SIRACH 8

Ralrin thiamnak le khuahhngalhnak  

8 A donghnak ah a kut ah na tlak sual nakhnga lo aho nawlngeitu cung hmanh ah biachahnak va tuah hlah.  2A rumnak an merhnawh sual nakhnga lo aho mirum he hmanh vaa si hlah; zei cah tiah sui nih tampi a hrawh cang hna i siangpahrang hna lung kha a pialpi cang hna.  3Holh a tam mi aho he hmanh bia-alnak tuah hlah, kha meiphu cung ah khan thing va pum hlah. 4Thluak a ngei lo mi he capo va sai hlah, na pupa hna nihsawh an tong sual lai.

5Sual aa ngaihchih mi kha va nihsawh hlah, misual kan si dih ti kha philh hlah. 6 Aho kum upa hmanh va nautat hlah, kannih cheukhat zong  kan tar ve cang ko hih. 7 Aho mithi cung hmanh ah na lung va awi hlah, kannih zong kan thi ve te lai ti kha philh hlah.

Nunphung

8Mifim hna bia kha zei rel lo in um hlah law an bia hna tu kha theih i zuam, zei tin tiah hi bia hna hin milianngan hna rianh ning nuncan ziaza na hngal lai.  9Upa hna bia cu zei rel lo in um hlah, zei cah tiah annih zong an pale hna sin in an cawn ve; annih sin in zei tin khua ruah awk le a caante bia leh thiamnak kha na hngalh lai.

Ralrin thiamnak

10Misual meiṭil cu chem hlah, a mei-alh ah naa khaang sual lai. 11Mipuarthau kha a thin va phawk hlah, na bia in tlaih an zuam sual lai.  12Nangmah nakin a lianngan deuh mi aho hmanh thil va hlan hlah; na hlanh ahcun na sung cang ti kha va hngal.  13Na thil ti khawhnak pinlei in vaa zum hlah, cuti naa zumh ahcun a man pek ding i tim ko. 14Biaceihtu cu taza va cuai hlah, zei tin tiah biachahnak cu amahleikap in a si lai.  15 Mi thinchia he khual va tlawng hlah, zei cah tiah na ca ah khingrit a si sual lai, a duhduh in a cawl lai i a hruhnak ruang ah nan pahnih in nan rawk sual lai.  16 Mi thintawi he vaa al hlah, mi um lonak ah amah he lawng va kal hlah, zei cah tiah a ca ah nunnak cu zei hmanh a si lo, cucaah chanhtu um lonak ah an thah sual lai.

17 Mihrut cu ruahnak va hal hlah, zei tin tiah na biathli a chimh sual lai. 18Biathli in chiah ding mi zei hmanh khual hmai ah va tuah hlah, zei tin tiah khual nih zei dah aa tuahnak lai na hngal lo. 19 Mileng sin ah na lung-um bia va chim hlah, naa lawmhnak na sung sual lai.