ka fa cu a thi cang’ ti hi a si. Nifatin te ruah lopi in a chuak lai ti ruahnak in a fapa a chuah lainak lamlei a cuan lai. Amah mit dah ti lo cu aho mit hmanh a zum lo. Ni a vung tlak in cun a rak kir lai, hngilh kho lo zan khuadei, mitthli he aa ciah lai.

Raguel nih a fanu ṭhitumnak puai ca chiatserh in bia a rak i kam mi ni hleilinak ni a dih tikah, Tobias cu a sin ah a ra i amah kha, ‘Kal ko cang ning; ka nu le ka pa ca ah keimah hmuh ṭhan ding ruahchannak vialte an lo cang lai. Cucaah ka pa inn ah tlunnak nawl na ka pek nakhnga kan nawl ko. Ka kaltak hna lio ah zei tluk in dah an ngan a fah ti cu kan chimh cang ko kha,’ tiah a ti. 8 Raguel nih Tobias cu a thawh i, ‘Um ko rih, ka fapa, um ko rih. Nangmah kong va chimh awkah na pa Tobit sin ah lamkaltu ka thlah ko lai,’ tiah a ti. 9 Sihmanhsehlaw Tobias nih a pu cu, ‘A si lo, kan nawl hram, ka pa inn ah ka tlunter hram ko,’ tiah a nawlchih. 10 Zei ti hmanh in a si khawh lo tikah, Raguel nih a nupi Sarah cu a kut ah a chanh. Cun Tobias kha a chawva, sal hna, nu he pa he, caw le tuu, khacer le kalauk, thilpuan le phaisa le innchung thilri i hnarcheu kha a pek. 11Cucaah lunglawm thanuam in a tlunter hna. Cun Tobias kha hi thlahnak bia cu a chimh, ‘Ka fapa, dam tein, na lamthluan tluang hram seh! Van Bawipa nih nangmah le na nupi Sarah cu in zaangfah hram hna seh! Ka thih hlan ah na fale hmuh ding cu kaa ruahchan ko,’ tiah a ti. 12 Cun a fanu Sarah kha, ‘Atu na pasal pa inn ah cun va kal ko kun, zei tin tiah a tu thawk in annih cu an hringtu hna tluk in na nu le na pa an si ve cang. Ka fanu, dam tein va kal ko kun. Ka nunchung vialte na thawngṭha lawng theih ka duh’ tiah a ti. Mangṭha kun u a ti i a kalter hna.

13Edna zong nih Tobias cu, ‘Ka fapa le ka ṭate, Bawipa nih in kirpi ṭhan hram ko seh! Ka thih hlan ah nangmah le ka fanu Sarah i fale hna hmu kho ding tiang nung ding in kaa ruahchan ko. Bawipa hmaika ah ka fanu cu nangmah zohkhenhnak tang ah ka chiah. Na nunchung vialte a ngaihchiatter hin hlah. Dam tein ka fapa! Atu thawk in Sarah cu na nupi a si i kei cu na nu ka si cang. A tang mi kan ni le caan cu lunglawm in nung hna usih,’ tiah a ti ve. Cun an pahnih in a hnamh hna i lunglawm thanuam in a thlah hna.

14Tobias cu hnangam ngai in Raguel inn in aa thawh. Lunglawm tein a khualtlawn aa thawh khawh ṭhan caah van le vawlei Bawipa, zeizong vialte Siangpahrang cu a thangṭhat. Raguel le a nupi Edna cu hiti hin thluachuah a pek hna, ‘Ka chan chung vialte nanmah upat cu ka lunglawmhnak ngan bik si hram seh!’ tiah a ti hna.