ESTHER 1

I: AHASUERAS LE VASHTI

Ahasueras rawldanghnak

1 Cucu siangpahrang Ahasueras chan ah khan a si, Ahasueras i pennak cu India in Ethiopia tiang a phan i ramkulh 127 aa tel.  2 Cu lio ah cun siangpahrang cu Susa khualipi ah a bawi lio a si, 3 cun a pen kumthumnak ah khan a zung upa le a vuanci vialte, Persia le Media i ralbawi hna, phunbawi hna le ramkulh uktu vialte hna ca ah rawldanghnak nganpi a tuah.  4 Ni zakhat le ni sawmriat chung puai cu a peh i a pennak i rumnak le sunparnak hna le a siangpahrang inn i a chawva le a rumnak hna kha a hmuhsak hna. 

 5 Hi caan a dih tikah ah siangpahrang nih a hme a ngan ti lo in Susa khualipi chung a um mi a mi vialte ca ah a siangpahrang dum ah ni sarih chung zanriah a timhpiak hoi hna.  6 A khaan cu lungrang tung ah puanthan ṭhaṭha an thlai mi puanzar, a rang, a hring, a nak le a dum he ti in an zar, cun a sen, a dum, a rang le a nak mi lung cu an phah i a cung ah sui le ngun in ser mi ṭhutdan saupi hna cu an chiah lulh; 7 Siangpahrang rumnak he aa tlak mi mitsur zu cu suihrai a phunphun ah khan an thlet i duh tawk in an din.  8 Nan din hrimhrim lai ti mi um lo in siangpahrang nih a zungbawi hna cu a ra mi kha anmah duh thim in dinter awkah nawl a pek hna.

Siangpahrangnu Vasti mualphohnak

9 Cu bantuk in siangpahrangnu zong nih khan siangpahrang tual ah cun nu pawl ca ah rawldanghnak a tuah ve. 10 Ni sarihnak ah khan zuu in aa nuam cang mi siangpahrang nih siangpahrang Ahasuerus pumpak zohkhenhtu tildit pasarih hna;  – Mahuhman, Biztha, Habona, Bigtha, Aabagtha, Zeita le Karkas –kha 11siangpahrangnu aa dawhnak cu mipi le zung bawi hna hmuhsak awkah a bawi luchin he rak chuah awkah a va kawhter hna. Zei cah tiah amah cu aa dawh tuk hringhran. 12 Sihmanhsehlaw siangpahrangnu Vasti cu tildit hna i bia kha al in a ra lo. Cu tikah siangpahrang cu a thin a linh in a lin.  13 Cucaah upadilei thiamsang hna kha ruahnak a hal hna –siangpahrang kong bia ah cun upadi le phunglam thiam hna ruahnak hal cu tuahtawn mi a si - 14 Persia le Media ah mifim le siangpahrang hmai ah luhnak nawl a ngei mi pasarih hna a si mi, Kasina, Shetaa, Atmata, Taasis, Meres, Marsena le Memukan hna kha a auhter hna.  15 Cun siangpahrang nih annih kha tildit hna nih an va chimh i ka nawl a ngai lo mi siangpahrangnu Vasti hi upadi ning in zei tin dah tuah ding a si,’ tiah a hal hna. 16 Siangpahrang le mifim hna dihlak hmai ah khan Memukan nih, ‘Siangpahrangnu cu siangpahrang pakhat cung lawng si lo in zungbawi le siangpahrang Ahasuerus uknak tang ramkulh hna i a um mi mi vialte cung ah a sual cang.  17 Zei cah tiah Bawinu Vasti tuahsernak cu nu vialte nih an pom lai i amah bang an vale cung ah zomhtaih in an ṭhudir ve lai.  18 Annih nih, ‘Siangpahrang Ahasuerus hrimhrim nih Bawinu Vasti cu a hmai ah rak chuak ding a au nain a rak chuak lo,’ an ti lai. Ni a tlak hlan ah Persia le Media zungbawi hna i nupi hna nih zungbawi nupi hna sinkip ah khan an chimh hna lai i Bawinu Vasti nunzia cu an theih tikah cu nih cun hmunkip ah lungtlin lonak le thinhunnak a chuahter lai. 19 Cucaah nan hna a tlak a si ahcun Media le Persia upadi cauk ah khumhchih ding mi le hrawh ṭhan khawh lo ding mi biachahnak pakhat cu siangpahrang nih chuah seh; cu biachahnak bang in siangpahrangnu Vasti cu zei tik hmanh ah Ahasueras hmaika ah chuak bal ti hlah seh law, cun siangpahrang ca ah siangpahrangnu Vasti nakin aa dawh deuh mi nu pakhat kha siangpahrangnu ah canter si seh.  20Siangpahrang nawlpeknak cu ram pumpaluk ah thanh si seh, cu tikah nu vialte, a hme a ngan ti lo in an vale nawl an ngai dih lai,’ tiah a ti. 

21A bia kha siangpahrang le ramuk bawi pawl nih an duh ngai i Memukan nih ruahnak a pek bang in siangpahrang nih a tuah.  22 Cucaah a pennak chung i ramkulh vialte, ramkulh pakhat cio le miphunkip an holh cio in amah kutṭial in ca a kuat hna i ‘Innchungkhar kip i lu cu pa si seh,’ tiah a ti.