ZARHTHUMNAK EASTER ZARHTENI
April 20, 2024
Lectionary: 278
Cuticun Judea ram le Galilee ram le Samaria ram i a ummi khrihfabu vialte nih khan daihnak caan an hmu. Bawipa kha ṭihzah ngaiin an um i Thiang Thlarau bawmhnak thawngin an ṭhang i an karh. 32 Peter cu khuazakip ah khan a kal i voi khat cu Lidda khua i a ummi Pathian mi hna kha a va tlawng hna. 33 Khika ah mipa pakhat Ainias an timi kha a va hmuh i cu pa cu mizeng a si i a ihkhun in kum riat chung a tho ti lo. 34 Peter nih cun a thawh i, "Ainias, Jesuh Khrih nih an damter cang. Tho law na ihphah kha zual," tiah a ti. Chikkhatte ah khin Ainias cu a tho. 35 Amah cu Lidda le Sharon i a ummi vialte nih khan an hmuh i Bawipa leiah an i mer. 36 Cun Joppa khua ah hin Jesuh zummi nu pakhat a min Tabitha a simi a um, (amah cu Grik holh cun Dorkas ti a si i a sullam cu sazuk tinak a si.) ṭhatnak tuah le sifak bawmh ah khan a caan vialte cu a hman dih tawn. 37 Cu caan ah cun a rak zaw i a thi. A ruak cu an ṭawl i cunglei dot ah khan an suan. 38 Joppa khua cu Lidda khua khan a hla tuk lo i zultu pawl nih khan Peter cu Lidda ah a um ti an theih tikah mi pahnih an hei thlah hna i, "Khulrang in kan sinah ra ta tuah," tiah bia an cah. 39 Cucaah Peter cu aa tim i an sinah cun a kal. A va phak tikah cungdot ah khan an kaipi. Nuhmei vialte nih khan a zual in an zual i an ṭahpah khan, Dorkas nih a nun lioah a rak serpiakmi hna angki hna le puan hna kha an hmuhsak. 40 Peter nih an dihlak in a chuahter hna i a khuk aa bil i thla a cam; cun miruak leiah khan a hei i mer i, "Tabitha, tho tuah," tiah a ti. A mit kha a hun au i Peter kha a hmuh tikah a hung ṭhu. 41 Peter nih a kut a hei chanh i a thawh. Cun a zummi hna le nuhmei hna kha a auh hna i a nung in an sinah cun a pek hna. 42 Hi thawng nih cun Joppa khua kha a cul dih i mi tampi nih Bawipa kha an zumh.
R. Bawipa cu ka cung i a ṭhatnak vialte ruangah hin zeidah ka pek khawh lai?
12 Bawipa cu ka cung i a ṭhatnak vialte ruangah hin zeidah ka pek khawh lai? 13 A ka khamh caah khan Bawipa cu din awk thawinak ka pekchanh lai.
14 A mi vialte an i pumhnak ah khan bia kaa kammi kha ka pek lai. 15 A mi pakhatkhat an thih tikah Bawipa caah zeitluk in dah a fah!
16 Bawipa, kei cu na sal ka si; ka nu nih na rian a rak in ṭuanpiak bang khan kei zong nih ka ṭuan ve. 17 Lawmhnak chimnak raithawinak cu kan pek lai i na sinah thla ka cam lai.
R. Alleluia, alleluia.Jn 6:63c, 68c
minung ṭhawnnak hi cu zeihmanh a ṭhahnem lo Zungzal nunnak bia a ngeitu cu nangmah pei na si cu
Thawngthabia, Joha n 6:60-69
. 60 Cu bia cu a zultu mi tampi nih khan an theih i, "A cawnpiaknak hi a har tuk. Ahodah cu bantuk cu a ngai kho hnga?" an ti. 61 A zultu pawl kha cu kong ah cun an zai lengmang ti kha Jesuh nih a lungchung in a hngalh i cucaah a thawh hna i, "Hi bantukin kan cawnpiakmi hna nih hin nan thin an hunter hna maw? 62 Mi Fapa hi hmasa i ka rak umnak hmun i ka kai kha ka hmu u law tah zeitindah nan um kun hnga? 63 Nunnak petu cu Pathian Thlarau a si; minung ṭhawnnak hi cu zeihmanh a ṭhahnem lo. Nannih kan chimhmi hna bia hi Thlarau le nunnak cu an si. 64 Asinain a cheu nih cun nan zum lo," tiah a ti. (Jesuh nih khan a hramthawkte in ahodah a zumtu an si lai i ahodah a ka leitu a si lai ti kha a hngalh ko.) 65 Cun aa thawh ṭhan i, "Hi ruangah hin pei, ka Pa nih an caah lam a serpiak hna lo ahcun ahohmanh ka sinah an ra kho lo, tiah ka rak in chimh hna kha a si cu," tiah a ti. 66 Cu ruangah cun a zultu tampi cu an i let ṭhan i an zul ti lo. 67 Cucaah Jesuh nih zultu hleihnih kha a thawh hna i, "Nannih tah — nan kal ve lai maw?" tiah a ti hna. 68 Simon Peter nih a hun leh i, "Bawipa, aho sinah dah kan kal hnga? Zungzal nunnak bia a ngeitu cu nangmah pei na si cu. 69 Atu cu nangmah hi Pathian sinin a rami Mi Thiang na si kha kan zumh i kan hngalh cang," tiah a ti.