SIRACH 1

I: MIFIM HNA BIA KHAWNMI

Fimnak hram

1 1Fimnak vialte cu Bawipa sin in a si i amah he zungzal in a um. 2 Rilikam thetse, ruah tidor, zungzal nikhua hna hi aho nih dah a rel khawh hna?   3 Van a san, vawlei a kauh, khorthukpi a thuh cu aho nih dah a zoh i a hmuh khawh hna?  4Fimnak cu zei zong vialte hlan ah ser a rak si, ralrin thiamnak cu hlanpi in a rak um cang.  6Fimnak hrampi cu aho ca ah dah hun a si bal? A rum ngai mi a lamthluan cu aho nih dah a hngalh? 8Pakhatte lawng a fim i ṭih a nung taktak mi cu 9 a bawiṭhutdan ah a ṭhu mi Bawipa a si. Amah nih a ser, ṭha tein a zoh i cuai a thlai, cun a tuah mi kip cung ah, 10 a thim ning  in a ser mi saram nungkip cio le amah a dawt mi hna cung ah a tam khawh chung in a toih hna.

Pathian ṭihnak

 11Bawipa ṭih cu sunparnak le porhlawtnak, lunglawmhnak le thanuamnak luchin a si.  12Bawipa ṭihnak nih lung a nuamter, lunglawmhnak, thanuamhnak le nunsaunak a pek.  13Zei cah tiah Bawipa a ṭih mi hna ca ah zei zongte cu a tluang: an thih lai ah thluachuah an hmu.  14Fimnak hrampi cu Bawipa ṭih hi a si, amah cu an nu paw chung ah felfainak he rak ser a si. 15A chan in a hlun mi hrampi a si bang in minung phun he khua a sa, cun an tefa hna sin zong ah fel ngai in aa awk ko lai.  16Fimnak a tlinnak cu Bawipa ṭih a si; annih kha a theitlai in a riitter hna; 17an inn cu a chawva in a le an rawlruk cu aa ralrin thiamnak in a khahter hna.  18Fimnak luchin cu Bawipa ṭih hi a si: daihnak le ngandamnak a ṭhanter. 19Bawipa nih amah cu a hmuh i a banh. Hngalhnak le thluakfimnak cu a surter. Fimnak a ngei mi hna i minthannak kha a cawisan. 20Fimnak hrampi cu Bawipa ṭih hi a si i a ṭengnge hna cu nunkhuasaunak a si.

Lungsaunak le mah le mah i uk khawhnak

 21Michia cu a thinhunnak nih a dirhmun a hmaanter kho lo, 22zei cah tiah a thinhunnak khing cu a tluknak a si. 23Mi lungsau cu zei zongte ah a caan a phak hlan lo a hngak: sihmanhsehlaw a donghnak ah cun lawmhnak in a khat  te lai.  24A caan a phak hlan lo a ruahnak cu a lung chung ah a khumh hna, cun mi tampi nih a fimnak kha an thangṭhat te lai.

Fimnak le dingfelnak

25Fimnak chawva hna ah hngalhnak biathli an um, nain misual nih fimnak cu a huat hna. 26Fimnak na duh ahcun nawlbia kha zul hna, cun Bawipa nih an pek lai.  27Zei cah tiah Bawipa ṭih cu fimnak le cawnpiaknak a si, cun amah a lung a tluanh mi cu dinfelnak le nemnak a si.  28Bawipa ṭih kha ralchanh hlah, lungawṭom in zul hlah. 29Mi hmai ah bia chim sawhsawh hlah, biachim i ralring.  30Mualpho in na tlak nakhnga lo, sang tuk le ṭhawng tuk in ṭhang hlah, zei cah tiah Bawipa nih na biathli a phuan lai i mibupi hmai ah an thluk sual lai. Zei tin tiah Bawipa kha na ṭih lo i na lung cu lih le hrokhrolnak in a rak khat cang.