ZARHLINAK EASTER ZARHPI NI
Fourth Sunday of Easter
April 21, 2024
Lectionary: 50
Thiang Thlarau in a khatmi Peter nih cun a leh hna i, "Mizapi hruitu hna le upa hna: 9 A beimipa cungah thil ṭha tuah a sinak kong le zeitindah damter a sinak kha nihin ah hin nan kan hal duhmi cu a si ahcun, 10 nannih nan dihlak le Israel mi vialte dihlak nih nan hngalh awk cu, hi pa dam hirhiar tein nan hmaiah a dir khawhnak cu Nazareth khuami Jesuh Khrih, nannih nih nan thah i Pathian nih thihnak in a thawhter ṭhanmi a min ṭhawnnak thawngin a si. 11 Cathiang nih, 'Inn satu hna nih zei ah nan rel lomi lung cu, Lung santlai bik ah a cang,' tiah a timi kha Jesuh hi a si. 12 Amah thawng lawnglawng in khamhnak hi hmuh khawh a si. Zeicahtiah vawlei cung dihlak ah hin a kan khamh khotu ding min dang zeihmanh a um lo," tiah a ti.
R. Inn satu pawl nih santlailo ah an rel i an hlawtmi lung cu, santlai bik lung a rak si ziar ko!
Bawipa cu a ṭhat i a dawtnak cu zungzal in a hmunh caah lawm tuah u! 8 Minung i bochan nakcun Bawipa i bochan cu a ṭha deuh; 9 bawi i bochannak cun Pathian i bochan kha a ṭha deuh.
21 Bawipa, nangmah nih ka thlacamnak na ka theihpiak i teinak na ka pek caah; nangmah cu kan thangṭhat! 22 Inn satu pawl nih santlailo ah an rel i an hlawtmi lung cu, santlai bik lung a rak si ziar ko! 23 Cucu Bawipa tuahmi a si, zeitluk in dah aa dawh!
26 Bawipa min in a rami cu Pathian nih thluachuah a pek hna. Bawipa biakinn chungin kannih nih thluachuah kan rak in pek hna.
28 Nangmah cu ka Pathian na si i kan lawmh; na lianhngannak cu ka thanh lai. 29 Bawipa cu a ṭhat caah lawm tuah u, a dawtnak fek cu zungzal in a hmun.
Pathian nih zeitluk in dah a kan dawt hi ruat hmanh u! A kan dawtnak kha a ngan tuk caah Pathian fa tiah ti kan si — Pathian fa ti lawng hmanh si loin, a si in kan si hrimhrim. Hi ruangah hin vawlei nih a kan hngalh lonak cu a si, Pathian zong kha a hngal lo. 2 Ka dawtmi ka fale hna, atu hin kannih cu Pathian fa kan si cang, asinain zei kan lawh lai cu a fiang rih lo. Sihmanhsehlaw Khrih a langh tikah, amah Khrih bantuk cu kan si lai ti kha kan hngalh, zeicahtiah a sining taktak tein kan hmuh lai.
R. Alleluia, alleluia.Jn 10:14
Tuukhal ṭha cu keimah hi ka si. Pa nih a ka hngalh i keimah nih Pa ka hngalh ve bantukin, ka tuu kha ka hngalh hna i annih nih an ka hngalh ve. Cun an ca i ka lu hloh kha ka sian.
THAWNGTHABIA,Jn 10:11-18
"Tuukhal ṭha cu keimah hi ka si. Tuukhal ṭha cu a tuu hna caah a lu hloh kha a sian. 12 Man phalh in hlan chommi kha cu, tuukhal a si lo ca le tuu kha a ta an si lo caah, cenghngia a rat kha a hmuh tikah a zam i tuu kha a lektak hna. Cu tikah cenghngia nih cun tuu cu a seh hna i a ṭhek dih hna. 13 Hlanchommi cu hlanchommi lawng a si caah le tuu kha an zawn a ruah hna lo caah a tli ko. 14 - 15 Tuukhal ṭha cu keimah hi ka si. Pa nih a ka hngalh i keimah nih Pa ka hngalh ve bantukin, ka tuu kha ka hngalh hna i annih nih an ka hngalh ve. Cun an ca i ka lu hloh kha ka sian. 16 Hi tuurun chung i a um lomi ka ta a simi tuu dang an um. Annih zong kha ka ratpi ve hrimhrim hna lai; ka aw kha an ngaih lai i tuukhal pakhat tangah tuurun run khat ah an cang lai. 17 "Ka Pa nih a ka dawt cu ka nunnak kha pek ka sian caah a si, cu pek ka sian cu ka nunnak kha ka hmuh ṭhan nakhnga caah a si. 18 Ka nunnak cu aho nih an ka chuh a si lo, keimah lungtho tein pek ka sianmi a si ko. Peknak nawl kha ka ngei i lak ṭhannak nawl zong ka ngei. Cucu ka Pa nih tuah seh ti a ka duhmi cu a si," tiah a ti.