Tobit 5

Tobit 5:1-22

V: RAPHAEL

 1Cu tikah Tobias nih a pa Tobit cu, ‘Ka pa, na ka chimh mi vialte cu ka tuah hna lai. 2Sihmanhselaw zei tin dah ngun cu a sin in ka hmuhṭhan khawh lai? Amah nih a ka hngal lo i kei zong nih ka hngal ve lo. A ka zumh i ngun cu a ka pek naklai zei chinchiahnak dah ka hmuhsak lai? Cu pinah, Media ramlei kalnak lam zong ka hngal fawn lo,’ tiah a ti. 3Cu tikah Tobit nih a fapa Tobias cu, ‘Kan pahnih in biakamnak catlap cung ah kan min kan thut, mah catlap cu cheukhat veve kan i ken khawh naklai cheuhnih ah ka cheu. Keimah nih cheukhat kaa lak i adang cheukhat cu ngun he ka chiahtak. Ka ruah tikah a kut ah ngun ka chiah hi kumkul hrawng a si cang rua!  Cucaah atu, ka fa, zumhtlak khualtlawn hawi pakhat kawl -nan rak kir ṭhan tiang a nihlawh cu kan pek ko lai – cun va kal law Gabael sin in ngun cu va khawm hna,’ tiah a ti.

4 Medialei kalnak lam a hngal mi kawl awkah a chuak. Innleng a hun chuak tikah hmaitonh in a dirmi Vancungmi cu a hmuh, Pathian Vancungmi a si ti cu a ruah awk a hngal lo. 5 Amah nih, ‘Ka kawi, khua zei in dah na rat?’ tiah a ti. Vancungmi nih, ‘Kei cu na unau Israelmi ka si; rian kawl ah hikalei ah ka ra ko hih’ tiah a ti. Tobias nih, ‘Media kalnak lam na hngal maw?’ tiah a ti. 6 Adangpa nih khan, ‘Hngal e, voi tampi ka phan cang; Medialei kalnak lam cu ka theih ka ton tuk cang mi a si. Atu le a tu Media ka phan i Media ram Rhages ah a um mi kan chungkhat Gabael sin ah kaa ṭhum tawn. Ecbatana in Rhages cu nihnih khengte a rau tawn; Rhages cu tlangcung ah a um i Ecbatana cu nelrawn lai ah a um,’ tiah a leh.  7Tobias nih, ‘Ka kawi, rak ka hngak ta rih; ka pa ka va chimh ta lai; keimah he na rat ka herh ngaingai; na caan man cu kan pek lai,’ tiah a ti.  8 Adangpa nih khan, ‘A ṭha kan hngah lai nain rau tuk hlah mu,’ tiah a ti.

9 Tobias cu a lut i a pa kha anmah Israel unau pakhat ka hmuh cang ti a va chimh. Cu tikah a pa nih, ‘Inn chung ah rak luhpi; a chungkhar le a phun hngalh ka duh. Amah cu bochan tlak hawikom a si hnga maw ti zoh a herh, ka fa,’ tiah a ti. Cu tikah Tobias cu a va chuak i amah kha, ‘Ka kawi, ka pa nih an herh,’ tiah a va ti.

10 Vancungmi cu a rak lut; Tobit nih a rak biakchawnh, cun mipa nih khan lawmhnak tampi a ngeih nakhnga thla a campiak ve. Tobit nih, ‘Kaa lawm ṭhan bal ti hnga maw? Kei cu mitcaw ka si; vancung ceunak ka hmu kho ti lo; khuaceu a hmu kho ti lo mi mithi bang muihnak ah ka pil cang. Kei cu a nung in phum mi ka si; bia an chim ka thei ko nain ka hmu kho hna lo,’ tiah a leh. Vancungmi nih cun, ‘Na tha chia hlah, a rauh hlan ah Pathian nih an damter ko lai, na tha chia hlah,’ tiah a ti. Tobit nih, ‘Ka fapa Tobias cu Media ah kal a duh; lam chimtu ah na kalpi kho hnga maw, ka unau?’  Unau, a man kan phalh ko lai,’ tiah a ti. Amah nih, ‘Amah he ka kal duh ko; Lam cu ka hngalh dih; Media ah atu le tu ka kal, a nelrawn le a tlangthluan vialte ka cul dih cang hna, cun a lam vialte ka hngalh dih hna,’ tiah a ti. 11 Tobit nih, ‘Unaupa, aho chung le phun dah na si? Na ka chim kho hnga maw?’ tiah a ti. 12 Vancungmi nih, ‘Ka phun cu na ca ah zei dah a biapi?’ tiah ti. Tobit nih, ‘Unau, aho fapa na si i na min aho dah a si ti ka fiang duh ngai,’ tiah a ti.  13 Vancungmi nih, ‘Keimah cu Azarias; na rualchan pakhat a si mi Ananias lian i fapa ka si,’ tiah a leh. 14’Unau, kaa lawm, na cung ah thluachuahnak um hram seh?’ na chungkhar kong hngalh ka duh ruang ah na lung um hlah seh; nangmah cu a ṭha le hmaizahtlak hrihhram in ka rualchan na si kha ka hngalh cang. Shemaiah lian fapale hna pahnih, Ananias le Nathan cu ka hngalh ko hna. Jerusalem ah keimah he kan kal tawn; cuka ah hmunkhat in kan biaṭi tawn i lamding in an pial bal lo. Na unau hna cu rinhchan tlak an si; ciruang ṭha in a ra mi na si; ṭha tein kan cohlan,’ tiah a ti.

15 Cun amah nih, ‘Nikhat drachma fangkhat kan pek lai, ka fapa a hman zat a si ve ko. Ka fapa cu dam tein na rak kirpi ṭhan lai, cun kan i kam mi leng in kan chap rih lai,’ tiah a ti. 16Vancungmi nih cun, ‘Amah cu ka rak kirpi ṭhan ko lai; na thin phang duh hlah. Kan kallei zong kan tlunlei zong a tluang ko lai, lam cu a him ko,’ tiah a ti. 17Tobit nih, ‘Unau, thluachuahnak hmu hram ko,’ tiah a ti. Cun a fapalei ah aa mer i amah kha, ‘Ka fa, na khualtlawn lam ca a herh mi cu i timhlamh hna, cun na unaupa he i thawh u. Van i Pathian nih ram dang ah in huppheng hna seh law nan pahnih in himbawm tein rak in kirpi ṭhan hna seh! A vancungmi cu nanmah he kal ve seh law in veng ko hna seh, ka fa!’ tiah a ti.

Tobias cu a nu le a pa kha a hnamh hna i aa thawh. Tobit nih, ‘Nan lam tluang hram seh!’ tiah a ti hna. 18 A nu cu a mitthli a thlak i Tobit kha, ‘Zei ruang ah dah ka fa cu na thlah? Amah cu kan hmai in a vah tikah kan ṭhiangṭhunh a si ko lo maw? 19Phaisa lawng hi a biapi mi a si hrimhrim lo. Kan fa tluk cun a sunglawi hrimhrim lo. 20 Pathian nih a kan pek mi kan nunnak hi a za tuk ko cang,’ tiah a ti. 21 Amah nih, ‘Cu bantuk ruahnak cu ngei hlah. An kallei zong an tlunlei zong an lam a tluang ko lai. Himbawm tein a rak tlun kha na hmuh hrimhrim te ko lai. Cu bantuk ruahnak cu ngei hlah. Anmah kong ah phang hlah ka farnu.  ²²A ṭha mi vancungmi cu amah he a kal ve ko lai, a khualtlawn a tluang lai i lunglawm thanuam in a rak kir ṭhan ko lai,’ tiah a ti.