ESTHER 2

II: MORDEKAI LE ESTHER

Esther siangpahrangnu a cang

2 Siangpahrang Ahasueras cu a thin a vun daih tikah, Vasti siseh, zei tin a rak um ti mi siseh, dantatnak an rak pek mi siseh kha vialte kha a lung ah a hung chuak. 2 Cu tikah a hmai ah a rianh mi bawi pakhat nih khan amah cu, ‘Siangpahrang aiawh in ngaknu thiang dawhdawh kawl siseh, 3na pennak chung ramkulh dihlak ah mi thlah siseh law annih nih nungak thiang dawhdawh hna kha Susa khualipi ah rak chuahpi hna seh, cun annih kha tildit Hekai, nu hna zohkhenhtu kut tang ah a um mi nukhaan ah pum hna seh. Cuka ah cun an i dawh chinchin naklai amah nih zeizongte a pek hna lai i 4anmah lak i siangpahrang lung a tong mi nu nih Vasti hmun cu a rolh lai,’ tiah a ti.   

5 Cu lio ah cun Susa khualipi ah Modekai ti mi Benjamin chung pakhat a um. Amah cu Jair i fapa a si; Jair cu Shmei i fapa, Shmei cu Kish i fapa a si. 6Amah cu Babilon siangpahrang, Nebukhadnezar nih Jew siangpahrang Jekoniah he Jerusalem in sal ah a rak hruai mi hna lak i pakhat a si ve.  7 Atu amah nih, Esther ti zong auh mi, Hadasah mi pakhat, a pu fanu, a nu le a pa nih an thihtaak mi nu cu a inn ah a auh i a cawm.  Amah cu a tungtai a ṭha i a mui zong aa dawh, cun a nu le a pa an thih tikah a fanu in aa lak.

8Siangpahrang nih bia le nawl a chuah tikah nu tampi hna cu Susa khualipi ah an rak chuahpi hna i Hekai kuttang ah cun an chiah hna.  Esther zong cu an rak chuahpi ve i nu zohkhenhtu Hekai kut ahcun an rak chanh ve.  9 Nute nih a lung a ton i a mithmai ṭha a hmuh. Amah kha khulrang in a herh mi thil-thlennak le rawl einak a pek hlei ah siangpahrang innchung i a thiam bak mi sin-um nu pasarih kha a pekchap i nu hna innpi i a ṭha bik mi khaan ah khan a ṭhial.  10 Modekai nih a thlauh bang in Esther nih a miphun le a chungkhar kong kha a langhter bal lo. 11Modekai cu nifatin ngaknu hna an umnak innpi hmai ah khan chukcho aa chawk i Esther cu zei tin a si cang i zei tin dah an tuahto ti kha a ngiatthlai peng.  12 Nu hna zulh phung ning in thlahleihnih a rauh tikah ngaknu hna cu siangpahrang Ahasuras hmaika ah a changchang in an chuah a hau; hi timhtuahnak caan cu hi bang in a si: thlaruk chung zihmui i thuh, cun a dang thlaruk cu rimhmui le dawhnak can ah hman mi adang thuhsii he an i thuh rih lai. 13 Cun siangpahrang hmai ah an chuah tikah ngaknu kip kha an duh mi vialte i ken khawh a si, zei cah tiah annih cu nu hna khaan in bawi inn ah an lut cang lai.  14 Zanlei ah an va kal lai i zingka ah an rak kir lai, an kir tikah khaan dang, siangpahrang nupi chun hna khaan, tildit Shaashgaz nih a zohkhenh mi khaan ah khan an rak kir lai. Ngaknu pakhat cu siangpahrang lung a ton i a min in a auh dah ti lo ahcun a kal ṭhan ti lai lo.

15 Sihmanhsehlaw siangpahrang hmai ah, Abihail fanu, Modekai nih a zohkhenh mi nu Esther luh caan a phak tikah nu-uk Hekai, siangpahrang tildit nih a thuamhpiak mi dah ti lo adang zei hmanh a hal lo. Esther cu a hmutu vialte nih an tlaihchan. 16 Amah cu Ahasueras a pen kum sarihnak, Teret an ti mi thlahranak thla ah khan siangpahrang sin chuahpi awkah a khaan ah cun an kalpi.  17 Siangpahrang cu Esther kha adang nu hna nakin a duh deuh; aho nu hmanh nih amah tluk in siangpahrang i duhdawtnak le mithmai ṭha an hmu lo. Cucaah siangpahrang nih a lu cung ah siangpahrangnu luchin a chinh i amah kha Vasti aiawh in siangpahrangnu ah a thanh.  

18 Cu tikah siangpahrang cu siangpahrangnu Esther upatnak ah rawldangnak puai nganpi cu a ramuk bawi hna le zungbawi hna ca ah a tuah, cu ni cu a ramkulh dihlak ah zungkhar ni a thanh i laksawng tampi kha siang ngai in a phawt.

Modekai le Haman

  19 Esther cu, midang ngaknu hna bang in a pahnihnak khaan ah an ṭhial tikah, Modekai nih a cah bang in a nu le a pa le a miphun kong cu a langhter lo. 20Amah cu a rak zohkhenhtu a si bang in a bia cu a zulh peng. 21 Hi caan ah hin Modekai cu chungṭuan zung a kai i cucu siangpahrang i tildit pahnih hna a si mi, Biktan le Teres, Kutka cawng hna an lung a tling lo i siangpahrang Ahasueras thah awkah khua an khang. 22 Cu kong cu Modekai nih a theih i siangpahrangnu Esther kha a chimh, cun Esther zong nih Modekai nawlpeknak bang in siangpahrang cu a chimh ve.  23 Hi bia cu an hlathlai i a hmaan ko ti kha an hmuh. Rawitu pahnih cu hrenghmun ah an kuat hna i hi thil kong cu siangpahrang hmaika hrimhrim ah ṭial in cazin ah an khumh.