Tobit 13:1-18

XII: ZION

13. 1Cun amah nih: ‘Zungzal a nung mi Pathian cu conglawmh si seh, zei cah tiah a pennak cu chan vialte a hmun. 2Zei cah tiah mi kha daan zong a tat i a ngaih zong a ngaihthiam; mi kha a thuh biknak leidai tang ah a thlak hna i rawh cikceknak in a chuah ṭhan hna; a kut in aho hmanh an luat kho lo. 3 Nannih Israel fale hna, a thangṭhatnak cu miphun hna hmai ah thanh u! Zei cah tiah miphun hna lak ah a rak in ṭhekdarh cang hna, 4 khika ah a lianhngannak zong an hmuhsak cang hna. Amah kha ser mi vialte hna hmaika ah hlorh u; amah cu kan Bawipa a si, kan Pathian a si; cun amah cu zungzal in Pathian a si.

5Nan sual ruang ah daan an tat hna lai nain an zaangfah ṭhan hna lai; nan rak i ṭhekdarhnak miphun kip sin in an pumh ṭhan hna lai. 6 A sin ah nan lungthin dihlak le nan ruahnak dihlak he nan kir, a hmai ah lungthiang tein nan tlonlen a si ahcun, nan sin ah aa mer ṭhan lai i a hmai cu nan sin in a thup ti lai lo. Zei tluk ṭha in dah an zohkhenh cang hna ti cu ruat tuah u; thangpi in amah cu thangṭhat u. Dinnak Bawipa cu conglawmh ulaw chan vialte hna i Siangpahrang cu hlorh u.

7 Keimah ca tu ah cun ka zamnak ah a thangṭhatnak hla cu ka sak lai; a rak sual mi miphun sin ah a lianhngannak le a ṭhawnnak huham cu ka theihter lai. Misual hna, a sin ah rak kir tuah u, nan nunzia cu a hmaika ah dik seh; vel an ngeih hna lai i an zaangfah men ko hna lai. Kei ka ca tu ah cun Pathian cu ka hlorh i ka thlarau cu van Siangpahrang cung ah aa lawm. 8 A lianhngannak cu mikip hmurka ah um seh, a thangṭhatnak cu Jerusalem ah sak si seh.

9 Jerusalem, a Thiang mi Khualipi, na tuahsernak ruang ah Pathian nih fung in an zit cang, sihmanhsehlaw miding fale hna cu a zaangfah rih ko hna lai.

10Bawipa cu aa tlak ning in lawmhnak pe ulaw chan hna Siangpahrang cu conglawmh u. Cuti cun na chung ah Biakinnpi cu lawmhnak he sak ṭhan a si lai, cun na chung ah khan ngaihchia lungkuai hna cu a dawt ṭhan khawh hna lai, a ra lai mi chan vialte tiang in.

11Vawleicung pumpaluk ah ceunak nganpi a tlang lai; Bawipa Pathian min thiang he naihte i um awkah, van Siangpahrang ca, an kut ah laksawng i put bu in, lamhlapi le vawlei deng in an ra lai. Nangmah chung ah, chankhat hnu chankhat, an i lawmhnak cu an thanh lai i Thim mi khualipi min cu a ra lai mi chan tiang a hmun lai.

12 Nangmah an do mi cung ah chiatserhnak um ko seh, nangmah an hrawk mi, na vanpang a thlu mi le na innsang a phur mi, na inn a khang mi, poh cung ah chiatserhnak um ko seh! Nangmah an sa ṭhan mi cu zungzal in thluachuahnak hmu ko seh. 13 Cun midingfel hna fale hna cung ah naa nuam lai i naa lawm lai, zei cah tiah annih cu hmunkhat ah an i pum cang lai i chan hna Bawipa cu an thangṭhat lai.

14 Nangmah an daw mi hna cung ah thluachuah vanluhnak um ko seh, na daihnak ah aa lawm mi hna cu thluachuak mi an si. Dantat na innak vialte ah an ṭah mi hna cu thluachuak mi an si! Zei cah tiah annih cu tlawmpal ah na chung ah an i nuam cang lai, a ra lai mi caan ah na thluachuahnak vialte cu an mit in an hmuh cang lai.

15 Ka thlarau, a lianngan mi siangpahrang, Bawipa cu conglawmh tuah, 16Zei ruang ah tiah Jerusalem cu sak ṭhan a si cang lai, a inn cu zungzal in an hmun lai. Van Siangpahrang i na sunparnak le thangṭhat hmuh awkah ka innchungkhar i pakhatte tal a tan hmanh ah zeitluk lawmhnak dah a si lai! Jerusalem kutka hna cu emerald lungvar hna in, na vanpang vialte cu lungman sung in, a innsang hna cu sui in, a ralhruang hna cu suithiang hna in sak an si lai.

17 Jerusalem lampi hna cu Ofir i Rubi le lunghak hna in an phah hna lai; 18 Jerusalem kutka hna cu lunglawmh le thanuamnak authawng hna nih a tlerh hna lai, cun a inn vialte nih ‘Alleluia! Isreal Pathian cung ah thluachuah vanluhnak um ko seh!’ tiah an ti lai. Na khua chung ah a min thiang cu zungzal in zungzal tiang an conglawmh lai.