ESTHER 6

IV: JEW HNA LEHRULHNAK

Haman awlokchonnak

6 Cu zan ah cun siangpahrang cu aa hngilh kho lo, innpi chung i record cauk hna kha a relter hna. 2Cu tikah Ahasueras thah awkah khua a khaang mi innpi kutka vengtu tildit pahnih hna a si mi Biktan le Teres hna he pehtlai in Modekai i thawngthanhnak cu an rel.  3Siangpahrang nih ‘Hi ca ah Modekai cu zei lawmman in dah upatnak an pek?’ tiah a hal hna tikah, ‘Zei lawmman hmanh,’ tiah an leh.  4Siangpahrang zong nih, ‘Aho dah a khaan leng ah a um,’ tiah a hal hna. Cu lio cu amah a dirhmi tung ah Modekai kha thah ding in siangpahrang chimh awkah Haman cu innpi lenglei in a rung luh liote a si.   5Cuka a um mi upa nih, ‘Haman a si i innpi leng ah a um ko,’ tiah an leh tikah, ‘Amah cu luhter u,’tiah a ti hna.   6Haman a rung luh tikah siangpahrang nih amah kha, ‘Siangpahrang nih mi pakhatkhat kha upatnak pek a duh ahcun zei tin dah a tuah lai?’tiah a hal tikah Haman nih keimah hlei in siangpahrang nih aho dah upatnak a pek lai ti a ruah i, 7‘Siangpahrang nih mi pakhatkhat kha upatnak pek a duh ahcun, 8siangpahrang hnipuan kha siangpahrang hnipuan chiahnak in an rak chuahpi lai i rang cu a kawm in an rak hruai lai, cun bawi luchin kha an chinh lai.  9Kha hnipuan le rang cu siangpahrang bawi hna lak i a sang bik bawi nih siangpahrang nih upatnak na pek duh mi pa kha a thuamh lai, cun amah kha rang cung ah ṭhutter i khualipi chung dihlak ah hruai in, “Siangpahrang nih upatnak pek a duh mi cu hiti hin tuahpiak ding a si tiah amah hmai ah kal in a thanh lai,” tiah a ti. 10Cu tikah siangpahrang nih amah kha, ‘Na chim bantuk tein a rannak in thilthuam le rang cu la law chungṭuan zung i a um mi Modekai cu cutin va tuah. Na chim mi vialte kha pakhat hmanh hrelh hlah,’ tiah a ti.  

11 Haman nih thilthuam le rang cu a lak i Modekai cu a timhpiak hnu ah rang cu a citter i amah kha rang in khualipi chung ah hruai piak bu in, “Siangpahrang nih upatnak pek a duh mi cu hiti hin tuah awk a si,” tiah a thanh thluahmah.  12A dih in Mokekai cu innpi ah a rak ṭin i Haman cu lungrawk in a hmai aa khuh i inn ah a tlung ve.   13Amah nih a nupi le a hawile hna cu thil si ning vialte kha a chimh dih hna. A nupi le a hawile hna nih amah cu, “Ţumchuk naa thawk cang i amah cu a kai cang lai; amah cu Jew pakhat a si ahcun na tei bal ti lai lo. Amah nih an doh chung poh cu na tlak ding a fiang cang,” tiah an ti.

Esther rawldanghnak i Haman

14Cuti an chim lio ah cun siangpahrang i tildit hna cu an ra i siangpahrangnu timh mi zanriah ei awkah Haman cu khulrang in an kalpi.