Thawhtthan Zarh (5)nak Cacawn Nithum ni

May 1, 2024 (Year B)

Lectionary: 287 

Reading 1 ,Lamkaltu 15:1-6

Jerusalem Pumhnak

1Judea ram in mi cheukhat kha Antiok khua ah khan an ra i, “Moses Nawlbia nih a kan cawnpiak bangin, nan cuarpar nan i tan lo ahcun khamhnak nan hmu kho lai lo,” tiah unau pawl kha an cawnpiak hna. * 2Paul le Barnabas nih khan cu kong cu fak piin an al hna; cucaah Paul le Barnabas le Antiok khuami cheukhat kha Jerusalem khua ah hung kal hna seh law hi kongah lamkaltu pawl le upa hna kha hung tong hna seh, tiah bia an khiah.

3Khrihfabu nih khan an hei thlah hna i Foinisia le Samaria an hei tanpah ah khan zeitluk in dah Jentail mi hna nih Pathian leiah an i mer tinak kong kha an chimh hna; cu thawng nih cun unau vialte kha a lawmhter ngaingai hna. 4Jerusalem khua an va phak tikah khrihfabu le lamkaltu hna le upa hna nih khan an rak conglawmh hna i anmah thawngin Pathian nih a tuahmi vialte kha an chimh hna. 5Sihmanhsehlaw zumtu hna lakah khan, Farasi bu chung i a simi an rak um i cu hna nih cun an i thawh i, “Annih cu, cuarpar nan i tan lai i Moses Nawlbia kha nan zulh lai, tiah ti awk an si,” tiah an ti.6Hi bia ruah ṭi awkah hin lamkaltu hna le upa hna kha an i pum.

Psalm 122:1-2, 3-4ab, 4cd-5 

R/ "Bawipa inn ah kal u sih," an ka ti tikah khan ka rak i lawm.

"Bawipa inn ah kal u sih," an ka ti tikah khan ka rak i lawm. 2 Atu cu maw Jerusalem, na kutka chungah kan dir cang!

 3 Jerusalem cu i rem ṭhipṭhep le i dawh cikcek in sakmi khua a si. 4 Cuka ah cun Bawipa sin i lawmhnak bia chim aw asi.

 Israel miphun cu an kal tawn, cu lawmhnak bia chim cu Bawipa nih a fialmi hna a si. 5 Cuka ah cun David chung bawiṭhutdan hna cu, an hun hna. 

Alleluai….John 15:4,5b

4Keimah ah hin i peh u law kei zong nanmah he kaa peh ve lai. Mitsur nge nih amahte in thei a tlai khawh lo i a ruang ah aa peh lawngah a tlai khawh bantukin nannih zong keimah chung i nan um lo ahcun nan tlai kho ve lai lo.

5Ahohmanh ka chungah a um i kei zong a chungah ka um ahcun, amah cu thei tampi a tlai khomi cu a si; zeicahtiah keimah loin nan tuah khawhmi zeihmanh a um lo.

Thawngtthabia

John 15:1-8 or Matthai 13:54-58

Jesuh Cu Mitsur Ruang Taktak A Si

1“Mitsur ruang taktak cu keimah hi ka si i dum ngeitu cu ka Pa a si. 2Thei a tlai lomi ka nge vialte kha a tan dih hna i thei a tlaimi nge vialte kha an tlai chinchin nakhnga a thianh hna. 3Nannih cu kan chimhmi hna bia thawngin nan thiang cang. 4Keimah ah hin i peh u law kei zong nanmah he kaa peh ve lai. Mitsur nge nih amahte in thei a tlai khawh lo i a ruang ah aa peh lawngah a tlai khawh bantukin nannih zong keimah chung i nan um lo ahcun nan tlai kho ve lai lo.

5Mitsur ruang cu keimah hi ka si i a nge cu nanmah hi nan si. Ahohmanh ka chungah a um i kei zong a chungah ka um ahcun, amah cu thei tampi a tlai khomi cu a si; zeicahtiah keimah loin nan tuah khawhmi zeihmanh a um lo. 6Ka chungah a um lomi cu mitsur nge car bantukin lengah hlonh an si ko. Cu bantuk nge cu an pumh hna i mei ah an paih hna i cuka ah cun an kang dih. 7Ka chung i nan um i ka bia kha nan chungah a hmunh ahcun, nan duhmi paoh kha nan ka hal lai i nan hmuh ko lai. 8Nannih nih thei tampi nan tlai thawngin ka Pa sunparnak kha nan langhter i cuticun ka zultu i nan i canning cu a si.

St. Joseph Puai Ni ca

Bible

Genesis 1:26-2:3 (or) Kolose 3:14-15, 23-24

       26Cun Pathian nih cun, “Atu cu minung kan ser cang hna lai; kanmah mui an keng lai i kanmah he kan i lo lai. Nga si hna seh, va si hna seh, inn zuat saṭil si hna seh, ramlak i a ummi saram a hme he a ngan he si hna seh, an uk dih hna lai,” tiah a ti. * 27Cuticun Pathian nih minung cu amah mui lo in a ser, minung cu Pathian mui in a ser hna. Mipa le minu kha a ser hna. * 28Thluachuahnak a pek hna i, “Tefa tampi in ngei u law nan tefa cu vawlei cung khuazakip ah khat hna seh, cun annih nih vawlei cu uk hna seh. Nannih cu nga cung le va cung le ramlak saram a hme he a ngan he an dihlak cung i nawlngeihnak kan pek hna,” a ti. * 29Nan ei awk caah thlai phun kip le thei phun kip kan pek hna; 30Sihmanhsehlaw ramsa vialte hna le va vialte hna le vawlei ah a lawn in a lawnmi vialte nunnak thaw a ngeimi vialte hna caah ram hring le thlaihnah borbor ka pek hna,” a ti i cu bang cun a hung si. 31Pathian nih a sermi thil vialte cu a zoh i a lung a si ngaingai. Zanlei cu a hung dih i zinglei kha a hung um, cucu ni ruknak ni cu a si.

1Cuticun vawlei le van le vawlei le vancung i a ummi thil vialte cu ser an si. 2Ni sarihnak ni ah Pathian nih a tuahmi thil vialte cu a lim hna i cu ni ah cun rian ṭuan loin a um. * 3Ni sarih ni cu thluachuah a pek i a dang tein a chiah, zeicahtiah cu ni cu a thil ser a lim i rianṭuan loin a um ni kha a si.

Psalm 90:2-4, 12-14, 16 (17b)

R/ Kan thil timi kip ah khua awng kan pemhter ko!

2Tlang an sem hlan le vawlei kha na ser hlan in nangmah cu zungzal in, hramthawknak zong um lo donghnak zong um loin Pathian na si.

3Minung cu an rak sining ah khan kir ṭhan u na ti hna, vawlei ah na canter ṭhan hna. 4Kum thong khat hi nang caah cun ni khat bantuk a si; a dih cangmi nizan bantuk kha a si ko, zan khat chung i suimilam caan tawite pakhat bantuk khi a si ko. *

12Kan nunnak hi zeitluk in dah a tawi ti kha kan hngalhter law cuticun kan fim deuh lai.

13 Bawipa, zei can dah kan cungah lung ṭhul loin na um lai? Na sal hna kan cungah hin zaangfahnak ngei ko.

14Zing fate in a fekmi na dawtnak in kan khahter, cuticun hla kan sa lai i kan nun chung vialte kan i lawm lai.

16Kannih na sal rual hi khuaruahharmi thil na tuahmi cu kan hmuhter law kan tefa hna nih a liannganmi na ṭhawnnak cu hmu ve hna seh.

Alleluia…

Psalm 68:19

Ni khat hnu ni khat kan thilrit a kan changtu Bawipa cu thangṭhat ko u, amah cu a kan khamhtu Pathian a si.

Thawngtthabia

Matthai 13:54-58

       54A rak umnak khua Nazareth khua ah khan a kal. An i pumhnak inn ah khan a cawnpiak hna i a bia a theimi cu an lung a suk ngaingai hna. “Hi bantuk fimnak hi khoika ah dah a vaa lak hnga? Hi bantuk khuaruahhar tuahnak zong hi khuazei in dah a hmuh hnga? 55Lehtamapa fapa kha a si ko lo maw? A nu kha Mary hi a si ko lo maw? A naule kha Jeim le Josef le Simon le Judas hi an si lo maw? 56A farle kha hika i a ummi hi an si lo maw? Khuazei in dah hi thil vialte hi a vaa lak hnga?” an ti i 57cuticun an hlawt. Jesuh nih cun a thawh hna i, “Profet cu amah khua le a chungkhat hna sin ti lo ahcun, hmun dang ah cun upatnak hmu loin a um lo hen pei,” tiah a ti hna. * 58Zumhnak an ngeih lo caah khika ah cun khuaruahharnak tampi a tuah lo.