Thawhtthan Zarh (7)nak Zarhpi Ni

May 13, 2024 (Year B)

Avoikhatnak Bible

Lamkaltu 19:1-8

Efesa Khua Ah Paul A Phan Ṭhan

1Apollo kha Korinth khua i a um lioah Paul cu kha peng chungah khan khual a tlawng i Efesa khua kha a phan. Khika ah zultu tlawmpal kha a va hmuh hna i 2annih cu a thawh hna i, “Nan zumh ah khan Thiang Thlarau nan rak hmu maw?” tiah a hal hna.

Annih nih, “Thiang Thlarau cu a um le um lo hmanh kan hngalhṭung lo,” tiah an leh.

3“A si kun ahcun, zei bantuk tipilnak dah nan in kun?” tiah Paul nih cun a hal hna. Annih nih, “Johan tipilnak,” tiah an leh.

4Cun Paul nih cun a thawh hna i, “Johan tipilnak cu lungthlen hmelchunhnak caah a si, asinain Johan nih khan, ‘Ka hnu in a ra liomi hi nan zumh awk cu a si,’ tiah a ti zungzal hna i cu a hnu in a rami cu Jesuh hi a si,” tiah a ti hna. *

5Cucu an theih tikah annih cu Bawipa Jesuh min in tipilnak kha an ing. 6Paul nih an cungah a kut a chuan i Thiang Thlarau kha an cungah a tlung; holh theih loin an holh i Pathian bia zong kha an chim. 7Annih cu an dihlak in pa pahleihnih tluk an si.

8Paul cu pumhnak inn chungah khan a lut i thla thum chung mizapi kha ralṭha ngaiin a chimh hna, annih kha heh tiah a al hna i Pathian Pennak kong i an lung a pem nakhnga aa zuam.

Psalm 68:1-6 (32)

R/Vawleicung ram hna, Pathian cu hla in thangṭhat u, Bawipa cu thangṭhat ko u.

1Pathian cu tho seh law a ral kha ṭhek dih hna seh! Amah a huatu cu zam dih hna seh.

2Meikhu kha thli nih a choih bantukin a choih dih hna lai, khuailul kha mei nih a emh tikah a tit bantukin miṭhalo cu Pathian hmaika ah an rawk lai.

3Sihmanhsehlaw miding mi cu an i lawm lai i a hmaiah khan an tha a nuam lai; lunglawm ngaingai in an um lai.

4Pathian cu hla in thangṭhat u, a min cu thangṭhat u; khuadawm aa citmi caah cun lam kha ser tuah u. Amah a min cu Bawipa a si — amah hmaiah cun i lawm tuah u!

5A biakinn thiang chungah a ummi Pathian nih, ngakṭah le nuhmei kha an zawn a ruah hna.

6Lungleng le umhar in a ummi kha umnak inn a pek hna i thongtla kha luatnak lawmhnak chungah a chuahpi hna; sihmanhsehlaw ralthawh hmangmi cu ramcar ah an um lai.

Alleluia

Kolose 3:1 - Nannih cu Khrih sinah nunnak ah thawh nan si cang. Cucaah Pathian orhlei kam i Khrih nih a bawi ṭhutdan cung i a ṭhutnak vancung khua chung i a ummi thil tu kha nan lung in i seh chih hna u

Thawngtthabia (Gospel)

John 16:29-33

29Cun a zultu nih khan an thawh i, “Atu cu tahchunhnak hmang lo tein fiang tein na kan chimh. 30Nangmah nih zeizong vialte kha na hngalh dih i kherhlai len na hau lo ti kha atu cu kan hngalh cang. Cu nih cun nangmah cu Pathian sinin a rami na si kha a kan zumhter,” an ti.

31Jesuh nih cun, “Atu cu nan ka zumh cang. 32Asinain nan dihlak in ṭhek nan si i nanmahle nan inn cio ah nan kal i keimah lawngte nan ka nganh lai caan kha a ra lio i atu hi a phan cang. Sihmanhsehlaw keimah lawng ngaingai cu ka si lo, zeicahtiah ka Pa nih a ka umpi ko. 33Nannih nih keimah he nan i pehnak thawngin lungdaihnak nan hmuh nakhnga, hihi kan chimh hna. Vawlei nih hin harnak an pek hna lai, sihmanhsehlaw ṭih hlah u. Vawlei cu ka tei cang,” tiah a ti.