ESTHER 3

3 Cu hnu tlawmpal ah Ahasueras nih Akag miphun Hammedatha fapa Haman cu a rian kaiter ding ah a thim. A rian a kaiter i a bawi hawi vialte, ram pumpi bawi hna, 2 le bawiinn rianṭuan hna vialte lak ah a sang bik ah a chiah i a luhchuah poh ah adang bawi vialte nih lukun le bawk in upatnak an pek tawn- cucu siangpahrang nih nawl a pek mi a si. Modekai cu kun lo bawk lo in a um tawn.  3 Cu tikah siangpahrang biaceih zungpi i rianṭuan hawi hna nih Modekai cu, ‘Zei tin dah siangpahrang nawl cu an ngahi lo,’ tiah an hal tawn. 4 Nikhat hnu nikhat amah cu hi bia hi an hal i zei ah a rel hna lo. A donghnak ah annih nih hi kong cu Haman kha an theihter, cucu amah cu Jew ka si a ti ruang ah a tuah peng hnga maw ti ngiatthlai awkah an chimh mi a si. 5 Haman hrimhrim nih Modekai cu a hmai ah lukun le bawk in upatnak a pek lo kha a hmuh tikah a thin cu a linh in a lin.  6 Modekai cu zei miphun dah a si ti kha an chimh tikah a lungchung in Modekai pakhat lawng hloh si lo in Modekai miphun chungtel dihlak, Ahasueras pennak chung ah khua a sa mi Jew dihlak kha hrawh awkah khua a ruat.

III: JEW HNA CU THINPHANG AN SI

Jew pawl hloh dih ding nawlchuah

7Ahasueras siangpahrang a bawi kumhleinihnak, thlakhatnak thla, Nisan thla ah khan ni le thla khiah ding ah Haman hmaika hrimhrim ah khan thimfung an thlak. Thimfung cu Adar ti mi hleihnihnak thla ah a tla. 8 Haman nih Ahasueras kha, ‘Bawipa, na pennak chung ah hin adang miphun hna he aa cawh kho lo mi miphun phunkhat a um; an zulhphung zong midang zulhphung he aa khat lo i siangpahrang nawlchuah kha zei ah an rel lo; cucaah anmah ngaihthiam ding cu siangpahrang nih a duh mi a si lo.  9Anmah hrawhnak ding minsen thut a si ahcun, cucaah zaangfahnak in siangpahrang, kei cu siangpahrang tangka tlaitu hna sin ah, siangpahrang chawbuk ah chiah ding in ngun tangka ṭalin thonghra pek ding timhcia ka si ko,’ tiah a ti.

10 Siangpahrang cu a kut i tacik kha a phoih i Jew hna hremtu, Hammedatha fapa, Haman kha a pek. 11 Cun amah kha, ‘Na tangka cu i chiah ko law kha miphun zong cu na kut ah kan pek; na duh bang in tuah ko hna,’ tiah a ti. 12 Cu tikah Haman cu thlakhatnak i nihleithumnak ni ah khan innpi ah caṭialtu hna cu a auh hna i amah chim bantuk in siangpahrang palai hna, ramkulh uktu hna, miphun kip i lu bik hna, ramkulhkip kha an ca cio le mibukip kha an holh cio in a ṭialter hna. Cu ca cu siangpahrang Ahasueras min in minsen an thut i a ṭacik an cumh.  13 Cun ca kha a pennak i ramkulh vialte ah khan caphawtu kha an phawtter hna i Adar ti mi thlahleihnihnak thla nihleithumnak ni, Jewmi vialte, a hme a ngan ti lo, nu le hngakchia telchih in, an zapi nikhat chung hrimhrim ah hrawh cikcek ding le an ngeihchiah vialte zong chuh dih ding in nawl an chuah.

Cu ca bia cu a tanglei bang hin a si:

1A lianngan mi siangpahrang, Ahasueras, sin in India le Ethiopia karlak ah a um mi, ram 127 uktu hna le an kuttang um bawitlaang pawl hna sin ah:

 2 Ram tampi cung nawlngeihnak pek mi le vawlei pumpaluk a uk mi ka si bang in, nawlngeih  duhtuknak nih hruai lo in zungzal a tawkzawn le zaangfahnak he uk ding in kaa zuam zungzal, cucu ka mi hna cu hnahnawhnak vialte in an luat khawh naklai, ka pennak cu rammi vialte thanchonak a chuahpi nakhnga le a kil le a deng tiang a him naklai,  minung lungthin nih a hlam mi daihnak a um nakhnga caah a si.  3Hii thil hna hi zei tin dah an um khawh lai ti ruahnak petu hna kha ruahnak ka hal hna tikah anmah lak i a fim bik le ram dawtnak a langhter zungzal mi le zumh awk aa tlak bik mi, cun siangpahrang dah ti lo, a dirhmun a sang bik mi, a min ah Haman an ti mi sin in hi ruahnak cu kan theih.   4Amah nih, ‘Vawlei miphun hna lak ah hin a lungthin a ṭha lo mi miphun, an zulhphung ah miphun dang vialte he aa ralchanh mi le siangpahrang nawlchuah mi vialte a buar peng mi miphun phunkhat an i cawh ve i cuti a si caah zapi ṭhatnak ca kan ti mi ramuknak phung kha a dawnkhantu an si zungzal,’ tiah a ti.

  5 Hi bantuk miphun, miphun dang he aa khat lo mi miphun cu kan ram ṭhatnak a donkham mi, an chanhlun zulhphung ruang ah vawleicung miphun vialte he aa ralkah cikcek i ṭihnung bik khuasualnak kha a tuah caah pennak fek tein a dirnak ding tiang ṭih a nunter mi a si ti kan ruah:

  6Cucaah kanmah ṭhatnak ca zohtu ding ti  thiah mi le kannih vialte i a pahnihnak kan pa a si mi Haman nih a ca ah an sawhpiak mi minung hna kha nu le ngakchia tiang an dihlak, zawnruahnak le zaangfahnak ngei lo in, an ral hna hriamnam in tukum thlahleihnihnak thla, Adar thla,  nihleilinak ni ah an hram in phoi in hrawh cikcek siseh tiah nawl kan chuah,  7 cuti cun hi a luancia caan le atu  hnahnawhnak petu hna cu nikhat ah hramhram in Hell ah thlak an si lai i hi hnu ah cun kan ram ah zungzal a hmun mi daihnak le hnangamnak a um lai.  

14Hi nawlchuahnak ca, ramkulh kip ah upadi in chuah ding mi cu, mikip nih a cung kan thanh mi ni ah timhcia in an um khawh naklai,  mikip sin ah thanh a si cang. 15Siangpahrang nawl peknak in a caphawtu hna cu a ran khawh chung in an tli; upadi cu Susa khualipi ah khan an chuah hmasa. Cu lio ah siangpahrang le Haman cu puai an tuah i an din i an i nuam, Susa khualipi ah ṭihphannak nganpi a tlung.