Thawhtthan Zarh (6)nak Cacawn Ninga ni

May 10, 2024 (Year B)

Avoikhatnak Bible

Lamkaltu 18:9-18

9Zan khat cu Paul nih cun langhnak a hmuh i cu ah cun Bawipa nih a thawh i, “Na thinphang hlah; chim lengmang ko, ngol lai cih, 10zeicahtiah keimah nih kan umpi ko. Hi khua chung i a ummi hna lakah hin mi tampi ka minung an si caah ahohmanh nih harnak an in pe kho lai lo,” tiah a ti. 11Cucaah Paul cu cuka ah cun kum khat le a cheu a um i Pathian bia kha a cawnpiak hna.

12Sihmanhsehlaw Gallio cu Rom cozah nih Grik ram uktu bawi ah an ser tikah Judah mi kha an i pum i Paul kha an tlaih i biaceihnak zung ah an chuahpi. 13An i thawh i, “Hi pa nih hin phung ning in si loin Pathian biak awkah khan mi a lem lengmang hna,” an ti.

14Paul nih bia chim a hun i zalh hnek lioah khin Gallio nih cun Judah mi cu a thawh hna i, “Judah mi hna, hi thil hi ṭhat lonak le sualnak tuahnak kongah a si ahcun, nan cungah hin lungsaunak ka ngeih awk cu aa dawhmi zong a si ko hnga. 15Sihmanhsehlaw hi thil cu bia le min le nanmah phung nan i almi kong a si caah nanmahte nih vaa ceih ko u. Cu bantuk thil kong men biaceihtu si cu ka duh lo!” tiah a ti i 16zung chung khan a ṭhawl hna. 17An dihlak cun pumhnak inn haotu a simi Sosthenes kha an tlaih i zung hmaiah cun an velh. Sihmanhsehlaw Gallio nih khan zeihmanh ah a relpiak hna lo.

Antiok Khua Ah An Kir

18Paul cu Korinth khua ah khan ni tam nawn a um hnuah a kaltak hna i Prisilla le Akuila he khan Siria leiah lawng in an kal. Lawng i an kal hlanah cun Kenkhria khua ah biakamnak a tuah i a lu kha aa met.

Psalm 47:2-7 (8b)

R/Miphun kip kha a uk hna.

2Cung Nung Bik Bawipa cu ṭih awk a si, amah cu a liannganmi siangpahrang vawlei cung vialte uktu a si.3Mi kip kha kan tangah a chiah hna i miphun hna uknak kha a kan pek.

4Kan umnak ram hi amah nih a kan thimpiakmi a si; a dawtmi a mi nih kan i porhlawt ngaimi ram a si.5Pathian cu a bawiṭhutdan cungah cun a hung kai; Bawipa a hung kai lioah cun lunglawmhnak au thawng le muko tum thawng a thang.

6Pathian cu hla in thangṭhat tuah u, kan siangpahrang cu thangṭhat tuah u.7Pathian cu vawlei cung dihlak siangpahrang a si; amah cu hla in thangṭhat tuah u.

Alleluia Luka 24:46 - 

Annih cu a thawh hna i, “ ‘Messiah nih cun sifahnak kha a in lai i ni thumnak ni ah thihnak in a tho ṭhan lai.

Thawngtthabia (Gospel) John 16:20-23

20Biatak kan chimh hna: nannih cu nan ṭap nan ai len lai, sihmanhsehlaw vawlei cu aa lawm lai; nan ngaih a chia lai, sihmanhsehlaw nan ngaihchiatnak cu lunglawmhnak ah a cang te lai. 21Nu nih nau a ngeih lai ah, nganfah in caan nih khan a phak caah a ngaih a chia, sihmanhsehlaw naute cu a hung chuah tikah nau thar pakhat vawlei cung i a hung chuah caah cun aa lawm i a nganfahnak cu a philh dih. 22Cu bantuk cun nannih zong nan si lai: atu cu nan ngaih a chia, sihmanhsehlaw kan hmuh ṭhan hna lai i nan lung cu lunglawmhnak in a khat lai; cu lunglawmhnak cu ahohmanh nih an in chuh khawh lomi hna lunglawmhnak phun a si lai.

23“Cu ni a phak tikah cun keimah cu zeihmanh nan ka hal lai lo. Biatak kan chimh hna: Ka Pa nih ka min in nan halmi paoh cu an pek hna lai.